Luka 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Oluhota lwʼerĩĩta Yesu

¹ Neryo omugulu wʼEbiro Bikulu byʼerirya Obundu Obute mo Kĩhamya, ebikahulawa mwʼIkiruka, byabya hakũhĩ.

² Neryo abahererĩ bakulu nʼabakangĩrĩrya bʼEmigambo babya bakasonda-sonda enzira yʼerĩĩta Yesu; kusangwa babya bakubaha abandu.

Yũda akasonda erihotera Yesu

³ Neryo Satanĩ nayo moyingira umu Yũda; oyukahulawa mo Ĩskarĩota, oyo waganzirawa okwʼĩkũmĩ nʼababiri.

⁴ Neryo Yũda mwayakanĩa nʼabahererĩ bakulu nʼabakulu nʼababateya bʼeHekalũ ngoko angahotera Yesu kubo.

⁵ Nabo mobatsema, mobalĩga erimuha esyofranka.

⁶ Neryo Yũda mwalagana nabo, mwasonda-sonda omwanya wʼerihotera Yesu yo kubo ahate ndeko.

Erĩkokotya erirya lyʼErikiruka

⁷ Neryo Ebiro Bikulu byʼerirya Obundu Obute mo Kĩhamya mobyahĩka. Oko kiro ekyo ĩbakasĩnza ehyana hyʼembũlĩ busana nʼErikiruka.

⁸ Neryo Yesu mwatuma Petero na Yoane ati, Mugende, mũtũkokoteraye Erikiruka tulyeryo.

⁹ Neryo mobamũbũlya bati, Ukasonda tũkokoterayeryo hahi kwehĩ?

¹⁰ Naye mwabwirabo ati, Lebaya omugulu mukandingira omo mũyĩ, omundu oyũhekĩre erĩrega lyʼamagetsi akandĩhĩndana nenyũ. Mumukwame omo nyũmba eyo akandingiramo.

¹¹ Neryo mukandibwira Omwenye nyũmba muti, Omũkangĩrĩrya akakũbũlaya ati, Ekyumba kyʼabagenĩ kiri hahi aho nasyalira Erikiruka haguma nʼabiga bage kwehĩ?

¹² Naye akandĩbakangya ekyumba kinene kyʼendata, ekĩtegekanĩbwe; eyo yo mũkokoterayeryo.

¹³ Neryo mobayayo mobeya ebyosĩ ngoko Yesu aliabwirabo, neryo mobakokotya erirya lyʼErikiruka.

Erirya lyʼomukama

¹⁴ Neryo endambĩ yabere yabĩhĩka, Yesu mwĩkala oko mesa haguma nʼabakwenda.

¹⁵ Neryo Yesu mwabwirabo ati, Nabirisonda kutsibu-tsibu erirya Erikiruka erĩ haguma nenyũ nde nagalwa!

¹⁶ Kusangwa ngababwira nyiti, Sindiendisyaswalyalyo erĩhĩka aho lyasyabererera omo Bwami bwa Nyamuhanga.

¹⁷ Neryo Yesu mwĩmya olũtehĩ, abere abiha ewasĩngya uku Nyamuhanga, ati, Mwĩmaye olũtehĩ mugabelo omo katĩkatĩ kenyũ.

¹⁸ Ngababwira nyiti, Sindiendisyaswapũlya ebĩnyũ erĩhĩka aho Bwami bwa Nyamuhanga bwasyasira.

¹⁹ Neryo mwĩmya obundu, mwaha ewasĩngya uku Nyamuhanga, mwatsũtsangabo, mwahabobo, ati, Oyũ ni mubiri wage owakahabawa busana nenyũ. Mukole mutya erinyibuka.

²⁰ Kandi Yesu mwĩmya olũtehĩ atya enyũma babirya, ati, Olũtehĩ olũ ni ʼlagana lihya-lihya omo musasi wage, owakũtawa busana nenyũ.

²¹ Nĩkwa mũlebaye! Oyukanyihotera ali haguma nage oko mesa ko hano.

²² Kusangwa kwenene Omugala wʼOmundu akandisyahola ngoko Nyamuhanga abirisoha; nĩkwa obũlĩge oko mundu oyukamuholera!

²³ Neryo mobatsũka erĩbũlanĩa omo katĩkatĩ kabo oyo wasyakola omwatsi oyo nga nindi.

Obuhaka bwʼobukulu

²⁴ Neryo obuhaka mobwahuluka omo katĩkatĩ kʼabiga nga nindi yo wasyahulwa mo mukulu.

²⁵ Neryo Yesu mwabwirabo ati, Abami bʼekihugo kino bakatabalira abandu babo; nʼabawite ehamũlĩ kubo bakahulawa mo Bĩra bʼAbandu.

