Luka 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩlũbũka lya Yesu

¹ Nĩkwa oko kiro kyʼerĩtsũka eyenga, omugulu kyatsũka erikya, abakalĩ mobahĩka oko yisinda, bakaleta amanũkato ago bakokotaya.

² Neryo mobeya erĩbwe ĩryabĩrĩkũmbagalĩbwa lĩkalũa okwʼisinda.

³ Neryo mobingiramo, nĩkwa mobatabana mʼomubiri wʼomukama Yesu.

⁴ Neryo omugulu batika-tika busana nʼomwatsi oyũ, lebuya, abandu babiri abambite esyongimba sĩkangabasenĩe mobabutukiraho hakũhĩ nabo.

⁵ Abakalĩ abo mobubaha mobatũlama ahisi. Neryo abandu abo mobabũlyabo bati, Busana nakĩ mukasonda-sondera oyuliho omo katĩkatĩ kʼabaholĩre kwehĩ?

⁶ Siali hano, abĩrĩlũbũka. Mwibuke ngoko ababwira iniakine eGalĩlaya,

⁷ ati, Omugala, wʼOmundu atolere erihoterwa oko bandu bʼebibi, nʼeribambwa oko musalaba neryo enyũma wʼebiro bisatu ĩnĩalũbũka.

⁸ Neryo abakalĩ abo mobibuka ebĩnywa biwe,

⁹ mobasubula bakalũa okwʼisinda, mobabwira abiga ĩkũmĩ nʼomuguma nʼabandi bosĩ emyatsi yosĩ eyĩ.

¹⁰ Abakalĩ abo babya Marĩa Magdalene, na Yoana, na Marĩa, nya Yakobo, nʼabandi bakalĩ haguma nabo, mobabwira abakwenda bʼemyatsi eyĩ.

¹¹ Nĩkwa abakwenda mobaganĩrya ebĩnywa ebyo abakalĩ batũla nga buyira, mobatĩkĩrĩryabo.

¹² Nĩkwa Petero mwahangana, mwatibita okwʼisinda; neryo Petero mũnama mwakengemereramo, mwalangira esyongimba syʼekĩtanĩ nyisa. Neryo mwasuba ewuwe akaswekera ebyabere.

Olugendo lwʼeEmaũ

¹³ Neryo oko kiro ekyo ababiri ba kubo babya bakagenda oko kayĩ akakahulawa mo Emaũ, olugendo lwʼebilometre ĩkũmĩ na kiguma erĩlũa eYerũsalema.

¹⁴ Nĩkwa babya bakakanĩa haguma emyatsi yosĩ eyabere.

¹⁵ Neryo babere banemũkanĩa nʼerĩbũlanĩa Yesu ĩyowene mwasegera hakũhĩ nabo mwatsũka erĩgendanĩa haguma nabo.

¹⁶ Nĩkwa ameso wabo mwabya omo bũlĩme mobataswamuminya.

¹⁷ Yesu mwabũlyabo ati, Ko nĩ bĩnywa byahĩ ebyo mũkakanaya nʼerĩbũlanĩa omugulu mukagenda kwehĩ? Nabo mobimana ĩbanakwĩre engitsi.

¹⁸ Omuguma wa kubo oyukahulawa mo Kleopa mwamũsũbĩrya ati, Kwe nina we wowene ukabungira eYerũsalema ũtasĩ ebyabere eno omo biro ebĩ kwehĩ?

¹⁹ Neryo Yesu mwabũlyabo ati, Ni myatsi yahi kwehĩ? Nabo bati, Emyatsi ya Yesu Mũnazaretĩ oyo wabya mũmĩnyererĩ wʼamaka manene omo mĩbĩrĩ nʼomo bĩnywa omo meso wa Nyamuhanga nʼabandu bosĩ.

²⁰ Nĩkwa abahererĩ bakulu nʼabatabalĩ betu mobamuhotera bati atswerawe okwʼihola, neryo mobamũbambĩre oko musalaba.

²¹ Nĩkwa ĩtwe twabya nʼamaha tuti yũkandĩtongolya Ĩsraelĩ. Kandi, hamatakya biro bisatu enyũma wʼemyatsi eyĩ.

²² Kandi abakalĩ bʼomo ndeko yetu babĩrĩtũswekya. Mobakaya okwʼisinda omo ngyakyangyakya.

²³ Nĩkwa mobateteyamo omubiri wuwe. Neryo mobakasubula bati bamalola oko bamalaĩka omo bũlĩme abalyabwirabo bati aneho.

²⁴ Neryo abandi bʼendeko yetu mobakaya okwʼisinda mobakegaya iko bine ngoko abakalĩ balĩabũga, nĩkwa mobatetamulolako.

²⁵ Neryo Yesu mwabwirabo ati, Ĩnywe muli bakĩrũ, muli bolo omo mitima okwʼĩkĩrĩrya ebyosĩ abamĩnyererĩ babĩrĩbũga!

