Luka 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Ũlũe kwʼebibi byawe, ubinduke

¹ Oko mugulu oyo habya bandu ababwira Yesu omwatsi wʼAbanya Galĩlaya abo Pilato ĩta omugulu babya bakahera ehongo uku Nyamuhanga.

² Yesu mwasũbĩryabo ati, Mũkaganĩraya muti Abanya Galĩlaya aba babya bakola-nabi kwilaba abandi Banya Galĩlaya bosĩ, kusangwa bagalĩbawa batya kwehĩ?

³ Ngababwira nyiti, Iyihi! Nĩkwa nenyũ, mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya.

⁴ Kutse mũkaganĩraya muti abandu erĩkũmĩ nʼomunani eSĩloamũ abatererawako nʼenyũmba eyĩsũngũlĩkĩre, abahola, muti babya babi kwilaba abandu bosĩ abĩkere eYerũsalema kwehĩ?

⁵ Ngababwira nyiti, Iyihi! Nĩkwa mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya.

Omũsyo wʼomũtĩnĩ owataheta

⁶ Neryo Yesu mwatwĩrabo omũsyo oyũ ati, Omundu abya nʼomuti wʼomũtĩnĩ owaherawa omwʼirima liwe lyʼebĩnyũ. Neryo omundu oyo mwahĩka erisonda kwʼebĩgũma, mwatabana byoko.

⁷ Neryo mwabwira Omũlĩmĩ wuwe ati, Talebaya, emyaka ĩsatu nabĩrĩhĩka ngasonda-sonda ebĩgũma oko muti wʼomũtĩnĩ oyũ isinditabana byoko. Ukondego! Busana nakĩ akalũhaya ekitaka kwehĩ?

⁸ Nʼomũlĩmĩ oyo mwamũsũbĩrya ati, Watalekago, Mukama, oko mwaka oyũ nataswatakula hakũhĩ nago nʼerĩhĩra omuboga.

⁹ Omuti amahetya ebĩgũma oko gundi mwaka, lyowene. Nĩkwa amatendiheta oko gundi mwaka, iwakondago.

Yesu akalamaya omũkalĩ oyũlehemĩre

¹⁰ Oko kiro kyʼeSabato Yesu abya akakangĩrĩrya omo nyũmba nguma yʼerĩhĩndanamo.

¹¹ Omũkalĩ abyaho oyo wabya kwʼekĩrĩmũ kibi ekyamũlwalaya emyaka erĩkũmĩ nʼomunani. Omũkalĩ oyo abya akondomĩre isialitoka erĩũnamukala.

¹² Yesu abere amulolako, mwamubirikira ati, Mũkalĩ, wamaboholwa kwʼendwala yawe!

¹³ Neryo Yesu mwamũhĩra kwʼebyala biwe; neryo-neryo mwatũngananĩbwa, neryo mwatsũka eripipa Nyamuhanga.

¹⁴ Nĩkwa omũtabalĩ wʼenyũmba yʼerĩhĩndanamo mwahitana, kusangwa Yesu mwalamya abandu oko kiro kyʼeSabato, neryo mwabwira abandu ati, Hali biro ndatu byʼerikolwamo omũbĩrĩ; mubye mukasa omo biro ebyo mũlamĩbawe, butsira ekiro kyʼeSabato!

¹⁵ Nĩkwa Omukama mwamũsũbĩrya ati, Ĩnywe batebya! Obuli mundu kwĩnywe sialihangula ende yiwe kutse epunda yiwe eyiri omo nyũmba, nʼerĩnywĩsyayo oko kiro kyʼeSabato kwehĩ?

¹⁶ Nʼomũkalĩ oyo, mwali wa Abrahamũ, oyo eSatanĩ yaboha emyaka erĩkũmĩ nʼomunani, siritolere akaboholwa omo mũlĩkĩ oyũ, oko kiro kyʼeSabato kwehĩ?

¹⁷ Neryo abere akabũga ebĩ, esyonzĩgũ siwe syosĩ mosyahemuka; nʼendeko yosĩ moyatsemera emyatsi yosĩ yʼeriswekera eyo Yesu akola.

Omũsyo wʼembuto yʼeharadalĩ

¹⁸ Neryo Yesu mwabũga ati, Obwami bwa Nyamuhanga bulingene nakĩ kwehĩ? Kandi nasyalĩngĩrĩranĩabo nakĩ kwehĩ?

