Mariko 15 - AMASAKO ABOYTRTRE WA NYAMUHANGA AWAKAHULAWA MO BIBLIAYesu embere wa Pilato ( Mt 27.1-2 , 11-14 ; Lk 23.1-5 ; Yn 18.28-38 ) 1 Neryo omo ngyakya-ngyakya, abahererĩ bakulu, nʼabakulu, nʼabakangĩrĩrya bʼEmigambo, nʼabʼomwʼĩbũgĩro bosĩ mobahĩndana omo mbĩta. Neryo mobaboha Yesu yʼomo mahulula, mobamutwala eyiri Pilato. 2 Neryo Pilato mwamũbũlya ati, Uli mwami wʼAbayũda kwehĩ? Yesu mwamũsũbĩrya ati, Wamabũgakyo, 3 Neryo abahererĩ bakulu mobamũhandĩkĩrĩrya emyatsi mingi. 4 Kandi Pilato mwaswamũbũlya ati, Sũlĩsũbĩraya kwehĩ? Lebaya ngoko bakakũhandĩkĩrĩraya emyatsi mingi. 5 Nĩkwa Yesu mwataswasũbĩryabo kĩnywa, kyaleka Pilato iniasweka. 6 Nĩkwa oko Kiro Kikulu ekyo Pilato abya akaboholera bandu omundu muguma wʼomũlĩkĩ oyo banzĩre. 7 Neryo omundu oyo wabya akahulwa mo Baraba abya iniabiribohwa haguma nʼabandu abaleta Obwanĩse. 8 Nʼendeko mobabũlya Pilato bati akole ekyo atula akakolerabo. 9 Neryo Pilato mwasũbĩryabo ati, Mũnanzĩre inababoholera Omwami wʼAbayũda kwehĩ? 10 Kusangwa abya asĩ ngoko abahererĩ bakulu bamuhotera busana nʼerimutsura. 11 Nĩkwa abahererĩ bakulu mobatsotsererya endeko bati babũlaye Pilato ababoholere ye Baraba, butsira Yesu. 12 Neryo Pilato mwaswabwira endeko ati, Ngandikolakĩ nʼomundu oyo mukahula mo Mwami wʼAbayũda kwehĩ? 13 Nabo mobaswabũga kutsibu bati, Abambawe oko musalaba! 14 Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabĩrĩrya emirenge yabo bati, Abambawe oko musalaba! 15 Neryo Pilato iniakasonda erĩtsemesya endeko mwaboholerabo ye Baraba. Neryo mwahamula ati, Yesu aswĩrĩbawe emikoba, nĩkwa mwahereryabo Yesu ati abambawe oko musalaba. Abasĩrĩkanĩ bakasekereraya Yesu ( Mt 27.27-31 ; Yn 19.2-3 ) 16 Neryo abasĩrĩkanĩ mobatwala Yesu omo muhana wʼekikali kyʼomũtabalĩ mukulu, neryo mobabirikira omulondo gosĩ wʼabasĩrĩkanĩ. 17 Mobambalya Yesu yʼolukimba lwʼomunyama, kandi mobaluka embĩta yʼamahwa, mobahĩrayo oko mutwe wuwe. 18 Mobatsũka erĩmũbũkya bati, Ukote, uwe Mwami wʼAbayũda! 19 Kandi mobamũswĩrya ngendo-ngendo oko mutwe omo luseke, mobamũtwĩra kwʼamatande, mobamũkũkamira nʼerĩũnama embere siwe. 20 Neryo babere babĩmũsekererya mobamwambula ekanzu yʼOmunyama, mobamwambalya esyongimba siwe. Neryo mobamusondola eriyamubamba oko musalaba. Eribamba Yesu oko musalaba ( Mt 27.32-44 ; Lk 23.36-43 ; Yn 19.17-27 ) 21 Nĩkwa omo nzira mobahamba Sĩmonĩ akalaba, ĩnĩakalũa omolĩ, mobamũhekya omusalaba wa Yesu, oyo abya Sĩmonĩ wʼeKũrene, ĩse wa Alesandũro na Rũfũ. 22 Neryo mobaleta Yesu yʼahakahulawa mo Golgota, kiti: Aherĩhanga. 23 Neryo mobalenga erimuha ebĩnyũ ĩbĩnatũlũngene nʼamane-mane, nĩkwa Yesu mwagana erĩpũlyabyo. 24 Nĩkwa mobabamba Yesu oko musalaba, kandi mobagaba esyongimba siwe omo katĩkatĩ kabo, ibakakanga obukanga esyongimba nga sibye syandi. 25 Nĩkwa omugulu babamba Yesu yabya saa ĩsatu. 26 Nʼerihandika lyʼerimuhandikirira lyabya lĩsakĩre endata oko musalaba liti, omwami wʼAbayũda. 