Malakĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Eriminyerera lyʼekĩnywa kyʼOmwami Mukulu uku Ĩsraelĩ omo buno bwa Malakĩ.

Olwanzo lwʼOmwami Mukulu busana na Yakobo

² Omwami Mukulu ati, Nabiribanza. Nĩkwa mũkabũga muti, Wabiritwanza umu kyahi kwehĩ? Esaũ siabya mugala wabo Yakobo kwehĩ? Omwami Mukulu ati, Nabirianza Yakobo;

³ nĩkwa nabĩrĩkwa Esaũ yʼobusu, monayira ebitwa biwe mo bĩma, kandi nabiriha omwandu wuwe oko syoboha syʼomo mbwarara.

⁴ Nomo Edomũ akabũga ati, Twabĩrĩhũnzangirwa ahisi nĩkwa twasyasubula nʼerĩhĩmba ebĩma; Omwami Mukulu Wʼemilondo ati, Basyahĩmba, nĩkwa nasyateryago; nʼabandu basyahulabo mo kihugo kibi, nʼabandu abo Mwami Mukulu abirihitanako kera na kera.

⁵ Nʼameso wenyũ asyalangira ebĩ, neryo mwasyabũga muti, Omwami Mukulu apipawe eyisirya wʼomutano wʼeĨsraelĩ.

Omwami Mukulu akakunga abahererĩ

⁶ Omugala akasĩkaya tata wuwe, nʼomugombe akasĩkaya omukama wuwe. Neryo namabya indi tata, erĩsĩkĩbwa lyage liri hahi kwehĩ? Kandi namabya indi mukama, erinyikenga liri hahi kwe­hĩ? Omwami Mukulu Wʼemilondo akabũga nʼĩnywe bahererĩ abakapona erĩna lyage, Nenyũ muti, Tukapona erĩna lyawe umu kyahi kwehĩ?

⁷ Mukahonga obundu obũnũbĩre oko kiherero kyage. Nĩkwa mũkabũga muti, Twabĩrĩkũtsandya umu kyahi kwehĩ? ĩmũkabũga muti, Emesa yʼOmwami Mukulu ni yʼeriponwa.

⁸ Nĩkwa omugulu mukahera esyondĩmatĩme busana nʼobuhere, si kibi kwehĩ? Nʼomugulu mukahonga ebirema nʼesilwere, si kibi kwehĩ? Mutahasyo omũtabalĩ wenyũ; asyabatsemera kwehĩ? Kutse anasyabalĩgĩra ndeke kwehĩ? Omwami Mukulu Wʼemilondo atya.

⁹ Nĩkwa, lino, kĩsĩ-kĩsĩ, simulisaba eriganyira lya Nyamuhanga, atubanire eriganyira kwehĩ? Omo buhere ngʼobo busana nenyũ, kwʼanasyalĩga eribangirira ndeke kwehĩ? Omwami Mukulu Wʼemilondo atya.

¹⁰ Kumbe hali muguma omo katĩkatĩ kenyũ oyo wangakinga esyongyo, isimwangakya omuliro go busa oko kiherero kyage! Omwami Mukulu Wʼemilondo ati, Sindibatsemera, kutse Sindiendĩsyalĩga obuhere omo byala byenyũ.

¹¹ Kusangwa erĩlũa aho eryuba likahuluka nʼerĩhĩka aho likalengera, erĩna lyage lyasyabya ĩnene omo katĩkatĩ kʼebihanda, nʼehosĩ basyahonga obukwa oko lĩna lyage, nʼobuhere bwʼengano bubuya; kusangwa erĩna lyage nʼĩnene omo katĩkatĩ kʼebihanda, Omwami Mukulu Wʼemilondo atya.

¹² Nĩkwa ĩnywe mũkatsandayalyo, ĩmũkabũga muti, Emesa yʼOmwami Mukulu yabiritsanda, neryo busana nʼebĩgũma byayo byo byalya byayo, ni byʼeriponwa.

¹³ Kandi mũkabũga nibya muti, Lebaya, nĩ ndũhĩ yingaha! Kandi mukabeha kuyo nʼepono, Omwami Mukulu Wʼemilondo atya; kandi mwabirireta eyahũngawa, nʼebirema, nʼesilwere; ko mukaleta obuhere bo mutya! Ko ngandĩrĩga obo omo byala byenyũ kwehĩ Omwami Mukulu atya.

¹⁴ Nĩkwa omũtebya atakirawe, oyuwite enume omo kihangulo kiwe, ĩnĩakalahĩrayayo, nĩkwa akahongera Omukama enyama eyiri kʼobulema; kusangwa indi Mwami Mukulu. Omwami Mukulu Wʼemilondo atya, nʼerĩna lyage ni ryʼerĩũbahya omo bihanda.