Luka 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akalamaya Omũkonĩ

¹ Oko kiro kiguma kyʼeSabato Yesu mwayalira omo nyũmba yʼomukulu muguma wʼAbafarĩsayo; nʼabandu babya bakalebya Yesu yo kutsibu.

² Nʼeyo, hakũhĩ naye habya omundu oyũkwĩre akabunda.

³ Neryo Yesu mwabũlya abakangĩrĩrya bʼEmigambo nʼAbafarĩsayo; ati, Linatolere omo Migambo erĩlamya oko kiro kyʼeSabato kutse iyihi kwehĩ?

⁴ Nĩkwa mobahuna. Neryo Yesu mwahamba omundu oyo, mwamũlamya, mwamũkwamanĩsya.

⁵ Neryo mwabwirabo ati, Nindi kwĩnywe oyuwite mugala kutse ende eyabiritogera omo kyũna kyʼamagetsi oko kiro kyʼeSabato, ĩsĩendĩlũsyayo omo kyũna ekyo neryo-neryo, oko kiro kyʼeSabato kwehĩ?

⁶ Nĩkwa mobatatoka erĩmũsũbĩrya umwʼekyo.

Ebĩtũmbĩ byʼabagenĩ

⁷ Kandi Yesu mwalangira ngoko abagenĩ babya bakayisoga ebĩtũmbĩ bibuya byʼerĩsĩkĩbwa oko mesa, neryo mwagusa omũsyo oyũ ati,

⁸ Omugulu omundu akakubirikira okwʼirya lyʼerĩherũkya, sĩwĩkale oko kĩtũmbĩ kyʼerĩsĩkĩbwa. Kwamũhwa ogundi mundu omukulu kuwe abiribirikirwa,

⁹ nʼoyo wababirikira ĩnywe babiri ĩnĩahĩka akakubwira ati, Ũsĩgĩre omundu oyũ yʼomwanya oyo. Neryo iwahemuka ĩwayĩkala omo kĩtũmbĩ kyʼenyũma-nyũma.

¹⁰ Nĩkwa omugulu ukabirikirawa, ugende Wĩkale oko kĩtũmbĩ kyʼenyũma-nyũma, neryo oyũkakũkokaya ĩnĩahĩkaho iniakubwira ati, Mwĩra wage, wase oko kĩtũmbĩ kyowene kwʼaho. Neryo wasyasĩkĩbwa omo meso wʼabagenĩ bosĩ abĩkere oko mesa haguma nawe.

¹¹ Kusangwa obuli mundu oyũkayĩkamahaya, asyakehĩbwa, nʼoyũkayĩkehaya, asyahamĩbwa.

¹² Neryo Yesu mwabwira omũkokya wʼerirya ati, Omugulu ukayira erirya, lyʼeritungi kutse lyʼerĩgolo-golo, subirikire abĩra bawe kutse abagala benyũ, kutse abʼekĩtũnga kyawe kutse abalĩkyenyũ bʼebindu, kusangwa basyaswakubirikira nawe, ũkasyatũhwa.

¹³ Nĩkwa omugulu ukayira erirya, ubirikire abera, nʼebirema, nʼabakasĩndogera, nʼesyondĩmatĩme,

¹⁴ nawe wasyatsema; kusangwa sibangatoka erĩswakũtũha. Nyamuhanga asyakũtũha okwʼĩlũbũka lyʼabatunganene.

Omũsyo wʼerirya ĩnene

¹⁵ Omundu muguma oyo wabya ĩkere oko mesa haguma na Yesu mowa ebi, neryo mwabwira Yesu ati, Obutseme buli oko buli mundu oyo wasyalya akalyo omo Bwami bwa Nyamuhanga!

¹⁶ Nĩkwa Yesu mwamubwira ati, Habya omundu oyo wakokotaya erirya ĩnene, neryo mwabirikira bandu bangi.