¹⁹ Bulingene nʼembuto yʼeharadalĩ eyo mundu ĩmaya nʼeribibayo omwʼirima liwe; nayo moyakula moyabya muti munene, nʼesyonyonyũ syʼekyanya mosyahĩmba esyonyutu syasyo oko mitahi yago.

Omũsyo wʼekĩhamya

²⁰ Kandi Yesu mwabũlya ati, Nasyasosekanĩa Obwami bwa Nyamuhanga nakĩ kwehĩ?

²¹ Busosene nʼekĩhamya omũkalĩ ĩmaya; mwabĩsakyo omo hĩrengĩ hisatu hyʼeyĩsyano, nʼeyosĩ moyahama.

Olũkyo luke

²² Kandi Yesu mwalaba omo mĩyĩ nʼehĩyĩ, ĩnĩakakangĩrĩraya, nʼerikwama enzira yiwe eriya eYerũsalema.

²³ Neryo omundu mwamũbũlya ati, Mukama, abakalamĩbawa ni bake kwehĩ? Yesu mwamũsũbĩrya ati,

²⁴ Mulenge kutsibu eriingira omo lũkyo luke, kusangwa ngababwira nyiti, Ni bangi abasyasondasonda eriingiramo, isibendisyatoka.

²⁵ Omwenye enyũmba amabihangana nʼerikinga Olũyĩ, nenyũ mũkatsũka erihangana eyĩhya nʼerikongota oko lũyĩ, muti, Mukama, utukingulire! Neryo asyabasũbĩrya nʼeribabwira ati, Sĩnyasĩ eyo mũkalũa.

²⁶ Neryo mwasyatsũka erĩbũga muti, motwalya, motwapũlĩrya embere syawe; kandi mowakangĩrĩrya omo nzira syʼewetu.

²⁷ Naye asyabũga kandi ati, Ngababwira nyiti, Sĩnyasĩ eyo mũkalũa. Mũlũe aho nyiri, ĩnywe bosĩ abakolĩ bʼebibi!

²⁸ Eyo hasyabya eririra nʼerikeregeta ameno, omugulu mukalangira Abrahamũ na Ĩsaka, na Yakobo, nʼabamĩnyererĩ bosĩ omo Bwami bwa Nyamuhanga, nenyũ imukagusawa eyĩhya.

²⁹ Abandu basyalũa eyo eryuba likahulukira, nʼeyo likalengera, nʼoko Lutambi lwʼeNdata, nʼoko Lutambi lwʼeYĩkwa, basyĩkala oko mesa okwʼirya omo Bwami bwa Nyamuhanga.

³⁰ Neryo lebaya, hali bʼenyũma abasyabya bʼerĩmbere, kandi hali abʼerĩmbere abasyabya bʼenyũma.

Yesu akalira busana nʼeYerũsalema

³¹ Oko katambĩ ako, abandi Bafarĩsayo mobahĩka bakamubwira bati, Ugende, Ũlũe hano, kusangwa Herode anzĩre erĩkwĩta.

³² Yesu mwasũbĩryabo ati, Mugende mubwire eboha eyo muti, Lebaya, ngahiga esyombĩnga nʼerikola omũbĩrĩ wʼerĩlamya mũnabwĩre nʼomo ngyakya, nʼoko kiro kyʼebisatu nasyabugirira omũbĩrĩ wage.

³³ Nĩkwa litolere inakwama olugendo lwage mũnabwĩre, nʼomo ngyakya, na mwalindi; siritolere omũmĩnyererĩ akakwĩra eyĩhya wʼeYerũsalema.

³⁴ Uwe Yerũsalema, Yerũsalema! Ũkĩta abamĩnyererĩ nʼerĩĩtabo omo mabwe abatumawa ukʼuwe! Ngendo singahi nabya nyanzĩre erĩhĩndanĩa abana bawe bo haguma, ngʼerĩbũtĩ ko lĩkahĩndanaya emĩpyege yalyo omo bĩpũpa byalyo, nĩkwa Simwabya mwanzĩre!

³⁵ Mũlebaye, oko wenyũ kwasyasĩgala mo kĩma. Ngababwira nyiti, Simwendisyanyilolako erĩhĩka aho mwasyabũgĩra muti, Nyamuhanga atsumule oyukasa omo lĩna lyʼomukama!