Mariko 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akahula erisambulwa lyʼeHekalũ

¹ Neryo omugulu Yesu abya akalũa omo Hekalũ, omuguma gʼoko biga buwe mwabũga ati, Mũkangĩrĩrya, lebaya! Amabwe angaha nʼamanyũmba angaha wʼeriswekera.

² Neryo Yesu mwamũsũbĩrya ati, Wanamalangira amanyũmba manene aya kwehĩ? Sihendisyasĩgala erĩbwe nʼeriguma endata oko lindi, eritendisyasambulirwa ahisi.

Emyatsi eyikandisyasa enyũma

³ Yesu abya ĩkere oko kitwa kyʼeMĩzeĩtũnĩ ahisirya oko Hekalũ. Neryo Petero, na Yakobo, na Yoane, na Anderea, mobamũhĩkako bakamũbũlĩrya ahate bandu, bati,

⁴ Utubwire emyatsi eyĩ nga yasyabererera mugulu wahi, kandi utubwire ekiminyikalo nga ni kyahi ekikandisyabya omugulu emyatsi yosĩ eyĩ ikandisyabererera.

⁵ Neryo Yesu mwabwirabo ati, Mũtegaye, Sihabye mundu ũkabatalaya.

⁶ Abandu bangi basyasa omo lĩna lyage bati, Ingye indi ye! bakandĩsyatalya bandu bangi.

⁷ Nʼomugulu mũkowa engulu yʼamalwa nʼolombĩ lwʼamalwa simubahe; emyatsi eyĩ itolere ĩyahĩka; nĩkwa endũlĩ isiriyaberwa.

⁸ Kusangwa ekihanda kyasyalwa nʼekindi kihanda, nʼobwami buguma bwasyalwa nʼobundi bwami. Hasyabya emĩsĩkĩ ehandi nʼehandi, kandi hasyabya esyonzala. Emyatsi eyĩ iri ngʼerĩtsũka lyʼerikunda lyʼomũkalĩ.

⁹ Nĩkwa mũyĩtegaye! Kusangwa abandu basyabahotera omwʼĩbũgĩro. Mwasyahũnzĩrwa omo manyũmba wʼerĩhĩndanamo, mwasyahangana embere wʼabatabalĩ bakulu nʼabami busana nage, busana nʼerĩtũlĩrabo omwatsi wage.

¹⁰ Engulu Yowene itolere ĩyatũlaganĩbwa oko bihanda byosĩ.

¹¹ Nʼomugulu bakabahamba nʼeribatwala eribahotera, sĩmũhahũkaye emitima erĩmbere ngamwasyabũgakĩ, nĩkwa mũbũge ebyo mwasyahabwa oko ndambĩ eyo. Kusangwa ĩnywe mutendisyabũga, nĩkwa Omũlĩmũ Abũyĩrĩre asyabaha ebĩnywa byʼerĩbũga.

¹² Abandu basyahotera abagala babo bĩtawe, nʼĩse wʼomwana asyahotera omwana wuwe, nʼabana basyalwa nʼababũtĩ babo ĩbĩtĩsyabo.

¹³ Nʼabandu bosĩ basyabakwa obusu busana nʼerĩna lyage. Nĩkwa oyo wasyayĩyĩnĩa erĩhĩka oko ndũlĩ yo wasyalamĩbwa.

Ekitsibu kyʼerĩherya

¹⁴ Nĩkwa omugulu mwasyalangira ekitsibu ikihangene oko kitatolere, Oyukasoma aminye ndeke. Neryo abali eYũdea basagire oko bitwa.

¹⁵ Omundu oyuli endata oko nyũmba sĩakĩme, kutse eriingiramo ati akaheka kindu ekiri omo nyũmba yiwe.

¹⁶ Nʼomundu oyuli omwʼirima siasubire olukimba luwe omo nyũmba yiwe.

¹⁷ Nĩkwa obũlĩge oko bakule nʼoko bakalĩ abakaha abana babo bʼamabere, oko biro ebyo.

¹⁸ Nĩkwa musabe Nyamuhanga, omwatsi oyũ sĩahĩke oko mugulu wʼeritsuku!