²⁶ Nĩkwa ko bite bitya omo katĩkatĩ kenyũ; nĩkwa omukulu omo katĩkatĩ kenyũ abye ngʼomulere, nʼomũsondolĩ abye ngʼomugombe.

²⁷ Nindi yo mukulu, oyo wĩkere okwʼirya, kutse oyukamukolera kwehĩ? Si yoyo wĩkere oko mesa kwehĩ? Nĩkwa ĩngye indi omo katĩkatĩ kenyũ ngʼoyukakolera abandi.

²⁸ Ĩnywe muli ababirinyihanganira omwʼirengwako lyage.

²⁹ Kandi ngoko Tata wage abirimba obwami, nage ngabaha

³⁰ erirya nʼerĩpũlya oko mesa yage omo bwami bwage. Mwasyĩkala oko bĩtũmbĩ byʼobwami eritswera ebihanda ĩkũmĩ nʼebibiri bya Ĩsraelĩ.

Yesu akaminyerera eriyigana lya Petero

³¹ Sĩmonĩ! Sĩmonĩ! Lebaya! Satanĩ yabĩrĩbũlya ehamũlĩ eribayungira ngʼengano.

³² Nĩkwa ĩngye nabirikusabira, uwe Sĩmonĩ, erĩkĩrĩrya lyawe sĩryũmbaye. Kandi wamaswabinduka, uhane abagala benyũ.

³³ Neryo Petero mwamubwira ati, Mukama, nyĩsĩkĩre erigenda nawe omo mũlĩkĩ, nʼomwʼihola.

³⁴ Yesu mwamũsũbĩrya ati, Petero, ngakubwira nyiti, Mũnabwĩre engoko-lume siyendibika ute wanyigana ngendo ĩsatu ko ũtanyasĩ.

Erĩtũsĩ, nʼengunza, nʼomũyalĩ

³⁵ Neryo Yesu mwabwirabo ati, Omugulu nabatuma butsira ĩtũsĩ, kutse ngunza, kutse ngendero, momwabula kindu kwehĩ? Mobamũsũbĩrya bati, Iyihi nʼahake.

³⁶ Neryo Yesu mwabwirabo ati, Nĩkwa lino oyuwite erĩtũsĩ nʼengunza, ahekebyo. Nʼoyutawite mũyalĩ, agũlaye ekanzu yiwe, agule omũyalĩ.

³⁷ Kusangwa ngababwira nyiti ekĩsakĩre kitolere ikyabererera busana nage kiti, Aganzawa haguma nʼabakola-nabi. Kusangwa ekikanyahula kikabererera.

³⁸ Neryo abiga mobabũga bati, Lebaya! Mukama, hano hali mĩyalĩ ĩbĩrĩ! Yesu mwasũbĩryabo ati, Ebyo bitolere!

Erisaba lyʼeGetesemane

³⁹ Neryo Yesu mwalũaho mwaya oko Kitwa kyʼeMĩzeĩtũnĩ ngoko anabya akakola; nʼabiga mobamukwama.

⁴⁰ Neryo abere ahĩkaho, Yesu mwabwirabo ati, Musabe isimwingira omwʼirengwako.

⁴¹ Neryo mwalũaho mwatambukira aho lutambi kubo, mwakũkama, mwasaba

⁴² ati, Tata, wamanza Ũnyĩlũsaye kwʼolũtehĩ olũ. Nĩkwa erisonda lyawe, butsira eryage lyo likolawe.

⁴³ Neryo omũlaĩka oyũkalũa elubula, mwamubutukirako, mwamuha amaka.

⁴⁴ Neryo mwasaba kutsibu iniakagalawa, nʼolũnza luwe lwabya ngʼamatondĩ wʼomusasi awakatogongera ahisi oko kitaka.

⁴⁵ Neryo omugulu ahangana okwʼisaba liwe, mwahĩka oko biga buwe, mweyabo ibaneto busana nʼobũlĩge.

⁴⁶ Neryo mwabwirabo ati, Busana nakĩ mukayato kwehĩ? Muhangane, musabe isimwingira omwʼirengwako.

Yesu akahoterawa

⁴⁷ Omugulu abya akĩnabũga nabo, endeko moyasa, nʼoyukahulawa mo Yũda, omuguma gʼoko biga erĩkũmĩ nʼababiri, mwasondola endeko eyo. Neryo mwahĩka uku Yesu busana nʼerimulyatsirira.

⁴⁸ Nĩkwa Yesu mwabũga naye ati, Yũda, ukahotera Omugala wʼOmundu omwʼimulyatsirira kwehĩ?

