Mariko 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Embĩta yʼeritsimba Yesu

¹ Neryo enyũma wʼebiro bibiri mʼoAihabya Ebiro Bikulu byʼErikiruka nʼobundu Bute mo Kĩhamya. Abahererĩ bakulu nʼabakangĩrĩrya bʼEmigambo mobasonda-sonda enzira yʼerihamba Yesu omo menge, nʼerĩmwĩta.

² Kusangwa babũga bati, situkolekyo omo kiro kikulu, abandu bakasyatwa eyĩsesĩ.

Yesu akahakabĩbawa amagũta eBetanĩa

³ Yesu abya eBetanĩa omo nyũmba ya Sĩmonĩ omuhaga; neryo abere anĩkere okwʼirya, mohahĩka omũkalĩ iniawite okwʼĩtambya lyʼerĩbwe eryoswĩre mwʼamagũta wʼeNardo awakakumba ndeke awʼobũgũlĩ bunene. Omũkalĩ oyo mũtũla erĩtambya eryo mũtũlĩrago oko mutwe wa Yesu.

⁴ Nĩkwa abandi bandu ababyaho mobanitana, mobakanĩa bati, Busana nakĩ amagũta aya amahera atya busa kwehĩ?

⁵ Kusangwa amagũta awakakumba ndeke aya anganagũlĩbwe oko franka magana asatu, nʼesyofranka esyo isyahabwa oko bera, kandi mobahayira omũkalĩ oyo yo kutsibu.

⁶ Nĩkwa Yesu mwabũga ati, Mumuleke, mũkamwendereraya busana nakĩ kwehĩ? Abirinyikolera omũbĩrĩ owene.

⁷ Kusangwa muli nʼabera ebiro byosĩ, nʼomugulu mukanza mukatoka erikolabo ndeke, nĩkwa ĩngye Sindi haguma nenyũ biro byosĩ.

⁸ Abirikola ngoko angatokĩre; abĩrĩhakabya amagũta awakakumba ndeke oko mubiri wage busana nʼeritago.

⁹ Kwenene ngabũga nenyũ, aho Engulu Yowene yasyatũlaganĩbwa omo kihugo kyosĩ, ekyo mũkalĩ oyũ akabikola kyasyatũlaganĩbwa busana nʼerimwibuka.

Oluhota wʼerĩĩta Yesu

¹⁰ Neryo Yũda Ĩskarĩota, omuguma gʼokwʼĩkũmĩ nʼababiri, mwaya oko bahererĩ bakulu busana nʼerihotera Yesu yo kubo.

¹¹ Nabo mobatsema erĩowa ebyo, mobamulaga erimuha esyofranka. Neryo Yũda mwatsũka erisonda-sonda omwanya owene wʼerihotera Yesu.

Yesu akalya erirya lyʼErikiruka

¹² Neryo oko kiro kyʼerĩmbere kyʼerirya Obundu Bute mo Kĩhamya, omugulu babya bakasĩnza ehyana hyʼembũlĩ hyʼErikiruka, abiga ba Yesu mobamubwira bati, Wanzĩre uti tuye hahi erĩkũkokoterya aho wasyalira erirya lyʼErikiruka kwehĩ?

¹³ Neryo Yesu mwatuma abiga buwe babiri ati, Muye oko mũyĩ, neryo omundu oyũhekĩre erĩrega lyʼamagetsi akandĩhĩndana nenyũ, mumukwame.

¹⁴ Neryo asyingira omo nyũmba. Neryo mubwire Omwenye nyũmba muti, Omũkangĩrĩrya ati, Ekyumba kyage kyʼabagenĩ kiri hahi aho nasyalira erirya lyʼErikiruka haguma nʼabiga bage kwehĩ?

¹⁵ Naye akandĩbakangya ekyumba kinene ekiri endata ekĩtegekanĩbwe, ekyabĩrĩkokotĩbwa, eyo mũtũkokoteraye.

¹⁶ Neryo abiga abo mobahongoka mobaya oko mũyĩ oyo, mobeya iko bine ngoko Yesu abwirabo, neryo mobakokotya erirya lyʼErikiruka.

