Mariko 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihiga omũkalĩ

¹ Neryo Yesu mwalũa aho, mwaya omo kihugo kyʼeYũdea, neryo mwasoka olũsĩ lwʼeYorodanĩ. Kandi esyondeko mosyahĩndana haguma na Yesu, naye mwakangĩrĩrya ngoko anatula akakola.

² Abafarĩsayo mobamũhĩkako, ibakalenga erimutega. Bati, Emigambo ĩkalĩga omundu erihiga mũkalĩ wuwe kwehĩ?

³ Yesu mwasũbĩryabo ati, Musa mwabahana ati kwehĩ?

⁴ Mobamũsũbĩrya bati, Musa mwalĩgĩra omundu erisakira omũkalĩ yʼebarua yʼerimukomola, nʼerimuhiga.

⁵ Yesu mwabwirabo ati, Musa abasakira ekihano ekĩ busana nʼerikala lyʼemitima yenyũ.

⁶ Nĩkwa okwʼĩtsũka oko mugulu wʼerihangika, Nyamuhanga mwahangikabo omulume nʼomũkalĩ.

⁷ Busana nʼomwatsi oyo, omundu asyasĩga ĩse na nyĩnya wuwe, inialanda oko mũkalĩ wuwe,

⁸ nʼababiri basyabya mubiri muguma. Litya sibakiri babiri, nĩkwa mubiri muguma.

⁹ Neryo abo Nyamuhanga abĩrĩmatanĩa haguma, Sihabye mundu oyukagabulabo.

¹⁰ Neryo babere babisuba omo nyũmba, abiga mobabũlya Yesu busana nʼomwatsi oyo.

¹¹ Naye mwabũga nabo ati, Omundu oyukahiga omũkalĩ wuwe akahĩkya ogundi mũkalĩ iniakasĩngĩra.

¹² Kandi omũkalĩ oyũkalũa kwʼĩba wuwe akahĩkĩbwa nʼogundi mulume iniakasĩngĩra.

Yesu akatsumula abana

¹³ Neryo abandu mobaletera Yesu yʼabana balere bati atsumulebo, nĩkwa abiga mobakunga abandu abo.

¹⁴ Nĩkwa omugulu Yesu alangira ebyo, mwahitana neryo mwabwira abiga buwe ati, Muleke abana balere base kwĩngye! Sĩmũkakĩrayebo, kusangwa Obwami bwa Nyamuhanga ni bwʼabali ngʼaba.

¹⁵ Kwenene ngabũga nenyũ nyiti, Oyutiangirira Obwami bwa Nyamuhanga ngʼomwana mulere siendisyingira mubo nʼahake.

¹⁶ Neryo mwahambabo omo byala biwe, mwahĩra kubo kwʼebyala, mwatsumulabo.

Omundu wʼebindu bingi

¹⁷ Neryo omugulu Yesu atsũka olugendo luwe, omundu mwatibita aho ali, mwakũkama embere siwe, mwamũbũlya ati, Mũkangĩrĩrya mubuya, nyikolekĩ eribana engebe yʼerikota kwehĩ?

¹⁸ Yesu mwamũbũlya ati, Busana nakĩ ukanyahula mo mubuya kwehĩ? Sihali mubuya nina Nyamuhanga ĩyowene.

¹⁹ Ũnasĩ ebihano; biti, Ĩsĩwĩta; isiwasĩngĩra; Ĩsĩwĩba; isiwabihira bandi; isiwateba; Ũsĩkaye tata wawe na koyo wawe.

²⁰ Neryo omundu oyo mwabũga ati, Mũkangĩrĩrya, Ebyosĩ ebyo nabirikolabyo erĩtsũka omo bwana bwage.

²¹ Yesu mwamusamalira nʼerimwanza, mwamubwira ati, Ũkĩsĩya mwatsi muguma. Ugende, ũgũlaye ebyosĩ ebyo uwite, uhe byʼoko bera, nawe wasyabya nʼebindu elubula; neryo wase, Unyikwame.

²² Omundu oyo abere owa ebĩnywa ebyo, obũsũ buwe mobwasunza, mwalũaho nʼobũlĩge, kusangwa abya awite bindu bingi kutsibu.

²³ Yesu mwatĩmbya ameso gʼoko biga buwe neryo mwabwirabo ati, Monzo lĩkalĩre busana nʼabandu abawite ebindu bingi eriingira omo Bwami bwa Nyamuhanga!

²⁴ Neryo abiga buwe mobaswekera ebĩnywa biwe. Nĩkwa Yesu mwabwirabo kandi ati, Abana, monzo lĩkalĩre busana nʼabandu abakayiketera ebindu bingi eriingira omo bwami bwa Nyamuhanga!

²⁵ Ni ryolo busana nʼengamia erilaba omo kyũna kyʼesĩndanĩ kwilaba omundu wʼebindu bingi eriingira omo Bwami bwa Nyamuhanga.

²⁶ Neryo abiga mobasweka kutsibu, nʼerimubwira bati, Ko nindi wasyatoka erĩlamĩbwa kwehĩ?

²⁷ Yesu mwatungererabo mwabwirabo ati, Ekĩ sikiritokekana oko bandu, nĩkwa uku Nyamuhanga. Kusangwa emyatsi yosĩ ikatokekana uku Nyamuhanga.

²⁸ Neryo Petero mwatsũka erĩbũga naye ati, ĩtwe ka twabĩrĩsiga ebyosĩ nʼerikukwama.