¹⁷ Endambĩ yʼerirya yabere yahĩka mwatuma omugombe wuwe oko bagenĩ buwe ati, Mwase, kusangwa ebyosĩ byamagonera!

¹⁸ Nĩkwa abosĩ muguma muguma mobatsũka erĩyĩhambũlya. Owʼerĩmbere mwabwira omugombe ati, Nabya nabirigula eririma, nyitolere erĩyalebyalyo; unyibuyire.

¹⁹ Nʼogundi mwabũga ati, Nage nabirigula esyonde ĩkũmĩ esĩbohĩre oko ngomo ĩtanu, nage ngayalebayasyo, unyibuyire.

²⁰ Nʼogundi mwabũga ati, Nage nabĩrĩherũkya omũkalĩ lino-lino, neryo busana nʼomwatsi oyo sindyenditoka erĩhĩka.

²¹ Neryo omugombe oyo mwasubula nʼerĩtũlĩrago omukama wuwe emyatsi yosĩ eyo. Neryo Omwenye enyũmba eyo mwahitana kutsibu, mwabwira omugombe wuwe ati, Ugende lũba omo mbalu nʼomo tuyira twʼomũyĩ, ulete abera, nʼebirema, nʼesyondĩmatĩme, nʼabakasĩndogera.

²² Nʼomugombe oyo mwabũga ati, Mukama, ebyo wategeka byabirikolwa na lino mukine omwanya.

²³ Nʼomukama oyo mwabũga nʼomugombe wuwe ati, Ugende omo syombalu nʼesyonzira, uhatikane abandu base, enyũmba yage yosũle.

²⁴ Kusangwa ngababwira nyiti, Sihali nʼomuguma oyo wabirikirawa oyũkandĩsyagerya okwʼirya lyage.

Enzwere yʼerikwama Yesu

²⁵ Neryo esyondeko nene mosyagenda haguma na Yesu. Neryo Yesu mwabinduka mwabwirabo ati,

²⁶ Omundu amasa kwĩngye atetakwa ĩse wuwe yʼekĩnĩga, na nyĩnya wuwe nʼomũkalĩwe, nʼabana buwe, nʼabagala babo, nʼabali babo, naye ĩyowene-wene, isiangatoka eribya mwiga wage.

²⁷ Omundu oyuteheka omusalaba wuwe nʼerinyikwama, siangatoka eribya mwiga wage.

²⁸ Omundu muguma kwĩnywe amasonda erĩhĩmba enyũmba eyĩsũngũlĩkĩre akatsũka erĩĩkala ahisi nʼeriganza ebyasyahĩmbayo erĩrebya ngʼanawite ebyangabuga enyũmba eyo.

²⁹ Bite bitya, amabitakula ekibanza, isialitoka eribugakyo, abosĩ abakasungakyo ĩbatsũka erimuseka,

³⁰ bati, Omundu oyũ mwatsũka erĩhĩmba enyũmba, neryo mwalemwa eribugayo.

³¹ Kandi omwami oyuwite abandu elfu ĩkũmĩ, amayalwa nʼogundi mwami oyuwite abandu elfu makũmĩ abiri, asyatsũka erĩĩkala ahisi nʼerĩyĩbũlya ngʼasyatoka erilwa nʼogundi mwami oyo.

³² Bite bitya, omugulu ogundi mwami akine hali, akatuma abakwenda erĩbũlya omusangano wʼobuholo.

³³ Yesu ati, Litya sihali mundu ũkwʼĩnywe oyo wangatoka eribya mwiga wage amatendĩsyasĩganĩa ebyosĩ ebyo awite.

Omũnyũ owate na mugaso

³⁴ Omũnyũ owene; nĩkwa omũnyũ amatalya obusi bwago, asyaswabana obusi bwago bo ati kwehĩ?

³⁵ Siawite mugaso busana nʼekitaka, kutse busana nʼekyabũ. Akagusawa eyĩhya. Oyuwite amatwĩ, owe.