Luka 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba

¹ Oko mugulu muguma Yesu abya iniakayasabira halebe. Abere abuga erisaba, omuguma gʼoko biga buwe mwamubwira ati, Mukama, Ũtũkangĩrĩraye erisaba, ngoko Yoane akakangĩrĩraya abiga buwe.

² Yesu mwabwirabo ati, Omugulu mukasaba ĩmwabũga muti: Tata, Erĩna lyawe libye rĩbũyĩrĩre. Obwami bwawe bwase.

³ Utuhe obuli kiro akalyo ketu akatuto­lere.

⁴ Utubuyire ebibi byetu, Kusangwa netu tukabuyira obuli mundu oyukatukola nabi. Sigututwale omwʼirengwako.

⁵ Neryo Yesu mwabwira abiga buwe ati, Nindi kwĩnywe amabya nʼomwĩra wuwe, neryo akaya ewuwe omo katĩkanene, akamubwira ati, Mwĩra unyibweke mandu asatu.

⁶ Kusangwa omwĩra wage, akalũa oko lugendo akambĩkako, nage singwite ebyʼerimuha.

⁷ Nʼoyuli omo nyũmba asyamũsũbĩrya ati, Sũndũhaye; Olũyĩ lũkĩngĩre, nage nʼabana tuli omo ngyingo; sinditoka erihangana nʼerikuha kindu.

⁸ Nyiti nomo atetahangana kusangwa nĩ mwĩra wuwe, nĩkwa busana nʼerimuhatikana, asyahangana nʼerimuha ebyosĩ ali nabyo bwaga.

⁹ Nage ngabũga nenyũ nyiti, Mũbũlaye, neryo mwasyahabwakyo; mũsonda-sondaye, neryo mwasyabanakyo; mukongote oko lũyĩ, neryo mwasyakingulirwalo.

¹⁰ Kusangwa oyũkabũlaya, asyangirirakyo, nʼoyukasonda-sonda asyabanakyo; nʼolũyĩ lwasyakingukala oko yukakongota kulo.

¹¹ Nindi kwĩnywe abotata oyo wangaha mugala wuwe yʼerĩbwe omugulu akabũlaya obundu kwehĩ? Kutse oyo wangamuha enzoka omugulu akabũlaya erĩhere kwehĩ?

¹² Kutse oyo wangamuha enge, omugulu akabũlaya eriyi kwehĩ?

¹³ Nomo mune ababi, mũnasĩ eriha abana benyũ bʼolũsũnzo lubuya. Tata wenyũ wʼelubula syalabĩre aho eriha Omũlĩmũ Abũyĩrĩre oko bakamũbũlaya kwehĩ?

Yesu na Belzebũlĩ

¹⁴ Yesu abya akahigira embĩnga yʼeyĩhya oko yo wabya mũmũ. Neryo embĩnga yabere yabĩmũlũako, omundu oyo mwatsũka erĩbũga. Nʼesyondeko mosyasweka.

¹⁵ Nĩkwa abandi bʼesyondeko mobabũga bati, Belzebũlĩ, omukama wʼesyombĩnga akamuha maka wʼerihigasyo.

¹⁶ Nʼabandi mobasonda erimulengako, bati akangayebo ekitiko-tiko ekĩkalũa elubula.

¹⁷ Nĩkwa Yesu mwaminya obũlengekanĩa bwabo, neryo mwabwirabo ati, Obwami obũkayĩrwanaya bukabya kĩhũma, nʼekĩtũnga ekĩkayĩrwanaya kikasambukala.

¹⁸ Kandi eSatanĩ yamayĩrwanĩa, obwami bwayo bwasyahangana buti kwehĩ? Kusangwa mũkabũga muti, Belzebũlĩ akamba amaka wʼerihiga esyombĩnga.

¹⁹ Kandi ĩngye namabya ngahigira esyombĩnga syʼeyĩhya omo maka wa Belzebũlĩ, abana benyũ, bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ.

²⁰ Nĩkwa ĩngye ngahigira esyombĩnga syʼeyĩhya omo maka wa Nyamuhanga, kundi obwami bwa Nyamuhanga bwabĩrĩbahĩkako.

