Luka 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Erirengwako lya Yesu

¹ Yesu mwasubula akalũa eYorodanĩ, ĩnĩoswĩre nʼOmũlĩmũ Abũyĩrĩre, neryo mwasondolwa nʼOmũlĩmũ omo mbwarara.

² Neryo Satanĩ moyamulengako omo biro amakũmĩ ani. Kandi mwatalya kindu omo biro ebyo, kyaleka ĩnĩakwa enzala ebiro ebyo byabihwa.

³ Neryo Satanĩ moyamubwira iti, Wamabya uli Mugala wa Nyamuhanga, ubwire erĩbwe erĩ ribye bundu.

⁴ Yesu mwasũbĩryayo ati, Amasako akabũga ati, Omundu siendisyabyaho busana nʼobundu ĩbobwene.

⁵ Neryo Satanĩ moyamutwala endata, moyamũkangya amami gosĩ wʼekihugo oko katambĩ kake ngʼerĩkohya lyʼerĩso.

⁶ Neryo Satanĩ moyamubwira iti, Ngandikuha ehamũlĩ yosĩ nʼolukengerwa lwago, kusangwa nabirihabwabyo, nage ngahabyo ukwʼoyo nyanzĩre erimuha.

⁷ Ebyosĩ ebĩ byasyabya byawe, wamanyĩramya.

⁸ Yesu mwasũbĩryayo ati, Amasako ati, Wasyaramya Omukama Nyamuhanga wawe iwamukolera ĩyowene.

⁹ Neryo Satanĩ moyamutwala, moyamũhĩra oko litungulu lyʼeHekalũ neryo moyabũga naye iti, Wamabya uli Mugala wa Nyamuhanga, uyiguse ahisi,

¹⁰ kusangwa Amasako ati, Nyamuhanga asyahamula abamalaĩka buwe erĩkũteya.

¹¹ Kandi, Basyakubagalira, Isiwahuma ekisando kyawe kyʼokwʼĩbwe.

¹² Yesu mwasũbĩryayo ati, Amasako ati, Susyerenga oko Mukama Nyamuhanga wawe.

¹³ Neryo omugulu Satanĩ yabuga erirenga lyosĩ, moyaleka Yesu eritaswalinda ogundi mugulu.

Yesu akatsũka omũbĩrĩ wuwe eGalĩlaya

¹⁴ Neryo Yesu mwasuba eGalĩlaya, nʼobũtokĩ bwʼOmũlĩmũ Abũyĩrĩre bwabya haguma naye. Engulu yiwe moyagenda-genda omo kihugo kyosĩ ekyo;

¹⁵ Neryo mwakangĩrĩrya omo manyũmba wabo wʼerĩhĩndanamo, iniakapipawa nʼabandu bosĩ.

Yesu akaganawa eNazaretĩ

¹⁶ Neryo Yesu mwaya eNazaretĩ aho akulira, nʼoko kiro kyʼeSabato mwaya omo nyũmba yʼerĩhĩndanamo ngʼemibere yiwe. Neryo mwahangana erisoma Amasako.

¹⁷ Neryo mobamuha ekitabu kyʼomũmĩnyererĩ Ĩsaya. Neryo mwalĩngola ekitabu ekyo, mwabana ahasakĩre hati,

¹⁸ Omũlĩmũ wʼOmukama ali kwĩngye, Kusangwa abĩrĩnyĩhakabya erĩtũla Engulu Yowene yʼoko bera, Abirinyituma erĩtũlĩra obwĩranda oko banyegawa, Nʼeriswaha erilangira oko syondĩmatĩme, Eribohola abakanũbĩbawa,

¹⁹ Erĩtũla omwatsi wʼomwaka ogo Mukama asyalamya abandu buwe.

²⁰ Yesu mwalĩnga ekitabu ekyo, mwasũbyakyo oko mũteya wakyo, neryo mwĩkala ahisi. Ameso wʼabosĩ ababya omo nyũmba yʼerĩhĩndanamo mwamutungerera.

²¹ Neryo mwatsũka eribwirabo ati, Mũnabwĩre Amasako aya amabererera ngoko mũkabĩowa.

²² Nʼabandu bosĩ mobabũga ndeke busana naye, kandi mobasweka busana nʼebĩnywa bibuya abũga. Bati, Oyũ si mugala wa Yosefũ kwehĩ?

²³ Neryo Yesu mwabũga nabo ati, Nyĩnasĩ mukandimbwira omũsyo oyũ ati, Omunganga, ũyĩlamaye; kandi mwasyambwira muti, Ukole hano eka wenyũ, ebyo wakola eKapernaũmũ ngoko towa, ubikole nʼena wenyũ eno.

²⁴ Neryo Yesu ati, Kwenene ngababwira nyiti, Sihali omũmĩnyererĩ oyũkakokĩbawa omo kihugo kiwe.

