Luka 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Ehamũlĩ ya Yesu

¹ Neryo kiro kiguma, omugulu Yesu abya omo Hekalũ akakangĩrĩrya abandu, nʼerĩtũla Engulu Yowene, abahererĩ bakulu nʼabakangĩrĩrya bʼEmigambo, nʼabakulu, mobamũhĩkako,

² ibakamubwira bati, Utubwire ngʼukakola emyatsi eyĩ nʼehamũlĩ yahi, kandi nindi yo wakuha ehamũlĩ eyĩ kwehĩ?

³ Yesu mwasũbĩryabo ati, Nage ngandĩbabũlya omwatsi nenyũ ĩmwanyĩsũbĩrya,

⁴ Erĩbatĩsya lya Yoane lyalũa elubula kutse lyalũa oko bandu kwehĩ?

⁵ Nabo mobakanĩrya haguma bati, Twamabũga tuti, Lyalũa elubula, akandĩbũga ati, Busana nakĩ sĩmwetĩkĩrĩrya Yoane kwehĩ?

⁶ Nĩkwa twamabũga tuti, Lyalũa oko bandu, abandu bosĩ ĩbakandĩtwĩta omo mabwe, kusangwa babiriganza bati Yoane abya mũmĩnyererĩ.

⁷ Neryo mobasũbĩrya bati, Sĩtwasĩ eyo lyalũa.

⁸ Neryo Yesu mwabwirabo ati, Nage sindiendibabwira nga nĩ hamũlĩ yahi ikaleka inakola emyatsi eyĩ.

Omũsyo wʼabalĩmĩ babi

⁹ Neryo Yesu mwatwĩra abandu bʼomũsyo oyũ ati, Omundu mwahera eririma lyʼebĩnyũ, neryo mwahĩramo abalĩmĩ, neryo mwaya oko lugendo omo kindi kihugo.

¹⁰ Neryo omugulu wʼeriera lyʼebĩnyũ mwatuma omugombe oko balĩmĩ abo, atoke eribana oko bĩgũma byʼeririma lyʼebĩnyũ; nĩkwa abalĩmĩ abo mobamũswĩrya nʼerĩmũsũbũlya byala bisa.

¹¹ Neryo mwatuma ogundi mugombe; nĩkwa abalĩmĩ abo mobamũswĩrya nibya nʼerimuhemula, mobamuhiga, naye mwasubula byala bisa.

¹² Kandi mwatuma omugombe wʼakasatu. Neryo abalĩmĩ mobamũhũtangalya, mobamuhiga.

¹³ Neryo Omwenye eririma lyʼebĩnyũ mwabũga ati, Nasyakolakĩ kwehĩ? Nasyatuma mugala wage mwanze; mbino yo basyakenga.

¹⁴ Nĩkwa omugulu abalĩmĩ bamulangira mobakanĩranĩa bati, Oyũ ni mugala wʼomwenye eririma. Tũmwĩte, neryo eririma lyasyabya lyetu.

¹⁵ Neryo mobamukurira eyĩhya wʼeririma lyʼebĩnyũ, mobamwĩta. Neryo Omwenye eririma lyʼebĩnyũ eryo asyayirabo ati kwehĩ?

¹⁶ Asyasa, asyaherya abalĩmĩ abo, asyaha eririma lyʼebĩnyũ eryo oko bandi balĩmĩ. Neryo abandu babere bowa ebĩnywa ebĩ, mobabũga bati, Iyihi, nʼahake.

¹⁷ Neryo Yesu mwasamalirabo ati, Nĩkwa ekyasakawa ekĩ nĩkĩ kwehĩ? kiti, Erĩbwe eryo abahĩmbĩ bagana, Lyo lyabere erĩbwe ryʼesondo.

¹⁸ Nʼoyo wasyatererwako nʼerĩbwe erĩ, asyabũnangĩka mo bitswe-bitswe; nĩkwa erĩbwe eryo lyamatogera oko mundu, lyasyamũbũnzũngũla mo lũtũtũ.

Omwatsi wʼerisola

¹⁹ Neryo abakangĩrĩrya bʼEmigambo nʼabahererĩ bakulu mobasonda-sonda erihamba Yesu oko ndambĩ eyo, kusangwa mobaminya kwʼatwa omũsyo oyo busana nabo; nĩkwa mobubaha abandu.

²⁰ Neryo mobamũteya. Kandi mobatuma abalĩngĩ abayĩhambũlaya bati ni bandu batunganene, ibatoka erimutega omo bĩnywa biwe nʼerimuhotera oko hamũlĩ nʼobũtokĩ bwʼomũtabalĩ.

²¹ Abalĩngĩ aba mobabwira Yesu bati, Mũkangĩrĩrya, tũnasĩ ũkabũga nʼerĩkangĩrĩrya ekyʼekwenene. Kandi sulisombola ebitaga nʼebite bitaga nĩkwa ũkakangĩrĩraya enzira ya Nyamuhanga omo kwenene.

