Luka 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Embũlĩ eyatala

¹ Neryo abasolesya bosĩ nʼabakolanabi mobahĩka hakũhĩ na Yesu erĩmowa.

² Neryo Abafarĩsayo nʼabakangĩrĩrya bʼEmigambo mobayikuna bati, Omundu oyũ akakokaya abakola-nabi nʼerirya haguma nabo.

³ Kyaleka Yesu ĩnĩatwĩrabo omũsyo oyũ ati,

⁴ Omundu ũkwʼĩnywe amabya awite esyombũlĩ ĩgana, amatalya enguma, akakolakĩ, kwehĩ? Akasĩganaya esyombũlĩ amakũmĩ mwenda nʼomwenda omo mbwarara, akayakwamirira embũlĩ eyitere erĩhĩka aho asyabanirayo.

⁵ Omugulu akabanayo, akatsema, ĩnĩahĩrayo oko bitigo biwe,

⁶ nʼeritwalayo eka wuwe. Neryo akabirikira bĩra buwe nʼabalĩkyabo haguma, iniabwirabo ati, Mutseme haguma nage, kusangwa namabana embũlĩ yage eyĩlwe yitere!

⁷ Ngababwira nyiti, Litya obutseme bunene bwasyabya elubula busana nʼomukola-nabi muguma oyukabindula omutima nʼerireka ebibi kwilaba obutseme busana nʼabandu batunganene amakũmĩ mwenda nʼomwenda abate nʼobwaga bwʼeribindula emitima nʼerireka ebibi.

Esyofranka esyatala

⁸ Kutse omũkalĩ oyuwite esyofranka ĩkũmĩ amatalya oluguma, akakolakĩ kwehĩ? Akakaya etala, nʼerĩbĩrya enyũmba yiwe, nʼerikwesa ndeke erĩhĩka aho akandibaniralo.

⁹ Omugulu akabanalo, akabirikira abĩra buwe nʼabalĩkyabo ati, Mutseme haguma nage, kusangwa nabiribana olufranka olo natalaya!

¹⁰ Ngababwira nyiti litya hali obutseme haguma nʼabamalaĩka ba Nyamuhanga busana nʼomukola-nabi muguma oyukabindula omutima nʼerireka ebibi.

Omwana oyo watala

¹¹ Kandi Yesu mwabũga ati, Habya omundu oyuwite abagala babiri.

¹² Omulere mwabwira tata wuwe ati, Tata, gumbe erĩgabo lyʼebindu ebikandisyabya byage. Neryo ĩse wabo mwagabirabo ebindu biwe.

¹³ Neryo enyũma wʼebindi biro, omwana mulere oyo mwasengasenga ebyosĩ abya awite, mwaya omo kihugo mo hali, nʼeyo mwapanza-panza ebindu biwe omo migendere mityamitya.

¹⁴ Kandi omugulu atalaya ebyosĩ, neryo enzala nene moyahĩka omo kihugo ekyo. Neryo omwana oyo mwatsũka eribya nʼobwaga.

¹⁵ Neryo mwayabungira ahali omundu wʼekihugo ekyo, nʼomundu oyo mwamutuma omwʼirima liwe erĩrĩsya esyongulube.

¹⁶ Neryo mwasonda erĩũgũta oko bisugu ebyo esyongulube syabya sikalya, kandi sihabya mundu Ukamuha kindu.

¹⁷ Nĩkwa abere ibuka, mwabũga ati, Abagombe ba tata wage ni bangi abawite akalyo akatolere, nʼakandi kakasaka, nĩkwa ĩngye ngaholera eno nʼenzala!

¹⁸ Ngandihongoka eriya eyiri tata wage nʼerimubwira nyiti, Tata, nabĩrĩhalya embere sya Nyamuhanga nʼembere syawe.

¹⁹ Sinyikitolere eriahulwa mo mwana wawe; unyiyire ngʼomuguma gʼoko bagombe bawe.

²⁰ Neryo mwahongoka mwaya eyiri tata wuwe. Nĩkwa omugulu abya akine ekyaswa, ĩse wuwe mwamulangira, neryo omutima wuwe mwamuganyira, neryo mwatibita eyo ali, mwamubagalira, mwamulyatsirira.

²¹ Neryo omwana oyo mwabũga ati, Tata, nabĩrĩhalya embere sya Nyamuhanga nʼembere syawe; sinyikitolere eriahulwa mo mwana wawe.

²² Nĩkwa ĩse wuwe mwabwira abagombe buwe ati, Mulete lũba ekanzu eyowene eyĩlabĩre esindi, mũmwambalayeyo, kandi mũhĩre embũka yʼoko munwe wuwe, nʼesyongendero oko bisando biwe.

²³ Neryo mulete ekyana kyʼende ekĩnenehĩre; mũsĩnzekyo, tulye, tutsange!

²⁴ Kusangwa omwana wage ono abya aholĩre, lino aneho; abya ĩnĩaherĩre, neryo lino abiribanika. Neryo mobatsũka eritsema.

²⁵ Nĩkwa omwana wuwe akambere, kabya omwʼirima. Omugulu asa, abere ahĩka hakũhi nʼenyũmba, mowa esyonanga nʼerisata.

²⁶ Neryo mwabirikira omuguma gʼoko bagombe, mwabũlya ebyabere.

²⁷ Naye mwamubwira ati, Mugala wenyũ abĩrĩhĩka, na tata wawe abĩrĩsĩnza ekyana kyʼende ekĩnenehĩre, kusangwa abĩrĩmũkokya nʼobuholo ĩnĩanakalĩre.

²⁸ Nĩkwa mugala wabo oyo mwahitana, mwagana eriya omo nyũmba. Neryo ĩse wuwe mwahuluka mwamulemba-lemba ati ayemo.

²⁹ Nĩkwa mwasũbĩrya ĩse wuwe ati, Lebaya, nabirikukolera emyaka mingi isindinatagana erihana lyawe. Nĩkwa sulitamba nʼakahene nʼakaguma inatoka eritsanga haguma nʼabĩra bage.

³⁰ Nĩkwa omwana wawe oyũ amabya ahĩka, oyo wabuga ebindu byawe haguma nʼabaragane, wabĩrĩmũsĩnzĩra ekyana kyʼende ekĩnenehĩre!

³¹ Neryo tata wuwe mwamubwira ati, Mwana wage, uli haguma nage ebiro byosĩ, nʼebyosĩ ngwite ni byawe.

³² Nĩkwa lĩwe litolere itwalya nʼeritsema, kusangwa mugala wenyũ oyũ abya aholĩre na lino aneho, kandi abya ĩnĩaherĩre, neryo lino abiribanika.