⁴⁹ Neryo abiga ababya haguma na Yesu babere balangira ebikandibya, mobabũlya Yesu bati, Mukama, tubandangebo omo mũyalĩ kwehĩ?

⁵⁰ Nʼomuguma gʼoko biga mwabanda omugombe wʼomũhererĩ mukulu oko bahererĩ bosĩ, mwatwa okũtũ kuwe kwʼamali.

⁵¹ Nĩkwa Yesu mwasũbĩrya ati, Uleke! Mũmbaye! Neryo mwatũla oko kũtũ kwʼomundu oyo mwamũlamya.

⁵² Nĩkwa Yesu mwabwira abahererĩ bakulu nʼabakulu bʼeHekalũ nʼabakulu abayamubambira ati, Mukasa nʼemĩyalĩ nʼemĩgo nga mukabambira omũnyeyĩ kwehĩ?

⁵³ Omugulu nabya haguma nenyũ obuli kiro omo Hekalũ, momutalenga erinyihamba, nĩkwa endambĩ eno nĩ yenyũ nʼeyʼobũtokĩ bʼomwĩrĩmya.

Petero akagana Yesu

⁵⁴ Neryo mobahamba Yesu, mobamutwala nʼerimuleta omo nyũmba yʼomũhererĩ mukulu oko bahererĩ bosĩ. Nĩkwa Petero mwakwamabo ĩnĩanayĩsũnĩre.

⁵⁵ Neryo mobakya omuliro omo katĩkatĩ kʼomuhana, neryo Petero mwĩkala omo katĩkatĩ kabo.

⁵⁶ Nĩkwa omwanamuto mugombe muguma, mwamulolako ĩnĩanĩkere okwʼĩsĩngo, neryo mwamulangira ndeke mwabũga ati, Omundu oyũ abya haguma naye nibya!

⁵⁷ Nĩkwa Petero mwagana ati, Mũkalĩ, sĩnyĩmwasĩ!

⁵⁸ Nʼoko kandi katambĩ ogundi mundu mwalangira Petero, neryo mwabũga ati, Nawe uli muguma wa kubo nibya. Nĩkwa Petero mwamũsũbĩrya ati, Tahi, sĩ ĩngye!

⁵⁹ Kandi enyũma wʼaho ngʼesaa nguma, ogundi mundu mwahatikana ati, Kwenene omundu oyũ abya haguma naye, kusangwa naye ni Mũgalĩlaya nibya.

⁶⁰ Nĩkwa Petero mwabũga ati, Sĩnyasĩ ebyo ũkabũga tahi! Neryo-neryo akĩnabũga engokolume moyabika.

⁶¹ Neryo Omukama mwakeba mwatungerera Petero. Neryo Petero mwibuka ekĩnywa kyʼomukama ngoko amubwira ati, Mũnabwĩre, engoko-lume ite yabika, ukandinyigana ngendo ĩsatu.

⁶² Neryo Petero mwahulukira eyĩhya, mwalira nʼobũlĩge!

Abandu bakasĩnĩngũlĩra Yesu nʼerĩmũswĩrya

⁶³ Neryo abandu ababya bakateya Yesu mobamũsekererya nʼerĩmũswĩrya.

⁶⁴ Kandi mobaswika ameso wa Yesu mobamũbũlya bati, Uminyerere! Nindi yo wamakũswĩrya kwehĩ?

⁶⁵ Kandi mobamubwira eyindi myatsi mingi bakamutsuma.

Yesu embere wʼerĩbũgĩro

⁶⁶ Neryo bwabere bwakya, erĩbũgĩro lyʼabakulu bʼabandu molyahĩndana, abahererĩ bakulu nʼabakangĩrĩrya bʼEmigambo, neryo mobatwala Yesu omo nyũmba yabo yʼerĩbũgĩro, bati,

⁶⁷ Utubwire, uli Kristo kwehĩ? Nĩkwa mwabwirabo ati, Namababwira isimwendinyĩkĩrĩrya.

⁶⁸ Kandi, namababũlya mwatsi, isimwendĩnyĩsũbĩrya.

⁶⁹ Nĩkwa erĩtsũka lino Omugala wʼOmundu asyĩkalĩbwa oko luhande lwʼamali lwa Nyamuhanga wʼobũtokĩ bosĩ.

⁷⁰ Neryo abosĩ mobabũga bati, Uli Mugala wa Nyamuhanga kwehĩ? Yesu mwabwirabo ati, Ĩnywe mũkabũga kwʼali ĩnĩna ngye.

⁷¹ Nabo mobabũga bati, Tukine nʼobwaga bwʼabalangĩrĩ kwehĩ? Ĩtwe twabĩrĩowa ebĩnywa biwe.