²¹ Omugulu embangĩ yamabiambala ebindu byʼamalwa, akategaya omũyĩ wuwe, ebindu biwe biri nʼobuholo.

²² Nĩkwa omugulu omundu oyũmũlengĩre amaka akamuhamba nʼerĩmũkĩnda, akamũlũsaya kwʼebindu biwe byosĩ byʼamalwa, ebyo ayiketere, kandi akagaba ebyo ahũnga.

²³ Oyute haguma nage, akanyigana, nʼoyutegesa haguma nage akapanza-panza.

Ekĩrĩmũ kibi kikasubamo

²⁴ Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, ikikasonda-sonda ahʼeriluhukira; kyamabulaho, kikayibwira kiti, Ngandisuba omo nyũmba yage eyo nasĩga.

²⁵ Neryo kyamabĩhĩkaho kĩkeya enyũmba eyo ĩyĩnabĩrĩrye, ĩyĩnakomĩre.

²⁶ Neryo kikahuluka ikyaleta ebindi bĩrĩmũ birinda bibi kwilabakyo, neryo ibingiramo nʼerĩĩkalamo. Endũlĩ yʼomundu oyo ikabya nyibi kwilaba erĩmbere.

Obutseme bwʼekwenene

²⁷ Yesu abere abĩbũga omwatsi oyũ, omũkalĩ muguma gʼoko ndeko mwabũga naye ati, Obutseme buli oko mũkalĩ oyo wakubuta nʼamabere ago walyako!

²⁸ Nĩkwa Yesu mwamũsũbĩrya ati, Ko bite bitya, nĩkwa obutseme buli oko bakowa ekĩnywa kya Nyamuhanga nʼerikolakyo.

Endeko bakabũlaya ekitiko-tiko

²⁹ Neryo esyondeko babya bakakama, Yesu mwabũga ati, Abandu bʼomugulu ono ni babi! Bakasonda-sonda ekitiko-tiko ngʼekiminyikalo. Nĩkwa sibendisyahabwakyo, kyenʼekitiko-tiko kya Yona.

³⁰ Kusangwa ngoko Yona abya kĩmĩnyĩsyo busana nʼabandu bʼeNĩnawe, litya Omugala wʼOmundu asyabya kĩmĩnyĩsyo busana nʼabandu bʼolulengo olũ.

³¹ Omwami wʼobũkalĩ wʼeLutambi lwʼeYĩkwa asyahangana oko kiro kyʼeritswerwa, nʼerĩsĩnga abandu bʼolulengo olũ, kusangwa alũa oko ndũlĩ syʼekihugo busana nʼerĩowa amenge wa Solomono; neryo lebaya, oyũlengĩre Solomono ane hano.

³² Abandu bʼeNĩnawe basyahangana oko kiro kyʼeritswerwa nʼerĩsĩnga abandu bʼolulengo olũ, kusangwa babindula emitima erireka ebibi okwʼĩtũlago lya Yona. Kandi lebaya, oyũlengĩre Yona ane hano!

Etala nʼomubiri

³³ Sihali mundu oyũkakaya etala neryo akahĩrayo ahabĩsamĩre, kutse omwisi wʼekitiri, nĩkwa oko mbaniko, neryo abandu abakingira omo nyũmba batoke erilangira ekyakakala.

³⁴ Etala yʼomubiri rye rĩso. Omugulu erĩso lyawe likalangira, omubiri wawe gosĩ akũsũla nʼekyakakala; nĩkwa erĩso lyawe lyamabya libi, omubiri wawe akũsũla mʼomwĩrĩmya.

³⁵ Neryo mũtegaye ekyakakala ekiri omwisi wenyũ sikibye mwĩrĩmya.

³⁶ Neryo omubiri wawe gosĩ amabya oswĩre nʼekyakakala, isiawite omwanya ali mʼomwĩrĩmya, asyabya nʼerĩkangabasanĩa ehosĩ, ngoko etala ĩkakoleraya nʼerĩhenĩa lyayo.

