Luka 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Uku Teofilo mubuya! Abandu bangi babirirenga ndeke erisaka emyatsi eyakolawa omo katĩkatĩ ketu.

² Abandu abo mobatubwira emyatsi eyo, ibabiribya balangĩrĩ nʼabatũlĩ bʼekĩnywa ekyo erĩtsũka erĩmbere.

³ Neryo uwe, Teofilo, kyamabya kibuya erikusakira ndeke eritondeka lyʼemyatsi eyo nabĩrĩbũlĩrĩrya ndeke erĩtsũka erĩmbere.

⁴ Iwatoka eriminya ndeke ekwenene yʼemyatsi eyo wabĩrĩkangĩrĩrĩbwa.

Eributwa lya Yoane Mũbatĩsya

⁵ Omo biro bya Herode, omwami wʼeYũdea, habya omũhererĩ oyukahulawa mo Zakarĩa wʼekihanda kya Abĩya. Erĩna lya mũkalĩwe abya iyo Elĩzabetĩ. Naye abya wʼekĩtũnga kya Harũnĩ.

⁶ Kandi ababiri bosĩ babya batunganene embere sya Nyamuhanga, ibakakwama ndeke ebihano byosĩ nʼebilayiro byʼomukama.

⁷ Kandi isibawite bana, kusangwa Elĩzabetĩ abya mugumba, nʼababiri bosĩ ibabirikekeluha.

⁸ Neryo ekiro kiguma Zakarĩa abya akakola omũbĩrĩ wʼobũhererĩ embere sya Nyamuhanga omo kĩtũlĩ kiwe.

⁹ Neryo ngoko abahererĩ babya bakakola, Zakarĩa mwayisogwa omo bukanga eriingira omo Hekalũ yʼomukama nʼerĩhĩsya obukwa.

¹⁰ Nʼendeko yosĩ yʼabandu babya ibakasabira eyĩhya oko ndambĩ yʼerihera obukwa.

¹¹ Neryo omũlaĩka wʼomukama mwabutukira uku Zakarĩa iniahangene oko luhande lwʼamali lwʼekiherero kyʼobukwa.

¹² Omugulu Zakarĩa alangira omũlaĩka mwahangya-hangya, kandi mubaha.

¹³ Nĩkwa omũlaĩka mwamubwira ati, Zakarĩa, Sigubahe. Nyamuhanga abĩrĩowa erisaba lyawe, nʼomũkalĩ wawe asyakubutira omũlwana. Wasyahula erĩna liwe mo Yoane.

¹⁴ Wasyatsema nʼeritsanga, kandi abandu bangi basyatsemera eributwa liwe.

¹⁵ Kusangwa asyabya mundu mukulu omo meso wʼomukama. Syasyepũlaya bĩnyũ kutse obwabũ bwʼomuliro; kandi asyũsũlĩbwa nʼOmũlĩmũ Abũyĩrĩre isialiabutwa.

¹⁶ Kandi abandu bangi ba Ĩsraelĩ asyasũbyabo oko Mukama Nyamuhanga wabo.

¹⁷ Kandi asyagenda ngʼomukwenda wa Nyamuhanga, omo kĩrĩmũ nʼobũtokĩ bwa Elĩa. Kandi asyasanganĩa abotata nʼabana; nĩkwa asyasũbya abatĩowa oko menge wʼabatunganene; asyategekanĩa abandu basĩke busana nʼomukama.

¹⁸ Neryo Zakarĩa mwabwira omũlaĩka ati, Nasyaminya ebĩ byo ndeke nyiti kwehĩ? Kusangwa indi mũsyakulu, nʼomũkalĩ wage ni mukekulu nibya.

¹⁹ Nʼomũlaĩka mwamũsũbĩrya ati, Ĩngye indi Gabrĩelĩ. Oyukahangana embere sya Nyamuhanga, kandi nabiritumwa erikubwira, nʼerikuletera Engulu Yowene eyĩ.