¹⁷ Neryo bwabere bwabya ĩgolo-golo, Yesu mwasa haguma nʼabiga ĩkũmĩ nʼababiri.

¹⁸ Neryo babere bane oko mesa bakalya, Yesu mwabwirabo ati, Kwenene ngababwira nyiti, Omuguma wʼũkwĩnywe akandinyihotera, oyukalya haguma nage.

¹⁹ Abiga mobatsũka erĩkwa obũlĩge nʼerĩmũbũlya muguma muguma bati, Ĩkwa nĩ ĩngye kwehĩ? nʼogundi ati, Nĩ ĩngye kwehĩ?

²⁰ Neryo Yesu mwabwirabo ati, Ni muguma gʼokwʼĩkũmĩ nʼababiri oyũkakoleraya haguma nage omo kibindi.

²¹ Omugala wʼomundu asyahola ngoko kĩsakĩre busana naye; nĩkwa obũlĩge oko mundu oyukasyahotera Omugala wʼomundu! Kumbe ryowene busana nʼomundu oyo nga siabutawa.

Erirya lyʼomukama

²² Nʼomugulu babya bakalya, Yesu mwĩmya obundu, neryo mwatsumulabo, mwatsũtsangabo, neryo mwahabobo, ati, Mwĩmayebo, oyũ ni mubiri wage.

²³ Neryo mwĩmya olũtehĩ, neryo abere abiha ewasĩngya mwahalo oko biga buwe, nʼabosĩ mobapũlya kulo.

²⁴ Neryo Yesu mwabwirabo ati, Oyũ ni musasi wage wʼendagane owakũtawa busana nʼabandu bangi.

²⁵ Kwenene ngabũga nenyũ nyiti, Sindiendisyaswapũlya oko bĩgũma byʼebĩnyũ erĩhĩka ekiro nasyapũlya ebihya-bihya omo Bwami bwa Nyamuhanga.

²⁶ Neryo babere babiimba Olwimbo, mobaya oko kitwa kyʼeMĩzeĩtũnĩ.

Yesu akabwira Petero yʼomwatsi wʼerimugana

²⁷ Nĩkwa Yesu mwabwirabo ati, Ĩnywe bosĩ mwasyanyitswako, kusangwa kyabirisakwa kiti, Nasyaswĩrya Omũlĩsya nʼesyombũlĩ syasyapanzikana.

²⁸ Nĩkwa enyũma wʼerĩlũbũka lyage, nasyabatanga eriya eGalĩlaya.

²⁹ Petero mwamũsũbĩrya ati, Nomo abosĩ bangakutswako, ĩngye iyihi.

³⁰ Yesu mwamubwira ati, Kwenene ngakubwira nyiti, Oko kiro ekĩ engoko-lume ite yabika kabiri, ukandinyigana ngendo ĩsatu.

³¹ Nĩkwa Petero mwayitsinga kutsibu ati, Kyamabya kitolere ngahola haguma nawe, Sindiendikugana. Nʼabandi bosĩ mobabũga batya.

Yesu akasaba eGetesemane

³² Neryo mobahĩka ahakahulawa mo Getesemane, na Yesu mwabwira abiga buwe ati, Mwĩkale hano omugulu ngasaba.

³³ Neryo mwatwala Petero, na Yakobo na Yoane, neryo mwatsũka eriagalwa nʼerĩhahũkya omutima.

³⁴ Neryo mwabwirabo ati, Omutima wage ali nʼobũlĩge bunene, bukasonda erĩnyĩta; mũsĩgale hano, mũtegaye.

³⁵ Neryo mwasegera emuliro yo hake, mwawa oko kitaka, mwasaba ati, kyamatokekana akatambĩ ako kamulabeko.

³⁶ Neryo mwasaba ati, Tata! Tata! Emyatsi yosĩ ikatokekana ukʼuwe. Ũnyĩlũsaye kwʼolũtehĩ olũ. Nĩkwa butsira ekyo nyanzĩre, nĩkwa ekyo wanzĩre.