²⁶ Sikyabya kitolere Kristo iniagalwa omo myatsi eyĩ nʼeriingira omo lukengerwa luwe kwehi?

²⁷ Neryo Yesu mwakanĩryabo emyatsi yiwe eyiri omo Masako erĩtsũka omo bitabu bya Musa nʼamasako wʼabamĩnyererĩ bosĩ.

²⁸ Neryo mobahĩka hakũhĩ nʼakayĩ ako babya bakayako, neryo Yesu mwabya ngʼakalabira embere.

²⁹ Nĩkwa mobahatikana Yesu bati, Wĩkale netu kusangwa bukahumbera, nʼomwĩrĩmya ali hakũhĩ. Neryo Yesu mwingira erĩĩkala nabo.

³⁰ Neryo abere ĩkala oko mesa haguma nabo, mwĩmya obundu mwatsumulabo, mwatsũtsangabo, mwahabobo.

³¹ Nʼameso wabo mwalĩbũkala neryo mobamuminya, neryo Yesu mwabulirana omo meso wabo.

³² Nabo mobabwirana bati, Emitima yetu moyĩtetahũhana omwisi wetu akakanĩa netu omo nzira, nʼomugulu alyatũkanĩraya Amasako kwehĩ?

³³ Neryo mobahangana oko ndambĩ eyo mobasuba eYerũsalema, mobeya abiga erĩkũmĩ nʼomuguma ĩbama bĩhĩndana haguma nʼabandi ababya haguma nabo,

³⁴ bati, Omukama abĩrĩlũbũka kwenene, kandi abiribulukira Sĩmonĩ.

³⁵ Neryo ababiri abo mobakanĩryabo ebyabere omo nzira, kandi ngoko bamuminyerera akatsũtsanga obundu.

Yesu akabutukira abiga buwe

³⁶ Neryo omugulu babya bakabwirabo emyatsi eyĩ, Yesu ĩyowene mwahangana omo katĩkatĩ kabo, mwabwirabo ati, Obuholo bubye nenyũ!

³⁷ Nĩkwa mobasĩsĩra, mobubaha, mobaganĩrya bati bamalangira kĩrĩmũ.

³⁸ Nĩkwa mwabũlyabo ati, Busana nakĩ mũkahahũkaya emitima kwehĩ? Kandi busana nakĩ mukatika-tika omo mitima yenyũ kwehĩ?

³⁹ Mulangire ebyala byage nʼebisando byage, kwʼindi ĩnĩna ngye. Mũnyĩtũleko mulangire, kusangwa ekĩrĩmũ sikiwite omũnyokũ nʼamakũha ngoko mukalangira inyinawitebyo.

⁴⁰ Neryo abere abĩbũga ebĩ, mwakangyabo ebyala biwe nʼebisando biwe.

⁴¹ Neryo omugulu babya bakine bũtĩkĩrĩrya busana nʼobutseme nʼerisweka, Yesu mwabũga nabo ati, Munawite ekyʼerirya hano kwehĩ?

⁴² Nabo mobamuha ekitswe kyʼerĩhere ekĩhũkĩre.

⁴³ Yesu mwĩmyalyo, mwalyalyo embere syabo.

⁴⁴ Neryo Yesu mwabwirabo ati, Ebĩ bye bĩnywa nababwira nyikine haguma nenyũ; emyatsi yosĩ eyasakawa busana nage omo Migambo ya Musa nʼebitabu byʼabamĩnyererĩ nʼomo Syonyimbo, yabya itolere iyabererera.

⁴⁵ Neryo mwalĩbũla amalengekanĩa wabo eriminya Amasako.

⁴⁶ Kandi Yesu mwabwirabo ati, Kĩsakĩre kiti, Kristo atolere eriagalwa nʼerĩlũbũka enyũma wʼebiro bisatu.

⁴⁷ Kandi kiti, Omo lĩna liwe omwatsi wʼeribindula omutima nʼerireka ebibi, nʼeribuyira lyʼebibi litolere ĩbyatũlaganĩbwa oko bihanda byosĩ, erĩtsũka eYerũsalema.

⁴⁸ Ĩnywe muli abalangĩrĩ bʼemyatsi eyĩ.

⁴⁹ Neryo mũlebaye, ngabatumira erilaga lya Tata wage; nĩkwa mulinde omo mũyĩ erĩhĩka aho obũtokĩ bũkalũa endata, bwasyabandagalirako.

Yesu akatwalawa elubula

⁵⁰ Neryo mwasondolabo eyĩhya oko mũyĩ erĩhĩka eBetanĩa, neryo mwasumbira ebyala biwe byʼendata nʼeritsumulabo.

⁵¹ Neryo abere akatsumulabo mwayigabula kubo mwatwalwa elubula.

⁵² Neryo mobamũramya mobasuba eYerũsalema nʼobutseme bunene.

⁵³ Kandi mobasiba omugulu gosĩ omo Hekalũ nʼeripipa Nyamuhanga.