²⁰ Nĩkwa kusangwa sũlĩtĩkĩrĩrya ebĩnywa byage ebikandisyabererera oko mugulu atolere, Ukandibya mũmũ, isiwendisyatoka erĩbũga erĩhĩka oko kiro omwatsi oyũ asyahĩka.

²¹ Nĩkwa abandu ababya bakalindirira Zakarĩa mobasweka busana nʼeriamala ndambĩ riwe omo Hekalũ.

²² Neryo omugulu ahuluka, mwatatoka erĩbũga nabo. Neryo abandu abo mobaminya ngoko Zakarĩa abere omo bũlĩme omo Hekalũ. Neryo mwakoheryabo omo byala biwe, kusangwa mwabya mũmũ.

²³ Neryo omugulu ekĩtũlĩ kiwe kyahwa omo Hekalũ, Zakarĩa mwasuba eka wuwe.

²⁴ Nʼenyũma wʼebiro ebĩ mũkalĩwe ye Elĩzabetĩ mwaheka obukule; neryo mwasĩgala omo nyũmba yiwe mo mikera ĩtanu ati,

²⁵ Lino Omukama abĩrĩnyĩwatĩkya atya omo biro ebyo anyiganyira. Abĩrĩnyĩlũsya kwʼesĩsonĩ emuliro syʼabandu.

Nyamuhanga akatuma Gabrĩelĩ uku Marĩa

²⁶ Oko mukera wʼendatu wʼobukule bwa Elĩzabetĩ, Nyamuhanga mwatuma omũlaĩka ye Gabrĩelĩ oko mũyĩ wʼeGalĩlaya owakahulawa mo Nazaretĩ

²⁷ Omũlaĩka oyo mwaleta erilayira lya Nyamuhanga oko mumbesa oyo wasĩmolĩbawa nʼomundu oyukahulawa mo Yosefũ, wʼekihanda kya Dawĩdĩ. Erĩna lyʼomumbesa oyo abya iyo Marĩa.

²⁸ Omũlaĩka oyo mwahĩka uku Marĩa mwamubwira ati, Wabũkĩre, uwe mutsumulwa. Omukama ali haguma nawe.

²⁹ Neryo Marĩa mwahanga-hangya omutima busana nʼekĩnywa ekyo, neryo mwayĩbũlya erĩkerya eryo nga nĩ ʼkerya lya mũsĩndo wahi.

³⁰ Neryo omũlaĩka mwamubwira ati, Sigubahe, Marĩa, kusangwa wabiribana olukogo ewa Nyamuhanga.

³¹ Kandi lebaya, wasyaheka obukule nʼeributa omũlwana, neryo wasyamwahula mo Yesu.

³² Asyabya mukulu, kandi asyahulwa mo Mugala wa Nyamuhanga Wʼendata Kutsibu. Omukama Nyamuhanga asyamuha ekĩtũmbĩ kyʼobwami kya tata-kulu wuwe Dawĩdĩ.

³³ Kandi asyatabalira ekihanda kya Yakobo kera na kera, nʼobwami buwe sibwendisyahwa.

³⁴ Marĩa mwabwira omũlaĩka ati, Ĩngye ndawite mulume, kʼomwatsi oyũ angabya ati kwehĩ?

³⁵ Nʼomũlaĩka mwamũsũbĩrya ati, Omũlĩmũ Abũyĩrĩre asyakũhĩkako, nʼobũtokĩ bʼOwendata Kutsibu bwasyakũsũkũlĩrya; busana nʼomwatsi oyo, omwana abũyĩrĩre oyo wasyabuta asyahulwa mo Mugala wa Nyamuhanga.

³⁶ Neryo, lebaya mwali wenyu, ye Elĩzabetĩ omo bukekulu buwe abiriheka obukule bwʼomwana wʼobulume. Nʼoyo wahulawa mo mugumba ali nʼobukule bwʼemikera ndatu.