²² Emigambo ĩkatũlĩgĩra erisolera Kaĩsarĩ kutse iyihi kwehĩ?

²³ Nĩkwa Yesu mwaminya amatebo wabo, neryo mwabwirabo ati,

²⁴ Mũnyĩkangaye edĩnarĩ. Ekĩsosekanĩo nʼamasako aya ni byandi kwehĩ? Nabo mobabũga bati, Ni bya Kaĩsarĩ.

²⁵ Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga.

²⁶ Nabo mobataluka erimutega omo mwatsi embere syʼabandu. Nĩkwa mobabya bũkũtũ ibakaswekera erĩsũbĩrya liwe.

Omwatsi wʼerĩlũbũka oko baholĩ

²⁷ Neryo abandi bʼoko Basadũkayo mobahĩka uku Yesu. Aba ni bandu bakabũga bati sihali erĩlũbũka oko baholĩ.

²⁸ Mobamũbũlya bati, Mũkangĩrĩrya, Musa mwatusakira ati, Omugala wabo mundu amahola akasĩganĩa omũkalĩ wuwe, atawite mwana; mugala wabo mundu oyo asyĩmya omũkalĩ oyo iniabutira mugala wabo yʼabana.

²⁹ Nĩkwa habya bagala babo balinda; owʼerĩmbere mwahĩkya, neryo mwahola isialitabuta mwana.

³⁰ Neryo owʼakabiri mwĩmya omũkalĩ oyo.

³¹ Neryo owʼakasatu mwakola atya; neryo abagala babo bosĩ balinda mobahola batya isibetabuta mwana.

³² Neryo enyũma wʼabosĩ omũkalĩ oyo naye mwahola.

³³ Neryo oko kiro kyʼerĩlũbũka, omũkalĩ oyo asyabya wandi kwehĩ? Kusangwa abalinda bosĩ babya ĩbabĩrĩmwĩmya.

³⁴ Neryo Yesu mwabwirabo ati, Abalume nʼabakalĩ bʼomugulu ono bakaherũkanaya.

³⁵ Nĩkwa abalume nʼabakalĩ abakaganzawa nga batolere erĩhĩka oko mugulu oyo, nʼerĩlũbũka oko baholĩ, sĩbeherũkanaya.

³⁶ Kusangwa sibetoka eriswahola, kandi balingene nʼabamalaĩka. Ni bagala ba Nyamuhanga kusangwa babĩrĩlũbũkĩbwa oko baholĩ.

³⁷ Nĩkwa Musa mwakanganĩa kwʼabaholĩ bakalũbũkĩbawa. Omo masako awakahula ekisaka ekyaka, akahula Omukama, mo Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo.

³⁸ Neryo iye si Nyamuhanga wʼabaholĩ, nĩkwa ni Nyamuhanga wʼabaliho busana naye.

³⁹ Neryo abandi bʼoko Bafarĩsayo mobamũsũbĩrya bati, Mũkangĩrĩrya, wamasĩngana! Neryo abandi bakangĩrĩrya bʼEmigambo mobasũbĩrya bati, Mũkangĩrĩrya, wabĩrĩbũga ndeke.

⁴⁰ Neryo mohataswabya mundu oyo wangalenga erĩswabũlya Yesu eyindi myatsi.

Erĩbũlya omwatsi wa Kristo

⁴¹ Neryo Yesu mwabũga nabo ati, Bakabũga batĩkĩ, bati, Kristo ni mugala wa Dawĩdĩ kwehĩ?

⁴² Kusangwa Dawĩdĩ akabũga omo kitabu kyʼesyonyimbo ati, Omukama akabwira Omukama wage ati, Wĩkale oko byala byage byʼamali,

⁴³ Erĩhĩka aho nasyahĩrĩra esyonzĩgũ syawe Omwisi wʼebisando byawe.

⁴⁴ Dawĩdĩ mwamwahula mo Mukama, neryo Kristo angatoka eribya mugala wa Dawĩdĩ ati kwehĩ?

Yesu akakunga busana nʼabakangĩrĩrya bʼEmigambo

⁴⁵ Neryo omugulu endeko yosĩ yabya ikahulikirira uku Yesu, Yesu mwabũga nʼabiga buwe ati,

⁴⁶ Mũyĩtegaye busana nʼabakangĩrĩrya bʼEmigambo abanzĩre erirendera ibanambite esyokanzu syabo nyiri-nyiri, ĩbanzĩre erĩkerĩbwa omo hitale, ibakayisoga ebĩtũmbĩ byʼembere omo manyũmba wʼerĩhĩndanamo, nʼahʼerĩsĩkĩbwa omwʼirya ĩnene.

⁴⁷ Kandi bakanũbaya abakwakalĩ nʼerinyega amanyũmba wabo, neryo busana nʼerilolwako bakasaba erisaba liri-liri! Aba basyasuyirwa kutsibu kwʼaho.