Yesu akahandikirira Abafarĩsayo nʼabakangĩrĩrya bʼEmigambo

³⁷ Neryo Yesu abere abibuga erĩtũlago, Umũfarĩsayo mwamũbũlya ati alye haguma naye; neryo Yesu mwayamo mwĩkala okwʼirya.

³⁸ Omũfarĩsayo mwasweka kusangwa Yesu mwatatsũka erinaba embere wʼerirya.

³⁹ Nĩkwa Omukama mwamubwira ati, Ĩnywe Bafarĩsayo mũkeraya endambi syʼolũtehĩ nʼekibindi; nĩkwa omwisi moswĩre erinyega nʼobubi.

⁴⁰ Ĩnywe bakĩrũ! Nyamuhanga oyo wahangika endambi, mwatahangika nʼomwisi nibya kwehĩ?

⁴¹ Nĩkwa mugabire abandu bera ebiri omwisi wʼolũtehĩ nʼekibindi, neryo ebyosĩ byasyera.

⁴² Nĩkwa obũlĩge kwĩnywe Bafarĩsayo! Kusangwa mukaha Nyamuhanga ekiguma kyʼomwʼĩkũmĩ kya munanaa, nʼomũchĩcha, nʼesindi nyenyĩ syosĩ, nĩkwa ĩmũkasĩganaya erĩbanza nʼerianza Nyamuhanga. Kumbe mukakola ebĩ nʼerĩtendĩsĩganĩa ebindi.

⁴³ Obũlĩge kwĩnywe Bafarĩsayo! Mukanza ebĩtũmbĩ byʼembere omo manyũmba wʼerĩhĩndanamo, nʼerĩkerĩbwa omo hitale.

⁴⁴ Obũlĩge kwĩnywe, kusangwa muli ngʼesisinda esitaminyikere, nʼabandu bakalaba endata kusyo ĩsĩbasĩsyo.

⁴⁵ Omuguma gʼoko bakangĩrĩrya bʼEmigambo mwamubwira ati, Mũkangĩrĩrya, omugulu ũkabũga utya ukatutsuma nibya.

⁴⁶ Yesu mwasũbĩrya ati, Obũlĩge kwĩnywe bakangĩrĩrya bʼEmigambo nibya! Kusangwa mũkahekaya abandu emiheke eyĩkalĩre erihekwa, nenyũ sĩmwetũlaya oko miheke eyo kʼomunwe erĩwatĩkyabo erihekayo.

⁴⁷ Obũlĩge kwĩnywe! Kusangwa mwahĩmba esisinda syʼabamĩnyererĩ, kandi abotata-kulu benyũ bo banĩtabo.

⁴⁸ Kandi muli balangĩrĩ ĩmũkalĩga emĩbĩrĩ yʼabotata-kulu benyũ; kusangwa mobĩta abamĩnyererĩ, nenyũ mũkahĩmba esisinda syabo.

⁴⁹ Busana nʼomwatsi oyũ, Amenge wa Nyamuhanga mwabũga ati, Nasyatumirabo abamĩnyererĩ nʼabakwenda, kandi basyĩta abandi ba kubo nʼerĩendererya abandi.

⁵⁰ Neryo abandu ba sesene basyasuyirwa busana nʼomusasi wʼabamĩnyererĩ bosĩ erĩtsũka omugulu Nyamuhanga ahangika ekihugo,

⁵¹ erĩtsũka oko musasi wa Abelĩ, erĩhĩka oko musasi wa Zakarĩa oyo wakwĩra omo katĩkatĩ kʼekiherero nʼenyũmba ya Nyamuhanga. Ega, ngababwira nyiti, abandu bʼomugulu ono basyasuyirwa busana nʼabosĩ abo!

⁵² Obũlĩge kwĩnywe, abakangĩrĩrya bʼEmigambo! Mwabiritwala olufungula lwʼenyũmba yʼamenge; nenyũ simwetingira, kandi momwakakĩrya ababya bakasonda eriingiramo.

⁵³ Neryo abere alũayo, abakangĩrĩrya bʼEmigambo, nʼAbafarĩsayo mobatsũka erilwa naye nʼerĩmũbũlya nabi busana nʼemyatsi mingi,

⁵⁴ ibakamulinda erimutega omo myatsi angabũga.