²⁵ Nĩkwa ngababwira kwenene oko mugulu wa Elĩa, habya abakwakalĩ bangi eĨsraelĩ. Oko mugulu oyo sihabya embũla oko myaka ĩsatu nʼemikera ndatu, nʼenzala nene moyahĩka omo kihugo kyosĩ.

²⁶ Nĩkwa Elĩa mwatatumwa kubo, ko nʼoko mũkwakalĩ wʼeZarepata, omo kihugo kyʼeSĩdona.

²⁷ Kandi habya abahaga bangi eĨsraelĩ oko mugulu wʼomũmĩnyererĩ Elĩsa; nĩkwa sihali oyo walamĩbawa, nina Namanĩ Omũsũrĩa.

²⁸ Abandu bosĩ ababya omo nyũmba yʼerĩhĩndanamo omugulu bowa emyatsi eyĩ mobahitana kutsibu.

²⁹ Neryo mobahangana mobakurira Yesu yʼekyaswa, mobamutwala oko ngwangwa yʼekitwa aho mũyĩ wabo abya ahĩmbĩrwe, bati bakamugusa omo kikwangwa.

³⁰ Nĩkwa Yesu mwalaba omo katĩkatĩ kabo mwagenda omo nzira yiwe.

Yesu akalamaya omundu oyuli kwʼembĩnga

³¹ Neryo Yesu mwandagalira eKapernaũmũ, omũyĩ wʼeGalĩlaya. Nʼeyo abya akakangĩrĩrya bandu omo kiro kyʼeSabato.

³² Abosĩ mobaswekera erĩkangĩrĩrya liwe, kusangwa ebĩnywa biwe byabya nʼehamũlĩ.

³³ Neryo habya mundu omo nyũmba yʼerĩhĩndanamo oyuli kwʼembĩnga yʼekĩrĩmũ kibi, iniakalaka kutsibu ati,

³⁴ Ĩlolo! Tuli na mwatsi wahi nawe uwe Yesu wʼeNazaretĩ, kwehĩ? Wamasa erĩtũherya kwehĩ? Nyĩnakwasĩ, ni iwe Mũbũyĩrĩre wa Nyamuhanga!

³⁵ Neryo Yesu mwakungayo ati, Ubye bũkũtũ, ũmũlwĩke! Nʼembĩnga moyamulunda ahisi omo katĩkatĩ kabo, moyamũlũako isiritamukola nabi.

³⁶ Nʼabosĩ mobasweka, kandi mobatsũka erĩkanĩa haguma bati, Ekĩnywa ekĩ nĩkĩ kwehĩ? Kusangwa nʼehamũlĩ nʼobũtokĩ omundu oyũ akahamula ebĩrĩmũ bibi, nabyo ĩbyalũamo.

³⁷ Nʼengulu yiwe moyatsungana ehosĩ omo kihugo ekyo.

Yesu akalamaya abandu bangi

³⁸ Neryo Yesu mwahangana mwalũa omo nyũmba yʼerĩhĩndanamo, mwaya omo nyũmba ya Sĩmonĩ. Nĩkwa nyĩnyĩbyala wa Sĩmonĩ abya alwere endwala yʼerĩhũhana kutsibu, neryo mwalembalemba Yesu busana naye.

³⁹ Neryo Yesu mwaya hakũhĩ nʼengyingo yʼomũkonĩ, neryo mwakunga erĩhũhana eryo, nalyo molyamũlũako; neryo Omũkonĩ mwahangana lũba, mwakolerabo.

⁴⁰ Nĩkwa eryuba lyabere lyalenga, abandu bosĩ ababya bawite abakonĩ bʼesyondwala syʼemĩsĩndo-mĩsĩndo mobaletabo uku Yesu; naye mwahĩra ebyala biwe oko buli mũkonĩ mwalamyabo.

⁴¹ Nʼesyombĩnga mosyalũa oko bandu bangi, sikalaka-laka kutsibu siti, Uli Mugala wa Nyamuhanga. Neryo Yesu mwakungasyo, kandi mwakagasyo erĩbũga kĩnywa, kusangwa syabya ĩsĩnasĩ kwʼali Kristo.

Yesu akayakangĩrĩraya eYũdea

⁴² Neryo bwabere bwabikya Yesu mwalũa oko mũyĩ oyo mwaya ahate bandu. Neryo esyondeko mosyamusonda-sonda neryo babere babimubana, mobalenga erĩmũkakĩrya bati sĩalũe kubo.

⁴³ Nĩkwa mwabwirabo ati, Litolere ĩnatũla Engulu Yowene yʼobwami bwa Nyamuhanga oko yindi mĩyĩ nibya, kusangwa Nyamuhanga mwanyituma erikola omwatsi oyũ.

⁴⁴ Neryo Yesu mwatũla Engulu Yowene omo manyũmba wʼerĩhĩndanamo eYũdea.