Mariko 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Omundu wʼebyala bĩlehemĩre

¹ Neryo Yesu mwaswaya omo nyũmba yʼerĩhĩndanamo. Nʼomundu wʼebyala bĩlehemĩre abyaho.

² Kandi abandu mobatungerera Yesu ngʼakandĩmũlamya omo kiro kyʼeSabato kusangwa babya banzĩre erimutsongera nabi.

³ Neryo Yesu mwabwira omundu wʼebyala bĩlehemĩre ati, Hangana wase emuliro eno.

⁴ Neryo mwabũlya abandu ati, Omo Migambo yetu linatolere omo Sabato erikola ebibuya kutse erikola nabi kwehĩ? Erĩlamya engebe yʼomundu kutse erĩheryayo kwehĩ? Nĩkwa mobabya bũkũtũ.

⁵ Neryo Yesu mwasamalirabo, mwatĩmbya ameso wuwe go kubo iniahitene, iniakagalawa busana nʼobutsibu, bwʼemitima yabo. Neryo mwabũga nʼomundu oyo ati, Lambula ebyala byawe. Naye mwalambula ebyala biwe, neryo mobyalama ndeke.

⁶ NʼAbafarĩsayo mobahuluka, mobaya embĩta haguma nʼAbaherode, ngoko bangĩta Yesu.

Endeko nene ikakwama Yesu

⁷ Nĩkwa Yesu nʼabiga buwe mobaya oko ngetsi yʼeGalĩlaya; nʼendeko nene moyamukwama. Endeko eyo yalũa eGalĩlaya, nʼeYũdea,

⁸ nʼeYerũsalema, nʼekihugo kyʼeĨdũmea, nʼekihugo kyʼeyisirya wʼeYorodanĩ, nʼekihugo kĩhererenĩe nʼemĩyĩ yʼeTĩro nʼeSĩdona. Endeko nene eyo moyahĩka uku Yesu kusangwa bowa emyatsi abya akakola.

⁹ Nʼendeko eyĩ yabya nene kutsibu, kyaleka Yesu iniabwira abiga buwe ati babane obwato busana naye, abandu bakasyamũhatatanĩa.

¹⁰ Kusangwa Yesu abya akalamya abandu bangi, nʼabakonĩ bangi mobayĩlabĩrĩrya ukwʼiye bati banamatamũtũlako.

¹¹ Nʼomugulu abandu ababya kwʼebĩrĩmũ bibi bamulolako, mobawa ahisi embere siwe ibakalaka bati, Uli Mugala wa Nyamuhanga.

¹² Neryo Yesu mwahanabo kutsibu ati sĩbamũkũmayĩraye.

Yesu akayisoga abakwenda ĩkũmĩ nʼababiri

¹³ Neryo Yesu mwahetukira oko kitwa, mwabirikira abandu abo abya anzĩre, nabo mobaya aho ali.

¹⁴ Neryo mwayisoga bandu ĩkũmĩ nʼababiri batoke eribya haguma naye, kandi atoke eritumabo erĩyatũlaganĩa omwatsi,

¹⁵ kandi babye nʼehamũlĩ yʼerihiga esyombĩnga.

¹⁶ Erĩkũmĩ nʼababiri abo Yesu ayisoga nĩ Sĩmonĩ, (oyo Yesu ahula mo Petero);

¹⁷ na Yakobo nʼomugala wabo ye Yoane, abagala ba Zebedayo, (Yesu mwahabo erĩna Boanerge, eribindula liti, Abagala bʼomũlũmo);

¹⁸ na Anderea, na Fĩlĩpo, na Bartolomayo, na Matayo, na Toma, na Yakobo mugala wa Alufayo, na Tadeo, na Sĩmonĩ Mukanana,

¹⁹ na Yũda Ĩskarĩota, oyo wamuhotera.

Yesu na Belzebũlĩ

²⁰ Neryo Yesu mwaya eka. Kandi endeko nene moyahĩndana, kyaleka Yesu nʼabiga buwe ibabula endambĩ yʼerirya.

²¹ Neryo omugulu abʼekĩtũnga kiwe bowa omwatsi oyũ mobayamuhamba kusangwa abandu bati, Abiribya mũsĩre.

²² Kandi abakangĩrĩrya bʼEmigambo abalũa eYerũsalema babya bakabũga bati, Ali ko Belzebũlĩ. Abandi bati, Omukulu wʼesyombĩnga yukamuha amaka wʼerihiga esyombĩnga.

²³ Neryo Yesu mwabirikira abandu hakũhĩ naye, neryo mwabũga nabo omo mĩsyo ati, KwʼeSatanĩ yangatoka erihiga eSatanĩ yiti kwehĩ?

²⁴ Kandi obwami bwamayĩrwanĩa, obwami obo sibwangatoka erihangana.

²⁵ Ekĩtũnga kyʼabandu kyamayĩrwanĩa, ekĩtũnga ekyo sikyangahangana.

²⁶ Kandi eSatanĩ yamayĩrwanĩa, nayo siyangatoka erihangana, nĩkwa yasyahwa.

²⁷ Sihali mundu oyo wangatoka eriingira omo nyũmba yʼomundu wʼamaka nʼerĩhũnga ebindu biwe atalyatsũka erimuboha; neryo iniatoka erĩhũnga enyũmba yiwe.

²⁸ Kwenene ngababwira nyiti, Abandu basyabuyirwa ebibi byabo byosĩ, nʼebĩtsũmĩ byosĩ bakatsuma.

²⁹ Nĩkwa oyukatsuma Omũlĩmũ Abũyĩrĩre, siendisyabuyirwa na kera, nĩkwa iniabiribya oko musango wʼebibi byʼerikota.

³⁰ Kusangwa babya bakabũga bati, Ali ko kĩrĩmũ kibi.

Abagala babo Yesu na nyĩnya wuwe

³¹ Neryo abagala babo Yesu na nyĩnya wuwe mobahĩka. Mobahangana eyĩhya, mobamutumirako, bakamubirikira.

³² Neryo endeko yabya ĩtekĩre hakũhĩ na Yesu, neryo mobamubwira bati, Lebaya, koyo wawe nʼabagala benyũ bali eyĩhya banemukusonda-sonda.

³³ Yesu mwasũbĩryabo ati, Koyo nindi, nʼabagala betu ni bahi kwehĩ?

³⁴ Neryo mwasamalira abandu abĩkere ababya bamũtĩmbĩreko ati, Lebaya! Hano ho hali koyo wage nʼabagala betu!

³⁵ Kusangwa omundu oyukakola erisonda lya Nyamuhanga, yo mugala wetu, na mwali wetu, na koyo.