Biblia Todo Logo
Bìoball air-loidhne

- Sanasan -

Mariko 8 - AMASAKO ABOYTRTRE WA NYAMUHANGA AWAKAHULAWA MO BIBLIA


Yesu akalĩsaya abandu elfu ĩnĩ (4,000)
( Mt 15.32-39 )

1 Enyũma wʼebiro ebyo, eyindi ndeko nene moyahĩndana. Kandi isibawite ebyʼerirya. Neryo Yesu mwabirikira abiga buwe mwabwirabo ati,

2 Namakwĩra endeko yʼobũlĩge, kusangwa bamasiba nage lino ebiro bisatu, isibawite ebyʼerirya.

3 Bamasuba ewabo batalĩre ibakandiremberera omo nzira, kusangwa abandi ni ba hali.

4 Abiga buwe mobamũsũbĩrya bati, Hano hʼomo mbwarara amandu angabanika hayi busana nʼerĩũgũtya abandu bangaha aba kwehĩ?

5 Yesu mwabũlyabo ati, Muwite uku mandu angahi kwehĩ? Nabo bati, Alinda.

6 Neryo mwabwira abandu abo ati bĩkale ahisi. Neryo Yesu mwĩmya amandu alinda ayo, mwaha ewasĩngya uku Nyamuhanga, neryo mwatsũtsangago, mwahago abiga buwe ati bagabirego oko bandu ababya omo ndeko; neryo abiga mobagabago batya.

7 Kandi ibawite otuhere tuke. Nĩkwa Yesu mwaha ewasĩngya busana nato, neryo mwabwira abiga ati batwalehyo, bagabehyo.

8 Neryo abosĩ mobalya mobũgũta. Babya nga bandu elfu ĩnĩ (4,000).

9 Neryo abiga mobasongya ebitahangukira ebyasaka, mobyũsũlya ebitiri birinda. Neryo Yesu mwalagana nʼendeko ati bagende.

10 Kandi Yesu mwingira omo bwato haguma nʼabiga buwe, mobaya omo kihugo kyʼeDalmanũta.


Abafarĩsayo bakasonda ebitiko-tiko
( Mt 16.1-4 )

11 Nĩkwa Abafarĩsayo mobahuluka mobatsũka erĩkũbĩsanĩa Yesu yʼobuhaka, ibakasonda ekitiko-tiko kĩkalũa elubula, ibakamulengako.

12 Neryo Yesu mwahumulikana mwasweka omo mutima wuwe ati, Olulengo olũ lukasonda-sonda ekitiko-tiko busana nakĩ kwehĩ? Kwenene ngabũga nenyũ nyiti, Olulengo olũ silwendisyahabwa ekitiko-tiko.

13 Neryo mwasĩgabo, muwasuba Omo bwato, mwasokera eyisirya wʼengetsi.


Ekĩhamya kyʼAbafarĩsayo nʼekya Herode
( Mt 16.5-12 )

14 Neryo abiga mobibirirwa eriheka obundu ibawite uku mbiga nguma nyisa omo bwato.

15 Yesu mwahanabo ati, Mũlebaye, mũyĩtegaye busana nʼekĩhamya kyʼAbafarĩsayo, nʼekĩhamya kya Herode.

16 Nabo mobakanĩranĩa omo katĩkatĩ kabo omwatsi oyo bati, Kusangwa situwite obundu.

17 Yesu mwaminya ebyo bakanayako kyaleka ĩnĩabũlyabo ati, Busana nakĩ mũkakanĩranaya muti simuwite obundu kwehĩ? Sĩmwasĩ kutse eriminya kwehĩ? Emitima yenyũ ĩkĩnakalakalĩre itya kwehĩ?

18 Muwite ameso, simwelangira kwehĩ? Muwite amatwĩ, sĩmũlĩowa kwehĩ? Simulibuka,

19 omugulu natsũtsanga amandu atanu busana nʼabandu elfu ĩtanu kwehĩ? (5,000). Momwasongya ebitiri bingahi byʼebitahangukira ebyasaka kwehĩ? Mobasũbĩrya bati, Erĩkũmĩ nʼebibiri.

20 Nʼomugulu natsũtsanga amandu alinda busana nʼabandu elfu ĩnĩ, momwasongya bitiri bingahi byʼebitahangukira ebyasaka kwehĩ? Mobasũbĩrya bati, Birinda.

