Malakĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhĩka lyʼomukwenda nʼeritswera ababi

¹ Lebaya, ngatuma omukwenda wage, naye asyowanĩa enzira embere syage; nʼomukama, oyo mũkasonda-sondaya, asyabutuka omo Hekalũ yiwe; nʼomukwenda wʼendagano, oyo mukatsemera lebaya, akasa, Omwami Mukulu Wʼemilondo atya.

² Nĩkwa nindi wasyasĩka ekiro kyʼerĩhĩka liwe kwehĩ? Kandi nindi wasyatoka erihangana omugulu akahuluka kwehĩ? Kusangwa ali ngʼomuliro wʼomũhesĩ, kandi ngʼesabũnĩ eyĩkeraya.

³ Naye asyĩkala ngʼomũtũkũrĩ nʼomũtendererya wʼebĩtsĩpa, kandi asyatũkũrya abagala ba Lawĩ, nʼerĩeryabo ngʼesyamagetsi nʼekĩtsĩpa; ibatoka eriha Omwami Mukulu amahere omo litunganene.

⁴ Oko mugulu oyo amahere wa Yũda nʼeYerũsalema asyatsemesya Omwami Mukulu, ngʼomo biro bya kera, kandi ngʼomo myaka ya kera.

⁵ Neryo nasyasegera hakũhĩ nenyũ omwʼitswera; kandi nasyabya mũlangĩrĩ oyukanguha erilwa nʼabakũmũ, nʼabasĩngĩrĩ, nʼabakalahĩraya nʼamabehĩ, nʼabakanũbaya omũhĩngĩ oko bũhĩngĩ buwe, nʼomũkwakalĩ, nʼengũbĩ, nʼabakakĩtaya omubunga, kandi sibalinyubaha, Omwami Mukulu Wʼemilondo atya.

⁶ Kusangwa, Ĩngye Mwami Mukulu, sindibinduka; kikaleka ĩnywe bagala ba Yakobo ĩmũtaherĩbwa.

Erĩĩma Nyamuhanga oko biwe

⁷ Erĩtsũka oko biro byʼabotata wenyũ mwabirikita erĩlũa oko migambo yage, isimũlĩtateyayo. Omwami Mukulu Wʼemilondo ati, Munyisubeko, nage nasyabasubako. Nĩkwa ĩnywe muti, Twasyasubula tuti kwehĩ?

⁸ Ko mundu anganĩba uku Nyamuhanga kwehĩ? Nĩkwa ĩnywe mũkanyĩbako. Nĩkwa ĩnywe mũkabũga muti, Twabĩrĩkwĩbako tuti kwehĩ? Omo bihande byʼomwʼĩkũmĩ nʼomwʼĩhĩtya.

⁹ Mwabiritakirwa omwʼitakirwa; kusangwa mwabĩrĩnyĩbako, ĩnywe kihanda kyosĩ.

¹⁰ Mulete ekiguma kyʼomwʼĩkũmĩ kyosĩ omo mbĩso, akalyo kabye omo nyũmba yage, kandi munyirenge lino Ũmwʼekĩ, Omwami Mukulu Wʼemilondo atya, nga sindiendisyabakingulira amadĩrĩsa wʼelubula nʼerĩbũtũlĩrako omũyĩsa, isihangabanika obwaga.

¹¹ Neryo ngandisyahayira engondĩ eyikalya busana nenyũ, nayo sĩyendĩsyaherya esyombuto syʼekitaka kyenyũ; kutse omũlĩkĩ wʼebĩnyũ wenyũ sĩendĩsyalagalya ebĩgũma byago. Omwami Mukulu Wʼemilondo atya.

¹² Nʼebihanda byosĩ byasyabahula mo bʼobutseme; kusangwa ĩnywe mwasyabya kihugo kyʼerĩtsemesya, Omwami Mukulu Wʼemilondo atya.

Abatasĩ endũndĩ yʼerikolera Nyamuhanga

¹³ Omwami Mukulu ati, Ebĩnywa byenyũ byamakala ũkwʼĩngye. Nĩkwa ĩnywe muti, Twamatabũga ekibi kyahi busana nawe kwehĩ?

¹⁴ Mwabĩrĩbũga muti, Ni buyira erikolera Nyamuhanga; kandi endũndĩ ni yahi okwʼĩteya erihana liwe, nʼerirendera eririra embere syʼOmwami Mukulu Wʼemilondo kwehĩ?

¹⁵ Na lino tukahula abakayiheka mo bʼobutseme; kandi, abakolĩ bʼebibi sibegasa lisa, nĩkwa, bakalenga uku Nyamuhanga, nibya ibabala.

Ekitabu kyʼeryibuka

¹⁶ Neryo ababya bakubaha Omwami Mukulu, mobakanĩa haguma; nʼOmwami Mukulu mwatega amatwĩ mowakyo, nʼekitabu kyʼeryibuka ekyo mokyasakirwa embere siwe busana nʼabandu abakubaha Omwami Mukulu, nʼabakasĩma erĩna liwe.

¹⁷ Omwami Mukulu Wʼemilondo ati, Basyabya bage, oko kiro ekyo nategeka, obũsokĩ bwage; kandi nasyaganyirabo, ngʼomundu kwʼakaganyira mugala wuwe oyukamukolera.

¹⁸ Neryo mwasyasubula, mwasyasombola nʼeriminyerera omo katĩkatĩ kʼabatunganene nʼababi, nʼomo katĩkatĩ kʼoyukakolera Nyamuhanga, nʼoyutemukolera.