³⁷ Neryo mwasa mweya abiga basatu abo ibanagotsere, neryo mwabũga na Petero ati, Sĩmonĩ, wayĩreto kwehĩ? Sulitatoka erĩteya esaa nguma kwehĩ?

³⁸ Neryo mwabwirabo ati, Mũtegaye, musabe, isimwingira omwʼirengwako. Omutima anzĩre, nĩkwa omubiri ni molo.

³⁹ Neryo mwalũaho kandi mwasaba, mwasuba omo bĩnywa ebyo.

⁴⁰ Kandi mwasa mweyabo ibaneto, kusangwa ameso wabo ĩnĩasĩkerere. Nabo mobabula nga bangamũsũbĩryakĩ.

⁴¹ Kandi mwasa engendo yʼakasatu, neryo mwabũlyabo ati, Mukinagotsere nʼeriluhuka kwehĩ? Bingaho. Endambĩ yamahĩka. Lebaya! Omugala wʼomundu akahoterawa omo byala byʼabakola-nabi.

⁴² Muhangane, tugende, Mũlebaye! Omũhoterĩ wage amahĩka!

Oluhota lwʼeritsimba Yesu

⁴³ Neryo omugulu Yesu abya akĩnabũga, Yũda, omuguma gʼokwʼĩkũmĩ nʼababiri mwahĩka. Nʼendeko eyĩhekĩre emĩyalĩ nʼesyongonĩ yabya haguma naye, ibakatumawa nʼabahererĩ bakulu, nʼabakangĩrĩrya bʼEmigambo, nʼabakulu.

⁴⁴ Nĩkwa omũhoterĩ oyo iniabiriha abandu abo ekiminyikalo ati, Omundu oyo nasyalyatsirira iyo mundu oyo; mumuhambe, mumutwale nʼerĩmũteya kutsibu.

⁴⁵ Neryo Yũda abere ahĩka, mwaya hakũhĩ na Yesu ati, Mũkangĩrĩrya! Neryo mwamulyatsirira.

⁴⁶ Neryo mobahamba Yesu, mobamuwatako kutsibu.

⁴⁷ Nĩkwa omuguma oko babya bahangeneho mwakula omũyalĩ wuwe, mwabanda omukobe wʼomũhererĩ Mukulu mwatwa okũtũ kuwe.

⁴⁸ Neryo Yesu mwasũbĩryabo ati, Mwabĩrĩhĩka nʼemĩyalĩ nʼesyongonĩ muti mukanyihamba ngʼomũrahĩ kwehĩ?

⁴⁹ Obuli kiro nabya haguma nenyũ omo Hekalũ ngakangĩrĩrya, momutanyihamba; nĩkwa Amasako atolere eribererera.

⁵⁰ Neryo abiga mobamutswako, mobatibita abosĩ.

⁵¹ Neryo habya omũlwana muguma oyo wabya akakwama Yesu, iniambite olukimba lwʼomusohe lusa, neryo mobalenga erimuhamba.

⁵² Nĩkwa mwasĩganĩa olukimba luwe lʼomusohe, mwatibita ndũmbũ.

Yesu embere wʼerĩbũgĩro

⁵³ Neryo mobatwala Yesu yʼomo nyũmba yʼomũhererĩ Mukulu oko bahererĩ bosĩ. Nʼabahererĩ bakulu bosĩ, nʼabakulu, nʼabakangĩrĩrya bʼEmigambo mobahĩndanaho.

⁵⁴ Nĩkwa Petero mwamukwama inianayikengeherere, neryo mwahĩka omo muhana wʼenyũmba yʼomũhererĩ Mukulu oko bahererĩ bosĩ. Neryo mwĩkala haguma nʼabateya, iniakota oko muliro.

⁵⁵ Nĩkwa abahererĩ bakulu nʼabʼomwʼĩbũgĩro bosĩ mobasonda-sonda omwatsi wʼerĩhandĩkĩrĩrya Yesu nʼamabehĩ ibatoka erĩmwĩta, nĩkwa mobatabanago.