²⁹ Yesu mwabwirabo ati, Kwenene ngababwira nyiti, Sihali Oyũkasĩga enyũmba, kutse bagala babo, kutse bali babo, na koyo, nʼĩse, kutse abana, kutse ebitaka, busana nage, na busana nʼEngulu Yowene,

³⁰ oyutendisyasũbũlĩrĩbwa ngendo ĩgana oko mugulu ono, amanyũmba nʼabagala babo, nʼabali babo, nʼabokoyo, nʼabana, nʼebitaka, haguma nʼerĩendererĩbwa; nʼengebe yʼerikota oko mugulu owakandisyasa.

³¹ Nĩkwa abangi abali embere lino basyabya bʼenyũma, nʼabangi abali enyũma lino basyabya bʼembere.

Yesu akahula kandi erihola liwe

³² Neryo babya omo nzira bakahetukira eYerũsalema. Yesu abya akagenda embere syʼabiga buwe. Nabo ĩbakayĩkwĩra buba. Nʼabandu abakamukwama enyũma mobubaha. Kandi mwatwala erĩkũmĩ nʼababiri elutambi, mwabwi rabo emyatsi eyĩkandĩsyamũhĩkako.

³³ Yesu mwabwirabo ati, Lebaya, tukahetukira eYerũsalema. Eyo Omugala wʼomundu asyahoterwa oko bahererĩ bakulu nʼabakangĩrĩrya bʼEmigambo. Basyamutswera bati akwe, nʼerimuhotera oko Bihanda.

³⁴ Nabo basyamũsekererya, nʼerimũ twĩrako amatande, nʼerĩmũswĩrya emikoba, nʼerĩmwĩta. Kandi enyũma wʼebiro bisatu asyalũbũka.

Yakobo na Yoane bakasonda erĩsĩkĩbwa

³⁵ Neryo Yakobo na Yoane, abagala ba Zebedayo mobahĩka uku Yesu bati, Mũkangĩrĩrya, tukasonda iwatukolera ekyo tũkabũlaya.

³⁶ Neryo Yesu mwabũlyabo ati, Mukasonda inabakolerakĩ kwehĩ?

³⁷ Nabo mobamũsũbĩrya bati, Omugulu Wasyĩkala oko kĩtũmbĩ kyawe kyʼobwami bwʼolukengerwa, tuti, utuhe erĩĩkala haguma nawe, omuguma oko byala byʼamali, nʼomuguma oko malembe.

³⁸ Yesu mwabwirabo ati, Sĩmwasĩ ekyo mũkabũlaya, ko mwanganatoka erĩpũlya oko lũtehĩ olo ngapũlĩrayako kwehĩ? Kutse erĩbatĩsĩbwa omo lũbatĩso olo ngabatĩsĩbawamo kwehĩ?

³⁹ Nabo mobamũsũbĩrya bati, Twanganatoka. Yesu mwabwirabo ati, Mwasyapũlya oko lũtehĩ olo ngapũlĩrayako; kandi mwasyabatĩsĩbwa omo lũbatĩso olo ngabatĩsĩbawamo.

⁴⁰ Nĩkwa erĩĩkala oko mali wage nʼoko malembe wage, Sindi na hamũlĩ eribahalyo. Ni Nyamuhanga yo wasyaha emyanya eyo oko abo abĩrĩkokoteryayo.

⁴¹ Nĩkwa omugulu abandi biga ĩkũmĩ bowa omwatsi oyo, mobahitana uku Yakobo na Yoane.

⁴² Neryo Yesu mwabirikira abosĩ haguma, neryo mwabwirabo ati, Mũnasĩ ngoko abandu abakaganzawa ngʼabatabalĩ bʼEbihanda ko bakatabalira abandu babo nʼabakulu babo bakahamulabo.

⁴³ Nĩkwa ko bite bitya omo katĩkatĩ kenyũ. Oyo wanzĩre eribya mukulu omo katĩkatĩ kenyũ asyabya mũsũbĩ wenyũ;

⁴⁴ nʼoyo wanzĩre eribya wʼerĩmbere omo katĩkatĩ kenyũ asyabya mukobe wʼabosĩ.

⁴⁵ Kusangwa Omugala wʼomundu mwatasa erikolerwa; nĩkwa mwasa erikola, nʼeriha engebe yiwe mo bũgũlĩ busana nʼabandu bangi.

Yesu akalamaya Baratĩmayo

⁴⁶ Neryo mobahĩka eYerĩko. Nʼomugulu abya akalũa eYerĩko haguma nʼabiga buwe nʼendeko nene, endĩmatĩme oyukahulawa mo Baratĩmayo, abya ĩkere oko mũsĩke wʼenzira akasabĩrĩrya ebihembo.

⁴⁷ Abere owa kwʼali Yesu wʼeNazaretĩ, neryo mwatsũka erilaka kutsibu ati, Yesu, Mugala wa Dawĩdĩ, unyiganyire!

⁴⁸ Neryo abandu bangi mobamukunga bati abye bũkũtũ, nĩkwa mwabirikira kutsibu kwʼaho ati, Mugala wa Dawĩdĩ, unyiganyire!

⁴⁹ Neryo Yesu mwahangana, neryo mwabũga ati, Mumubirikire. Neryo mobabirikira endĩmatĩme eyo bati, Ũsĩkaye omutima. Uhangane, amakubirikira.

⁵⁰ Neryo mwagusa ekanzu yiwe, mwahangana, mwahĩka uku Yesu.

⁵¹ Neryo Yesu mwamũbũlya ati, Ukasonda inakukolerakĩ kwehĩ? Endĩmatĩme eyo moyamũsũbĩrya iti, Mukama wage, nyanzĩre eriswalangira.

⁵² Yesu mwamubwira ati, Uyigendere, erĩkĩrĩrya lyawe lyamakũlamya. Neryo-neryo mwabana erilangira, neryo mwakwama Yesu omo nzira.