Mariko 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩlũbũka lya Yesu

¹ Neryo eSabato yabere yabilaba, Marĩa Magdalene, na Marĩa nyĩnya wa Yakobo, na Salome, mobagula Amanũkato ibatoka erĩhakabya omubiri wa Yesu.

² Nʼomo ngyakya-ngyakya oko kiro kyʼerĩtsũka eyenga, mobaya okwʼisinda eryuba iryamabihuluka.

³ Babya bakabũlanĩa bati, Nindi oyũkandĩkũmbagalya erĩbwe busana netu, eriri oko lũkyo lwʼeyisinda kwehĩ?

⁴ Neryo babere basumba ameso, mobalangira erĩbwe ĩryabĩrĩkũmbagalĩbwa, nomo lyanabya lĩnene kutsibu.

⁵ Neryo mobingira omwʼisinda, mobalangira omũlwana ĩnĩanĩkere oko luhande lwʼamali, iniambite ekanzu nyeru-nyeru, neryo mobasweka.

⁶ Omũlwana oyo mwabũga nabo ati, Simusweke! Mukasonda-sonda Yesu wʼeNazaretĩ, oyo wabambawa oko musalaba. Abĩrĩlũbũka; siakiri hano! Mũlebaye hano ho bamũhĩra.

⁷ Nĩkwa mugende, mubwire abiga buwe na Petero, muti, Akabatanga eGalĩlaya. Eyo yo mwasyamulolerako, ngoko ababwira.

⁸ Nabo mobahuluka mobatibita bakalũa eyiri eyisinda, kusangwa babya bakatitimana nʼerisweka; kandi mobatabwira mundu ekĩnywa kusangwa babya bakubaha.

Yesu akabutukira Marĩa Magdalene

⁹ Neryo Yesu abere abĩlũbũka, omo ngyakya-ngyakya oko kiro kyʼerĩtsũka eyenga, mwatsũka eributukira uku Marĩa Magdalene, oyo ahiga kwʼesyombĩnga sirinda.

¹⁰ Neryo mwayatũlĩrago ababya bakatamba naye, omugulu babya bakalira nʼerĩtogongya emĩsonĩa.

¹¹ Nabo omugulu bowa kwʼaneho, kandi kwʼabirilolwako naye, mobagana erĩkĩrĩrya.

Yesu akabutukira abiga babiri

¹² Nʼenyũma wʼaho, Yesu mwabutukira ababiri ba kubo ĩnĩasosĩre gundi mũsĩndo, omugulu babya bakagenda oko lugendo lwabo ehandi omo kihugo.

¹³ Neryo mobasubula, mobatũlĩrago abandi, nĩkwa mobatĩkĩrĩryabo nibya.

Yesu akabutukira abiga erĩkũmĩ nʼomuguma

¹⁴ Nʼenyũma wʼaho Yesu mwabutukira abiga erĩkũmĩ nʼomuguma omugulu babya bakalya. Neryo mwahayirabo busana nʼerĩtendĩkĩrĩrya lyabo nʼerikala lyʼemitima yabo, kusangwa ĩsĩbetĩkĩrĩrya abamulolako anabĩlũbũka.

¹⁵ Neryo Yesu mwabwirabo ati, Muye omo kihugo kyosĩ, mũtũlaganaye Engulu Yowene oko bandu bosĩ.

¹⁶ Oyũkĩkĩrĩraya kandi iniabiribatĩsĩbwa asyalamĩbwa; nĩkwa oyũtĩkĩrĩraya asyasĩngwa.

¹⁷ Neryo ababĩrĩkĩrĩrya basyahabwa ebiminyikalo ebĩ: basyahigira esyombĩnga syʼeyĩhya omo lĩna lyage, kandi basyabũga omo mĩbũge mihya-mihya;

¹⁸ kandi basyatola esyonzoka, kutse basyapũlya obuti obũkĩta, sibyendĩsyĩtabokĩ; basyahĩra ebyala oko bakonĩ, nabo basyalama.

Yesu akaya elubula

¹⁹ Neryo Omukama Yesu abere abĩbũga nabo, mwatwalwa elubula, mwĩkala oko byala byʼamali bya Nyamuhanga.

²⁰ Neryo abiga nabo mobahuluka nʼerĩyatũlaganĩa ehosĩ, nʼomukama inianemukola haguma nabo ĩnĩakaberereraya ekĩnywa omo biminyikalo ebyakwamabo.