Malakĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akategeka abahererĩ

¹ Na lino ĩnywe bahererĩ, erihana erĩ ni busana nenyũ.

² Mwamatĩndĩowa, mukatindabikalyo omo mutima, eriha erĩsĩkya oko lĩna lyage, Omwami Mukulu Wʼemilondo atya, neryo nasyabatumira eritakira, kandi nasyatakira emĩyĩsa yenyũ; kandi kwenene, nabiritakirayo, kusangwa simwetabikalyo omo mutima.

³ Lebaya, nasyabayira abana benyũ, kandi nasyahakabya ebise omo mũsũ wenyũ, bye biro byʼobuhere bwenyũ, nenyũ mwasyalũsĩbwaho haguma nabyo.

⁴ Nenyũ mwasyaminya ko nabiribatumira erĩhano erĩ, endagano yage iyatoka eribya na Lawĩ, Omwami Mukulu Wʼemilondo atya.

⁵ Endagano yage tunaye yabya yʼengebe nʼobuholo; kandi monamuhabyo ngʼemyatsi yʼerikenga; neryo mwanyikenga, kandi mwaswekera erĩna lyage.

⁶ Erĩkangĩrĩrya lyʼekwenene lyabya omo buno buwe, nʼebitatunganene mobitabanika omo mĩnywa yiwe; mwalendera haguma nage omo buholo nʼeritunganene, kandi mwabindula abandu bangi erĩlũa oko bibi.

⁷ Kusangwa emĩnywa yʼomũhererĩ yangabika amenge, kandi abandu bangasonda-sonda erĩkangĩrĩrya omo buno buwe; kusangwa ni mukwenda wʼOmwami Mukulu Wʼemilondo.

⁸ Omwami Mukulu Wʼemilondo ati, ĩnywe mwabirikita erĩlũa omo nzira; mwabĩrĩtwĩkalya abangi omwʼĩkangĩrĩrya; mwabĩrĩtsandya endagano ya Lawĩ.

⁹ Busana nʼekyo nabiribayira mo bʼeriponwa, nʼerĩkehĩbwa embere syʼabandu bosĩ, ngoko mũtategaya esyonzira syage, nĩkwa mwabiriyira ebitaga omwʼĩkangĩrĩrya.

Omwami Mukulu akahayira ebibi byʼeĨsraelĩ

¹⁰ Ĩtwe bosĩ situwite tata muguma kwehĩ? Nyamuhanga muguma mwatatubumba kwehĩ? Busana nakĩ tukakola amatebo obuli mundu oko mugala wabo erĩtsandya endagano yʼabotata wetu kwehĩ?

¹¹ Yũda abiriteba, nʼesyonye syamakolwa omo Ĩsraelĩ nʼomo Yerũsalema; kusangwa Yũda abĩrĩtsandya ahʼerĩĩkala ahabũyĩrĩre hʼOmwami Mukulu aho anzĩre, kandi Yũda abĩrĩhĩkya mwali wa nyamuhanga wʼehandi.

¹² Omwami Mukulu ahige omo mahema wa Yakobo abosĩ abakakola batya, nomo angabyandi, kutse oyukaleta obuhere oko Mwami Mukulu Wʼemilondo.

¹³ Kandi ekĩ ni kindi ekyo mukakola: mukaswika ekiherero kyʼOmwami Mukulu omo mĩsonĩa, nʼeririra, nʼerihumulikana, kusangwa siakilangira obuhere, kutse erĩrĩgabo ndeke omo byala byenyũ.

¹⁴ Nĩkwa mũkabũga muti, Busana nakĩ kwehĩ? Ni kusangwa Omwami Mukulu abiribya mũlangĩrĩ omo katĩkatĩ kawe nʼomũkalĩ wʼobutabana bwawe, kandi mowamukola amatebo, nomo anabya ini mũlĩkyenyũ, nʼomũkalĩ wawe wʼendagano.

¹⁵ Nĩkwa sihali oyo wakolĩre atya oyuwite erĩsĩgalira lyʼOmũlĩmũ kwehĩ? Kandi oyo mwakolakĩ kwehĩ omugulu asondaya omwana oyũsosĩre Nyamuhanga. Busana nʼekyo mũtegaye emitima yenyũ, Sihabye mundu oyukakolera omũkalĩ wʼobutabana buwe omo matebo.

¹⁶ Kusangwa ngakwa erikomola lyʼobusu, Omwami Mukulu, Nyamuhanga wa Ĩsraelĩ atya. Nʼoyukaswika olukimba luwe mo mwaga, Omwami Mukulu Wʼemilondo atya, Neryo mũtegaye emitima yenyũ, isimwakola amatebo.

¹⁷ Mwabĩrĩlũhya Omwami Mukulu omo bĩnywa byenyũ. Nĩkwa mũkabũga muti, Twamamũlũhya ũmũkĩ kwehĩ? ĩmũkabũga muti, Obuli mundu ukakola ebibi ni mubuya omo meso wʼOmwami Mukulu, kandi muti akatsemerabyo; kutse Nyamuhanga wʼerĩbanza litunganene ali hahi kwehĩ?