³⁷ Kusangwa uku Nyamuhanga sihali ekitetokekana.

³⁸ Neryo Marĩa mwabũga ati, Ĩngye indi mugombe wʼomukama, kinyibyeko ngoko wabĩrĩbũga. Neryo omũlaĩka oyo mwamũsĩganĩa mwagenda.

Marĩa akayabana Elĩzabetĩ

³⁹ Neryo oko biro ebyo Marĩa mwahangana, mwanguha eriya omo kihugo kyʼebitwa, oko mũyĩ wʼeYũdea.

⁴⁰ Neryo mwingira omo nyũmba ya Zakarĩa, neryo mwabũkya Elĩzabetĩ.

⁴¹ Omugulu Elĩzabetĩ owa erĩkerya lya Marĩa, omwana mwayisumba omo nda yiwe; neryo Elĩzabetĩ mũsũlĩbwa nʼOmũlĩmũ Abũyĩrĩre.

⁴² Neryo mwabirikira nʼomulenge munene ati, Uli mutsumulwa omo katĩkatĩ kʼabakalĩ! Nʼomwana wasyabuta ni mutsumulwa!

⁴³ Omwatsi munene oyũ akambĩkako ati kwehĩ? Uti koyo wʼomukama wage akasa erinyibana kwehĩ?

⁴⁴ Kusangwa omugulu ĩndĩowa omulenge wʼerĩkerya lyawe, omwana mwakayisumba omo nda yage nʼobutseme.

⁴⁵ Nʼobutseme buli ukʼuwe ũkĩkĩrĩraya uti ekĩnywa ekyo Mukama akubwira kikandisyabererera.

⁴⁶ Neryo Marĩa mwabũga ati, Omutima wage akahamaya Omukama,

⁴⁷ Ekĩrĩmũ kyage kikatsemera Nyamuhanga Omũlamya wage.

⁴⁸ Kusangwa abirinyibuka ĩngye omugombe wuwe muke; Lebaya, erĩtsũka lino abandu bosĩ basyanyahula mo gʼomũyĩsa.

⁴⁹ Kusangwa Nyamuhanga wʼobũtokĩ abirinyikolera emyatsi minene, Nʼerĩna liwe lĩbũyĩrĩre.

⁵⁰ Eriganyira liwe liri oko bosĩ abakamu­baha, Erĩtsũka oko lulengo luguma nʼerĩhĩka oko Sindi.

⁵¹ Abirikola emĩbĩrĩ ĩkalĩre omo kuboko kuwe; Abiripanza-panza abakayiheka omo malengekanĩa wʼemitima yabo.

⁵² Abĩrĩkĩmya abatabalĩ erĩlũa oko bĩtũmbĩ byabo byʼobwami, Abĩrĩhamya abakayĩkehaya.

⁵³ Abĩrĩũgũtya abali nʼenzala omo bindu bibuya; Nʼabʼebindu abĩrĩsũbũlyabo byala bisa.

⁵⁴ Abĩrĩwatĩkya omugombe wuwe Ĩsraelĩ, Iniakibuka eriganyira liwe.

⁵⁵ Ngoko anabwira abotata wetu, Na Abrahamũ nʼabana buwe kera na kera.

⁵⁶ Neryo Marĩa mwĩkala na Elĩzabetĩ nga mikera ĩsatu, neryo mwasuba eka wuwe.

Eributwa lya Yoane Mũbatĩsya

⁵⁷ Neryo omugulu wʼeributa lya Elĩzabetĩ mwahĩka, neryo mwabuta omũlwana.

⁵⁸ Neryo abalĩkyabo nʼabʼekĩtũnga kiwe mobowa ngoko Mukama abirimuganyira, neryo abosĩ mobatsema haguma naye.