27 Kandi mobabamba abanyeyĩ babiri oko misalaba kuguma na Yesu, omuguma oko luhande lwʼamali, nʼogundi oko luhande lwʼamalembe. [ 28 NʼAmasako mwabererera awakabuga ati, Mwaganzwa haguma nʼabakola-nabi.] 29 Kandi abandu ababya bakalaba mobamutsuma, mobatsinga-tsĩngya emitwe yabo bati, Si haho! Wamabya ũkandĩsyahĩmbũla eHekalũ nʼerĩswahĩmbayo omo biro bisatu. 30 Ũyĩlamaye, ũkĩme oko musalaba! 31 Nibya abahererĩ bakulu haguma nʼabakangĩrĩrya bʼEmigambo mobasekererya Yesu batya omo katĩkatĩ kabo bati, mwalamya abandi, nĩkwa sialitoka erĩyĩlamya. 32 Muleke Kristo, Omwami wa Ĩsraelĩ, akĩme lino alũe oko musalaba, tulangire kandi twĩkĩrĩraye! Kandi ababambawa kuguma naye mobamutsuma. Oluholo lwa Yesu ( Mt 27.45-56 ; Lk 23.44-49 ; Yn 19.28-30 ) 33 Neryo esaa ndatu yabere yahĩka, omwĩrĩmya mwabya oko kihugo kyosĩ erĩhĩka oko saa mwenda. 34 Neryo oko saa mwenda Yesu mwayilakira nʼomulenge munene ati, Eloĩ, Eloĩ. Lama Sabaktanĩ? kiti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ? 35 Abandi bandu ababya bimeneho bakahulikirira, mobabũga bati, Lebaya, akabirikira Elĩa! 36 Neryo omundu muguma mwatibita mũsũlya embũhũma omo pada, neryo mwahĩrayo oko luseke; Neryo mwahayo Yesu erĩpũlyayo ati, Tulinde! Tũlebaye Elĩa ngʼakandiasa nʼerimuhanula! 37 Neryo Yesu mwabirikira nʼomulenge munene, neryo mwalekula. 38 Neryo olukimba olũkasũkũlĩraya olʼomo Hekalũ molwasatĩbwa mo bihande bibiri erĩtsũka endata erĩhĩka ahisi. 39 Neryo omugulu omukulu wʼabasĩrĩkanĩ oyo wabya ahangene hakũhĩ na Yesu, alangira ngoko Yesu abirikira nʼerihola, mwabũga ati, Kwenene, omundu oyũ alwe Mugala wa Nyamuhanga! 40 Abakalĩ babyaho nibya, ĩbakalebaya ibali hali. Marĩa Magdalene abya nabo, na Marĩa nyĩnya wa Yakobo mulere, na Yose, na Salome. 41 Babya bakakwama Yesu nʼerimukolera omugulu abya eGalĩlaya; kandi habya abandi bakalĩ bangi abahetukira eYerũsalema haguma na Yesu. Eritabwa lya Yesu ( Mt 27.57-61 ; Lk 23.50-56 ; Yn 19.38-42 ) 42 Neryo bwabya ĩgolo-golo omugulu Yosefũ wʼeArĩmatea ahĩka. 43 Yosefũ abya mundu ũkengenĩe omwʼĩbũgĩro iniakalinda Obwami bwa Nyamuhanga. Ekiro ekyo kyabya kiro Kyʼerĩkokotya busana nʼeSabato. Neryo Yosefũ mwahanda omutima mwaya eyiri Pilato erĩbũlya omubiri wa Yesu. 44 Neryo Pilato mwasweka erĩowa ko Yesu abirihola. Neryo mwabirikira omukulu wʼabasĩrĩkanĩ mwabũlya ati Yesu ngʼabirihola. 45 Neryo Pilato abere abĩowa ebĩnywa byʼomukulu wʼabasĩrĩkanĩ oyo, mwaha Yosefũ yʼomubiri wa Yesu. 46 Neryo Yosefũ mwayagula olukimba lwʼekĩtanĩ, neryo mwalũsya Yesu yʼoko musalaba, mwamũlĩngĩra omo lukimba lwʼekĩtanĩ olo, neryo mwamũhĩra omo yisinda eyabatsawa omwʼĩbwe. Neryo mwakũmbagalĩrya erĩbwe rĩnene oko lũkyo lwʼeyisinda. 47 Ye Marĩa Magdalene na Marĩa nyĩnya wa Yose, babya bakalebya aho Yesu ahĩrawa. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo