Luka 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu embere sya Pilato

¹ Neryo endeko yosĩ eyo moyahangana mobatwala Yesu embere sya Pilato.

² Neryo mobatsũka erĩhandĩkĩrĩrya Yesu bati, Motweya omundu oyũ ĩnĩakatalaya ekihanda kyetu, nʼeritukaga erisolera Kaĩsarĩ. Kandi akabũga ati iye ni Kristo yo mwami.

³ Pilato mwamũbũlya ati, Uli mwami wʼAbayũda kwehĩ? Yesu mwamũsũbĩrya ati, Wamabũgakyo.

⁴ Neryo Pilato mwabwira abahererĩ bakulu nʼesyondeko ati, Sinditabana oko mundu oyũ ko musango.

⁵ Nĩkwa mobahatikana kutsibu bati, Akakola-kolaya bandu, ĩnĩakakangĩrĩraya eYũdea hosĩ, erĩtsũka eGalĩlaya erĩhĩka nʼeno.

Yesu embere sya Herode

⁶ Nĩkwa Pilato abere owa ekĩ, mwabũlya Yesu nga ni Munya Galĩlaya.

⁷ Neryo abere abiminya ko Yesu abya wʼehamũlĩ ya Herode, mwamutuma uku Herode, kusangwa Herode abya eYerũsalema omo biro ebyo.

⁸ Neryo Herode mwatsema kutsibu abere alangira Yesu; kusangwa erĩtsũka kera abya akasonda erimulolako, kandi kusangwa abya akowa engulu yiwe, kandi ĩnĩabĩrĩhĩra amaha wʼerilola oko kitiko-tiko ekyo akakola.

⁹ Neryo Herode mwabũlya Yesu emyatsi mingi, nĩkwa Yesu mwatamũsũbĩryakĩ.

¹⁰ Nʼabahererĩ bakulu nʼabakangĩrĩrya bʼEmigambo babya bimeneho bakahandĩkĩrĩrya Yesu yo kutsibu.

¹¹ Neryo Herode nʼabasĩrĩkanĩ buwe, mobasekererya Yesu nʼerimupona. Neryo mobambalya Yesu olukimba lũkangabasenĩe, mobamũsũbya eyiri Pilato.

¹² Oko kiro ekyo Herode na Pilato mobaswabya bwĩra oko bwĩra, kusangwa embere wʼaho ibali nʼobũyĩgũ omo katĩkatĩ kabo.

Pilato akalĩga ati Yesu ahole

¹³ Neryo Pilato mwabirikirira haguma abahererĩ bakulu, nʼabatabalĩ bʼabandu,

¹⁴ mwabwirabo ati, Mwamandetera omundu oyũ muti, akatalaya abandu. Nabĩrĩmũtondesya embere syenyũ, sinditamubana ko musango omo myatsi eyo mukamũhandĩkĩrĩraya.

¹⁵ Kandi Herode mwatamubana ko musango, kusangwa amamũsũbya ũkwʼĩtwe, neryo, lebaya, sialitakola mwatsi owatolere erĩĩtwa.

¹⁶ Neryo ngandimusuyira nʼerimubohola. [

¹⁷ Oko buli Biro Bikulu byʼErikiruka kyabya kitolere akabohola busana nabo omundu muguma wʼomũlĩkĩ.]

¹⁸ Nĩkwa endeko yosĩ moyabirikira haguma bati, Omundu oyo akwe, utoboholere Baraba!

¹⁹ Baraba abya oyo wagusawa omo mũlĩkĩ busana nʼobwanĩse omo mũyĩ na busana nʼerĩĩta abandu.

²⁰ Pilato abya anzĩre eribohola Yesu, neryo mwaswabũlya endeko eyo.

²¹ Nĩkwa mobabirikira kutsibu bati, Umubambe oko musalaba! Umubambe oko musalaba!

²² Neryo Pilato mwabũga nabo engendo yʼakasatu ati, Omundu oyũ abirikola kibi kyahi kwehĩ? Sinditabana omwatsi owangaleka ĩnĩakwa. Ngandimusuyira nʼerimubohola.

²³ Nĩkwa endeko moyahatikana nʼemirenge minene bati ĩtawe oko musalaba! Neryo emirenge yabo moyasĩnga.

²⁴ Neryo Pilato mwatwa omwatsi ati, ekyo bakabũlaya kikolawe.

²⁵ Neryo mwabohola omundu oyo basonda, oyo wagusawa omo mũlĩkĩ busana nʼobwanĩse nʼerĩĩta abandu, nĩkwa mwahererya Yesu yo kubo ati bakole ngoko banzĩre.

Bakabamba Yesu yʼoko musalaba

²⁶ Neryo babere bakatwala Yesu, mobahamba Sĩmonĩ wʼeKũrene oyo wabya akalũa omolĩ, neryo mobamũhekya omusalaba bati ahekego enyũma wa Yesu.

²⁷ Nʼendeko nene yʼabandu moyakwama Yesu, nʼabakalĩ abamulirirako nʼerĩmũsũsũmanira.

²⁸ Nĩkwa Yesu mwakeberabo ati, Ĩnywe bakalĩ bʼeYerũsalema! Simulire busana nage, nĩkwa mulire busana nenyũ nʼabana benyũ.

²⁹ Kusangwa ebiro byasyasa omugulu basyabũga bati, Obutseme buli oko bagumba, nʼesyonda esitalitaheka makule na kera, nʼamabere awatalibawako na kera!

³⁰ Neryo abandu basyatsũka erĩbũga nʼebitwa bati, Mututerereko! nʼoko hitwa, Mũtũbĩse!

³¹ Kusangwa emyatsi ngʼeyĩ yamakolwa oko muti mubisi, yasyabya yiti oko muti ogũmĩre kwehĩ?

³² Kandi mobahamba abandi babiri, abakola-nabi, erĩĩtabo haguma na Yesu.

³³ Neryo babere bahĩka aho ahakahulawa mo Aherĩhanga, mobabamba Yesu yʼoko musalaba nʼabakola-nabi abo, omuguma oko luhande lwʼamali, nʼogundi oko luhande lwʼamalembe.

³⁴ Nĩkwa Yesu mwabũga ati, Tata ubuyirebo kusangwa sĩbasĩ ekyo bakakola! Kandi mobakanga obukanga, erigaba esyongimba siwe omo katĩkatĩ kabo.

³⁵ Abandu nabo mobahanganaho bakasamalira. Nʼabatabalĩ nabo mobasekererya Yesu bati, Mwalamya abandi; naye ayĩlamaye amabya ini Kristo oyo wayisogawa na Nyamuhanga.

³⁶ Nʼabasĩrĩkanĩ mobamũsekererya, ĩbakamũhĩkako nʼerimuha epada,

³⁷ bati, Wamabya uli Mwami wʼAbayũda, ũyĩlamaye!

³⁸ Neryo endata oko musalaba habya hasakĩrwe amasako aya ati, OYO NI MWAMI WʼABAYŨDA.

³⁹ Kandi omuguma gʼoko bakola-nabi abahanikawaho mwatsuma Yesu ati, Suli Kristo kwehĩ? Ũyĩlamaye iwe netu!

⁴⁰ Nĩkwa ogundi mukola-nabi mwamũsũbĩrya, mwamukunga ati, Suliubaha Nyamuhanga kwehĩ? Kusangwa nawe uli kʼomusango owali ngʼoyũ.

⁴¹ Omusango wetu atunganene, kusangwa ĩtwe tukabana oluhembo olutolere emĩbĩrĩ yetu; nĩkwa omundu oyũ sialitakola ekibi.

⁴² Neryo mwabwira Yesu ati, Yesu unyibuke omugulu ukasa omo bwami bwawe!

⁴³ Neryo Yesu mwamubwira ati, Kwenene ngabũga nawe; mũnabwĩre Ukandibya haguma nage omo Paradĩso.

Oluholo lwa Yesu

⁴⁴ Neryo yabya nga saa ndatu, nʼomwĩrĩmya mwabya omo kihugo kyosĩ erĩhĩka oko saa mwenda.

⁴⁵ Neryo ekyakakala kyʼeryuba mokyabula; nʼolukimba olũkasũkũlĩraya olʼomo Hekalũ molwasatĩbwa mo bihande bibiri.

⁴⁶ Neryo Yesu mwabirikira nʼomulenge munene ati, Tata, ngahĩra ekĩrĩmũ kyage omo byala byawe! Neryo abere abĩbũga ebĩ, mwalekula.

⁴⁷ Nĩkwa omugulu omukulu wʼabasĩrĩkanĩ alangira emyatsi eyĩ, mwapipa Nyamuhanga ati, Kwenene omundu oyũ alwe mundu utunganene.

⁴⁸ Nʼesyondeko syosĩ esyahĩndana busana nʼerilangira ekitsibu ekĩ, babere babilangira emyatsi eyĩ mobasuba ewabo, ibanemuhumanga oko bĩkũba byabo.

⁴⁹ Nʼabosĩ ababya basĩ Yesu, nʼabakalĩ abamukwama bakalũa eGalĩlaya, mobahangana hali hake; bakalangira emyatsi eyĩ.

Eritabwa lya Yesu

⁵⁰ Nĩkwa habya omundu oyukahulawa mo Yosefũ wʼeArĩmatea, omũyĩ wʼAbayũda. Yosefũ abya mundu mubuya, nʼoyutunganene ini mundu wʼomwʼĩbũgĩro.

⁵¹ Iye mwatalĩga embĩta yabo nʼerikola lyabo. Kandi abya akalinda obwami bwa Nyamuhanga.

⁵² Yosefũ oyũ mwaya uku Pilato, mwamusaba omubiri wa Yesu.

⁵³ Neryo mwakĩmya omubiri wa Yesu, mwamũlĩngĩrako olukimba lwʼekĩtanĩ, neryo mwamũhĩra omwʼisinda eyabatsawa omwʼĩbwe, eyite yatatabwamo mundu.

⁵⁴ Ekyo kyabya kiro yʼErĩkokotya, nʼeSabato yabya ikasonda erikya.

⁵⁵ Nĩkwa abakalĩ abasa na Yesu bakalũa eGalĩlaya mobakwama Yosefũ, mobalangira eyisinda, kandi mobalangira ngoko mubiri wa Yesu ahĩrawamo.

⁵⁶ Neryo abakalĩ abo mobasuba eka mobakokotya amanũkato nʼamagũta awakakumba ndeke busana nʼomubiri wuwe. Nʼoko Sabato mobaluhuka ngʼEmigambo ko yikahana.