Luka 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akatuma Amakũmĩ Alinda

¹ Enyũma wʼaho, Omukama mwayisoga abandi bandu makũmĩ alinda, mwatumabo mo babiri babiri embere siwe, eriya oko mĩyĩ yosĩ aho iye asonda erĩhĩka.

² Neryo mwabwirabo ati, Ebyʼerigesa ni bingi, nĩkwa abahĩngĩ ni bake. Neryo musabe Omukama wʼerigesa atume abahĩngĩ omwʼigesa liwe.

³ Mugende, mũlebaye, ngabatuma ngʼehyana hyʼesyombũlĩ omo katĩkatĩ kʼesyombwa syʼomolĩ.

⁴ Simuheke erĩtũsĩ, kutse engunza, kutse esyongendero; kandi sĩmũbũkaye mundu omo nzira.

⁵ Omugulu mukingira omo nyũmba, mũtsũke erĩbũga, muti, Obuholo bubye omo nyũmba eyĩ!

⁶ Omundu wʼobuholo amabya aneho, Obuholo bwenyũ bwasyamubyako; nĩkwa bite bitya, ibwasuba ũkwʼĩnywe.

⁷ Mwĩkale omo nyũmba eyo, imwalya ĩmwapũlya ebyo bakabaha; kusangwa omũhĩngĩ anatolere oluhembo luwe. Simubye mũkahũma-hũmĩra omo wandi manyũmba.

⁸ Omugulu mukaya oko mũyĩ, bamabakokya, mulye ebyo bakabaha.

⁹ Mũlamaye abakonĩ abali oko mũyĩ oyo, mubwire abandu bako muti, Obwami bwa Nyamuhanga bwamahĩka hakũhĩ nenyũ.

¹⁰ Nĩkwa omugulu mukaya oko mũyĩ, bamatendĩbakokya muye oko syonzira syako nʼerĩbũga muti,

¹¹ Olũtũtũ lwʼomũyĩ wenyũ olukamakirira oko bisando byetu, tukakungutalo eribakunga; nĩkwa muminye ekĩ: obwami bwa Nyamuhanga bwamahĩka hakũhĩ nenyũ.

¹² Ngababwira nyiti, olubanza lwʼeSodomo lwasyabya luke kwilaba olubanza lwʼomũyĩ oyo ekiro kyʼeritswerwa.

Emĩyĩ eyagana erĩkĩrĩrya

¹³ Obũlĩge ukʼuwe Korazĩnĩ! Obũlĩge ukʼuwe Betesaĩda! Kusangwa kumbe ebitiko-tiko ebyakolawa omwisi wenyũ, byalikolawa eTĩro nʼeSĩdona, kumbe babiribindula emitima nʼerireka ebibi kera ibanambite emisarandwe nʼerĩĩkala omwʼĩbũ!

¹⁴ Kusangwa olubanza lwʼeTĩro nʼeSĩdona lwasyabya luke kwilaba olwenyũ oko kiro kyʼeritswera.

¹⁵ Nawe Kapemaũmũ, wasyahamĩbwa elubula kwehĩ? Wasyandagalĩrĩbwa eKũlĩmũ!

¹⁶ Yesu mwabwira abiga buwe ati, Oyũkabowa, akanyowa; nʼoyukabagana, akanyigana; nʼoyukanyigana, akagana oyo wanyituma.

Erisubula lyʼAmakũmĩ Alinda

¹⁷ NʼAmakũmĩ alinda mobasubula nʼobutseme bati, Mukama, esyombĩnga mosyatowĩre omugulu twahanasyo omo lĩna lyawe!

¹⁸ Yesu mwasũbĩryabo ati, Monalangira eSatanĩ ikatoga ngʼerĩpalya ĩkalũa elubula.

¹⁹ Lebaya, nabiribaha ehamũlĩ yʼeriryatangirira esyonzoka, nʼesyonge, nʼerirenga obũtokĩ bosĩ bwʼenzĩgũ, isihali kindu kyangabahũtalya.

²⁰ Nĩkwa simutseme kusangwa ebĩrĩmũ bibi byabĩrĩbowa, nĩkwa mutseme kusangwa amena wenyũ abirisakwa elubula.

Yesu akatsema

²¹ Oko ndambĩ eyo Yesu mwatsema kutsibu omo Mũlĩmũ Abũyĩrĩre ati, Ngakupipa uwe Tata, Omukama wʼelubula nʼowʼekihugo, wabĩrĩbĩsa emyatsi eyĩ oko bʼamenge nʼabanyima. Kandi Ega, Tata, kusangwa wabĩrĩbĩsũlĩrayo oko bana balere; ko byakũtsemesaya bitya omo meso wawe.

²² Tata wage abirimba emyatsi yosĩ, kandi sihali oyo wasĩ Mugala nga nindi, nina Tata; kandi sihali oyo wasĩ Tata nga nindi, nina Mugala, nʼomundu oyo Mugala anzĩre erĩmũbĩsũlĩra.

²³ Neryo Yesu mwabindukira abiga buwe mwabwirirabo ahate mundu ati, Obutseme buli oko bakalangira emyatsi eyo mũlangĩre!

²⁴ Kusangwa ngababwira nyiti, abamĩnyererĩ bangi nʼabami mobasonda erilangira ebyo mukalangira, nĩkwa mobatalangirabyo, nʼerĩowa emyatsi eyo mũkowa, nĩkwa mobatowayo.

Omũsyo wʼOmũsamarĩa mubuya

²⁵ Neryo omũkangĩrĩrya wʼEmigambo mwahĩkaho nʼerimulengako ati, Mũkangĩrĩrya, nyikolekĩ inatoka eribana engebe yʼerikota kwehĩ?

²⁶ Yesu mwamũsũbĩrya ati, Ebĩsakĩre omo Migambo ni byahi kwehĩ? Ukasomabyo uti kwehĩ?

²⁷ Naye mwasũbĩrya ati, Litolere iwanza Omukama Nyamuhanga wawe omo mutima wawe gosĩ, nʼekĩrĩmũ kyawe kyosĩ, nʼomo maka wawe gosĩ, nʼomo bũlengekanĩa bwawe bosĩ; kandi iwanza mũlĩkyenyũ ngoko ũyanzĩre.

²⁸ Yesu mwamũsũbĩrya ati, Wabĩrĩsũbĩrya ndeke; Ukole utya, wasyabyaho.

²⁹ Nĩkwa omũkangĩrĩrya wʼEmigambo iniakasonda eriyiyira mo mutunganene, mwabũlya Yesu ati, Mũlĩkyetu nindi kwehĩ?

³⁰ Yesu mwamũsũbĩrya ati. Habya omundu oyo wabya akandagalira eYerĩko ĩnĩakalũa eYerũsalema. Neryo abanyeyĩ mobamũhũnga kwʼebyosĩ, mobamũhũnza neryo mobamũsĩga hakũhĩ nʼerihola.

³¹ Neryo mũhererĩ muguma mwahĩkaho, iniakalaba omo nzira eyo. Omugulu omũhererĩ amulolako, mwayihengeka erilaba.

³² Neryo Omũlawĩ abere ahĩkaho, naye mwamusamalira nʼeriyihengeka, mwalaba elutambi.

³³ Nĩkwa Omũsamarĩa, oyo wabya oko lugendo, mwahĩka ahali omundu oyo, neryo abere amulolako, mwamuganyira.

³⁴ Neryo mwaya aho ali, mũta amagũta nʼebĩnyũ oko bironda biwe nʼerisenga ebironda ebyo; kandi mwamũhĩra oko punda yiwe, mwamutwala oko hotele neryo mwamũtwanira.

³⁵ Omo ngyakya mwĩmya esyofranka magana abiri mwahasyo oko mwenye hotele ati, Ũnyĩtwanirireye, neryo ekiro nasyaswasa nasyakuha ebyo ukamulihira kwilaba esĩ.

³⁶ Neryo Yesu ati, Ũkaganĩraya uti nindi oko basatu aba yo wabya mũlĩkyabo mundu oyo wahambawa nʼabanyeyĩ kwehĩ?

³⁷ Omũkangĩrĩrya wʼEmigambo mwasũbĩrya ati, Oyo wamuganyira. Neryo Yesu mwamubwira ati, Ugende, nawe Ukole utya.

Marata na Marĩa

³⁸ Neryo omugulu Yesu nʼabiga buwe babya oko lugendo, mobingira oko kayĩ nʼeyo omũkalĩ oyo wahulawa mo Marata mwamũkokya omo nyũmba yiwe.

³⁹ Naye abya awite mwali wabo oyukahulawa mo Marĩa, oyo wĩkala hakũhĩ nʼebisando bya Yesu, nʼerĩowa ekĩnywa kyʼomukama.

⁴⁰ Nĩkwa Marata mwahanga-hangya omutima omo mĩbĩrĩ mingi yiwe; neryo mwahĩka uku Yesu mwabũga naye ati, Mukama, sulitanyĩkwĩra bũlĩge kusangwa mwali wetu abirinyitekera emĩbĩrĩ yosĩ kwehĩ? Umubwire uti anyĩwatĩkaye!

⁴¹ Nĩkwa Omukama mwamũsũbĩrya ati, Marata, Marata! Ukayiganyira nʼeriganga-ganga busana nʼemyatsi mingi;

⁴² nĩkwa omwatsi muguma atolere, kusangwa Marĩa abiriyisoga omwatsi mubuya owate angasagulwa.