⁵⁹ Neryo nʼoko kiro kyʼomunani mobasa erĩbanĩa omwana oyo; neryo mobasonda erimwahula mo Zakarĩa ngʼerĩna lyʼĨse wuwe.

⁶⁰ Nĩkwa nyĩnya wuwe mwasũbĩryabo ati, Iyihi, asyahulwa mo Yoane.

⁶¹ Mobamubwira bati, Sihali oyukahulawa omo lĩna erĩ omo kĩtũnga kyawe.

⁶² Neryo mobakoherya ĩse wuwe, erĩmũbũlya ngʼakasonda erimwahula mondi.

⁶³ Zakarĩa mwabũlya ekyʼerisakako, neryo mwasaka ati, Erĩna liwe yo Yoane. Neryo abosĩ mobasweka.

⁶⁴ Neryo-neryo Zakarĩa mwatoka erĩswabũga, nʼolulimi luwe molwagobokala, neryo mwatsũka eripipa Nyamuhanga.

⁶⁵ Nʼeriubaha molyahamba abosĩ ababya bĩkere hakũhĩ nabo; nʼengulu yʼemyatsi eyĩ moyalaba omo kihugo kyosĩ kyʼebitwa byʼeYũdea.

⁶⁶ Nʼabosĩ abowa omwatsi oyũ mobabikago omo mitima yabo, bati, Omwana oyũ asyabya ati kwehĩ? Kusangwa obũtokĩ bwʼomukama bwabya haguma naye.

Eriminyerera lya Zakarĩa

⁶⁷ Ĩse wuwe ye Zakarĩa mũsũlĩbwa nʼOmũlĩmũ Abũyĩrĩre, mwaminyerera ati,

⁶⁸ Tupipe Omukama Nyamuhanga wa Ĩsraelĩ! Kusangwa abĩrĩhĩka erĩwatĩkya abandu buwe, nʼerihabo obwĩranda

⁶⁹ Abĩrĩtũhanganĩrya Omũlamya wʼamaka, Omo kĩtũnga kyʼomugombe wuwe Dawĩdĩ.

⁷⁰ Abũga ebĩ byo kera omo buno bwʼabamĩnyererĩ buwe babũyĩrĩre.

⁷¹ Tũlamĩbawe oko nzĩgũ syetu, Nʼomo byala byʼabosĩ abakatũkwa obusu.

⁷² Erĩkangya eriganyira liwe oko botata wetu, Nʼeribuka endagane yiwe ĩbũyĩrĩre.

⁷³ Erĩlahĩrya eryo alahĩrĩraya tata wetu Abrahamũ.

⁷⁴ Atuhe erĩtongolĩbwa omo byala byʼeyonzĩgũ syetu, Itwamukolera butsira buba,

⁷⁵ Tubye babũyĩrĩre nʼabatunganene Embere siwe Omo biro byetu byosĩ.

⁷⁶ Nawe, mwana wage, wasyahulwa mo Mũmĩnyererĩ wʼOwendata Kutsibu. Kusangwa wasyatangirira embere syʼOmukama erĩowanĩa esyonzira siwe.

⁷⁷ Eriha abandu buwe eriminya lyʼerĩlamĩbwa Omo nzira yʼeribuyira ebibi byabo.

⁷⁸ Kusangwa Nyamuhanga wetu ni wʼomutima wʼeriganyira, Lyasyaleka omusakala wʼerilama akalũa endata ĩnĩahĩka erĩtũkolerya.

⁷⁹ Erĩkolerya oko bandu abĩkere omo mwĩrĩmya nʼomo kyũtũtũ kyʼoluholo, Erisondola ebisando byetu omo nzira yʼobuholo.

⁸⁰ Nʼomwana mwakula omo mubiri nʼeribya nʼamaka omo kĩrĩmũ kiwe; neryo mwasiba omo mbwarara erĩhĩka oko kiro ahuluka embere sya Ĩsraelĩ.