⁵⁶ Kusangwa abandu bangi mobamũhandĩkĩrĩrya omo mabehĩ, nĩkwa erĩtũlago lyabo molĩtahĩkana.

⁵⁷ Neryo abandi bandu mobahangana mobahandĩkĩrĩrya Yesu omo mabehĩ bati,

⁵⁸ Motũkowa akabũga ati, Nasyasambula eHekalũ eyo abandu bahĩmba, kandi enyũma wʼebiro bisatu nasyahĩmba eyindi Hekalũ eyitehĩmbawa nʼabandu

⁵⁹ Kutse omo mwatsi oyũ nibya erĩtũlago lyabo molĩtahĩkana.

⁶⁰ Neryo Omũhererĩ Mukulu oko bahererĩ bosĩ mwahangana omo katĩkatĩ kabo, neryo mwabũlya Yesu ati, Sũlĩsũbĩraya kwehĩ? Ni byahi ebyo bandu aba bakakũhandĩkĩrĩraya kwehĩ?

⁶¹ Nĩkwa Yesu mwabya bũkũtũ mwatamũsũbĩrya. Kandi Omũhererĩ Mukulu oko bahererĩ bosĩ mwamũbũlya ati, Uli Kristo, Omugala wa Nyamuhanga wʼomũyĩsa kwehĩ?

⁶² Neryo Yesu mwabũga ati, Indi ye, kandi mwasyalangira Omugala wʼOmundu ĩnĩanĩkere oko byala byʼamali byʼobũtokĩ, iniakasa nʼebĩtũ byʼomo kyanya.

⁶³ Neryo Omũhererĩ Mukulu oko bahererĩ bosĩ mwatulanga ekanzu yiwe ati, Tukine nʼobwaga bwʼabalangĩrĩ kwehĩ?

⁶⁴ Mwabĩrĩowa eritsuma liwe, mũtĩkĩ kwehĩ? Neryo abosĩ mobamutswera bati atolere oluholo!

⁶⁵ Neryo abandi mobatsũka erĩtwĩra uku Yesu kwʼamatande, mobaswika obũsũ buwe, nʼerĩmũswĩrya ebĩkũndĩ, ibakamubwira bati, Minyerera oyo wamakũswĩrya! Nʼabateya mobamuhamba mobamũswĩrya esyongũmbe.

Petero akagana Yesu

⁶⁶ Nĩkwa Petero mwabya eyĩkwa omo muhana, neryo omuguma wʼoko banabato abagombe bʼomũhererĩ Mukulu oko bahererĩ bosĩ, mwahĩkaho.

⁶⁷ Neryo omwana-muto oyo mwalangira Petero iniakota oko muliro, neryo mwamutungerera ati, Nawe nibya wabya haguma na Yesu Omunya Nazaretĩ,

⁶⁸ Nĩkwa Petero mwagana ati, Sĩnyasĩ, kutse sinditaminya ekyo ũkabũga, neryo mwaya eyĩhya omo bũsekũ bwʼenyũmba. Neryo engoko-lume moyabika.

⁶⁹ Neryo omwana-muto oyo mwamulangirayo, neryo mwaswabwira ababya bahangeneho ati, Oyũ ni muguma wa kubo.

⁷⁰ Nĩkwa kandi Petero mwaswagana. Nʼenyũma wʼakatambĩ kake ababya bahangeneho mobaswabwira Petero bati, Kwenene-kwenene uli muguma wa kubo, kusangwa uli Mũgalĩlaya nibya.

⁷¹ Nĩkwa Petero mwatsũka eritsuma nʼerĩlahĩrya ati, Sĩnyasĩ omundu oyo mukahula.

⁷² Neryoneryo engoko-lume moyabika engendo yʼakabiri. Neryo Petero mwibuka ngoko Yesu amubwira ati, Engoko-lume ite yabika kabiri, wasyanyigana esyongendo ĩsatu. Neryo mwatsũka eririra kutsibu.