21 Neryo Yesu mwabũlyabo ati, Simuli mwanaminya kwehĩ?


Yesu akalamaya endĩmatĩme eBetesaĩda

22 Neryo mobahĩka eBetesaĩda, nʼeyo mobaleta endĩmatĩme uku Yesu ibakamusaba bati amũtũleko.

23 Neryo Yesu mwawata oko byala byʼendĩmatĩme, mwamutwala ekyaswa kyʼomũyĩ. Abere abĩtwĩra amatande gʼoko meso wuwe, Yesu mwamũhĩra kwʼebyala neryo mwa­mũbũlya ati, Wanamalangira kindu kwehĩ?

24 Nʼomundu oyo mwasumba ameso mwabũga ati, Namalangira abandu, nĩkwa bali ngʼemiti eyikagenda.

25 Kandi Yesu mwaswahĩra ebyala biwe oko meso wʼomundu oyo. Neryo omundu oyo mwasamalira ndeke-ndeke, nʼameso wuwe mwalangira ebindu byosĩ byo ndeke,

26 Nĩkwa Yesu mwamutuma ewabo ati, Susube omo mũyĩ oyo.


Yesu akabũlaya abiga buwe ati, Ĩngyendi?
( Mt 16.13-20 ; Lk 9.18-21 )

27 Neryo Yesu nʼabiga buwe mobaya oko mĩyĩ yʼeKaĩsarĩ-Fĩlĩpĩ. Omo nzira Yesu mwabũlya abiga buwe ati, Abandu bati nyirindi kwehĩ?

28 Mobamũsũbĩrya bati, Abandi bati, Uli Yoane Mũbatĩsya; abandi bati, Uli Elĩa; kandi abandi bati, Uli muguma gʼoko bamĩnyererĩ.

29 Kandi Yesu mwabũlyabo ati, Nenyũ mũtĩkĩ kwehĩ? ĩnywe muti nyirindi kwehĩ? Petero mwasũbĩrya ati, Uli Kristo.

30 Neryo Yesu mwaganĩabo ati, Simubwire mundu busana nage.


Yesu akahula oluholo luwe
( Mt 16.21-28 ; Lk 9.22-27 )

31 Neryo Yesu mwatsũka erĩkangĩrĩrya abiga buwe ati, Omugala wʼomundu atolere iniagalwa kutsibu, nʼeriganwa nʼabakulu, nʼabahererĩ bakulu, nʼabakangĩrĩrya bʼEmigambo. Kandi asyĩtwa, nʼenyũma wʼebiro bisatu ĩnĩalũbũkĩbwa.

32 Yesu mwabwirabo omwatsi oyo ndeke-ndeke. Neryo Petero mwatwala Yesu aho lutambi, mwatsũka erimukunga.

33 Nĩkwa Yesu mwabinduka mwasamalira abiga buwe, neryo mwakunga Petero ati, Uwe Satanĩ, ubye enyũma kwĩngye. Amalengekanĩa wawe si wa Nyamuhanga nĩkwa ni wʼabandu.

34 Neryo Yesu mwabirikira endeko haguma nʼabiga buwe, neryo mwabwirabo ati, Omundu amanza erinyikwama ayigane, aheke omusalaba wuwe, anyikwame.

35 Kusangwa omundu Oyukasonda erĩlamya engebe yiwe asyatalyayo; nʼomundu Oyũkatalaya engebe yiwe busana nage na busana nʼEngulu Yowene asyalamyayo.

36 Ko mundu akabana ndũndĩ yahi amatunda ekihugo kyosĩ, nĩkwa akatalya engebe yiwe kwehĩ?

37 Omundu asyahĩnganĩakĩ busana nʼengebe yiwe kwehĩ?

38 Kusangwa omundu amakwa esĩsonĩ busana nage, kandi busana nʼebĩnywa byage omo lulengo lubi olũ lʼoluteto olutekenga Nyamuhanga, Omugala wʼomundu asyamũkwa esĩsonĩ omugulu asyasa omo lukengerwa lwa Tata wuwe haguma nʼabamalaĩka buwe babũyĩrĩre.

Bible in Kinandi © Bible Society of the Democratic Republic of Congo, and Bible Society of Uganda, 1980.

Bible Society of the Democratic Republic of Congo
Lean sinn:



Sanasan