¹⁹ Kusangwa obũlĩge bwʼebiro ebyo bwasyabya ĩbũkalĩre isibwebwatabya erĩtsũka ekiro Nyamuhanga ahangika ekihugo, erĩswahĩka na lino, kandi sibwendisyaswabya butya na kera.

²⁰ Nĩkwa Omukama abirikũhĩhya ebiro ebyo; kumbe atalikola atya erĩkũhĩhya ebiro ebyo nga sihali mundu wangalamĩbwa Nĩkwa abĩrĩkũhĩhyabyo busana nʼabayisogawa buwe.

²¹ Neryo omundu amababwira ati, Lebaya, hano ho Kristo ali; kutse ati, Langira, yolya halya! Sĩmũlĩge!

²² Kusangwa Abokristo bʼamabehĩ nʼabamĩnyererĩ bʼamabehĩ basyahuluka. Basyakangya ebĩmĩnyĩsyo nʼebyʼeriswekera busana nʼerĩtalya abayisogawa ba Nyamuhanga, kyamatokekana.

²³ Nĩkwa mũtegaye! Mũlebaye, nabiribabwira emyatsi yosĩ erĩmbere.

Erĩhĩka lyʼomugala wʼomundu

²⁴ Nĩkwa oko biro ebyo, enyũma wʼomugulu wʼobuligo oyo, eryuba lyasyabya mwĩrĩmya, nʼomukera siendisyaswakola,

²⁵ nʼesyongũnũnũ syasyatogonga erĩlũa elubula, nʼebyʼobũtokĩ obuli omo kyanya bwasyatenga-tenganĩbwa.

²⁶ Neryo basyalangira Omugala wʼomundu akasa omo bĩtũ, nʼobũtokĩ bunene, nʼolukengerwa.

²⁷ Neryo asyatuma abamalaĩka erĩhĩndanĩa abayisogawa ba Nyamuhanga erĩlũa oko mahunga ani, erĩlũa oko syondũlĩ syʼekihugo nʼerĩhĩka oko syondũlĩ syʼekyanya.

Omũsyo wʼomuti wʼomũtĩnĩ

²⁸ Lino wige omũsyo wʼomuti wʼomũtĩnĩ. Omugulu akatohaya emitahi yago, ikabya myolo-myolo, neryo ĩkalasaya ebikoma byago, Ukaminya ngoko omugulu wʼomwisi ali hakũhĩ.

²⁹ Litya nenyũ nibya, omugulu mukalangira emyatsi eyĩ ĩkahĩka, muminye omugulu kwʼali hakũhĩ, oko lũkyo.

³⁰ Kwenene ngabũga nenyũ, olulengo olũ silwendisyahwaho emyatsi eyĩ ite yabererera.

³¹ Ekyanya nʼekihugo byasyahwaho, nĩkwa ebĩnywa byage sibyendisyahwaho.

Sihali mundu wasĩ ekiro kutse endambĩ

³² Nĩkwa sihali mundu oyo wasĩ erĩhĩka lyʼekiro ekyo kutse endambĩ eyo— nomo bangabya bamalaĩka omo lubula, kutse Omugala, nina Tata yũnasĩ ĩyowene.

³³ Mũtegaye, mũlebaye, kusangwa sĩmwasĩ omugulu oyo nga ni wahi.

³⁴ Ali ngʼomundu oyuli oko lugendo lwʼekindi kihugo omugulu akalũa eka, akasĩgĩra abagombe buwe obuli mundu omũbĩrĩ wuwe, akategeka omũteya wʼolũyĩ ategaye,

³⁵ Neryo mũtegaye, kusangwa sĩmwasĩ omugulu omukama wʼenyũmba asyasa—kutse omwʼĩgolo-golo, kutse omo katĩ-kanene kutse engoko yahasabo, kutse bwasesukala.

³⁶ Akasyababũlĩkĩranĩa, akeya imuneto.

³⁷ Nʼebyo ngabũga nenyũ, ngabũga nʼabosĩ nyiti, Mũtegaye!