Ĩsaya 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Eributwa lyʼOmunya-mwami

¹ Nĩkwa obũlĩma-lĩma sibwendisyabya busana nʼoyo wabya omo bũlĩge. Oko mugulu wʼerĩmbere mwapona ekihugo kya Zebũlũnĩ nʼekihugo kya Nafũtalĩ, nĩkwa oko mugulu wʼenyũma asyayirakyo mo kyʼolukengerwa, omo nzira yʼengetsi, eyisirya wʼeYorodanĩ, eGalĩlaya yʼEbihanda.

² Abandu abakalendera omo mwĩrĩmya basyalangira ekyakakala kinene. Ababya bĩkere omo kihugo kyʼekyũtsũtsũ kyʼoluholo, ekyakakala kyasyakolerya kubo.

³ Wasyakanyĩrĩrya ekihanda, wasyakanyĩa obutseme bwabo. Basyatsema embere syawe ngʼobutseme bwʼamagese, ngʼabandu abakatsema omugulu bakagaba eminyego.

⁴ Kusangwa wasyabũnanga engomo yʼomuheke wuwe, nʼengonĩ oko bitigo byabo, nʼomũtso wʼomũnũbya wabo ngʼebiro byʼamalwa wʼeMĩdĩanĩ.

⁵ Kusangwa ebiryato byʼamalwa byosĩ byʼomundu Oyukambala ebiryato byʼamalwa omo mwaga oyo wʼamalwa, nʼesyongimba esyabĩrĩkũmbagalĩbwa omo musasi syasyabya busana nʼerĩhĩsĩbwa, busana nʼesyongwĩ syʼomuliro.

⁶ Kusangwa omwana asyabutwa busana netu, twasyahabwa omugala, Nʼobutabale bwasyabya oko bitigo biwe. Erĩna liwe lyasyahulwa mo Mũhanĩ Wʼeriswekera. Nyamuhanga Omũtokĩ, Tata Wʼerikota, Omunya-mwami Wʼobuholo.

⁷ Erikanya lyʼeritabala liwe ryʼobuholo siryendisyayira ndũlĩ, oko kĩtũmbĩ kyʼobwami bwa Dawĩdĩ nʼoko bwami buwe, erĩhanganĩabo nʼerĩsĩkyabo omo lĩbanza nʼomo litunganene, erĩtsũka lino nʼerĩhĩka kera na kera. Omũhwa wʼOmwami Mukulu wʼemilondo asyakola ekĩ.

Nyamuhanga akahitanira eriyipipa lya Ĩsraelĩ

⁸ Omukama mwalebeka ekĩnywa uku Yakobo, nakyo mokyawira Ĩsraelĩ.

⁹ Nʼabandu bosĩ basĩkyo, Efũraĩmũ nʼesyondũlanĩ syʼeSamarĩa, abakabũga omwʼiyiheka nʼomo butsibu bwʼomutima bati,

¹⁰ Amatofalĩ amatera, nĩkwa ĩtwe twasyahĩmba omo mabwe awatendere. Emiti yʼemĩsabũ yamakondwa, nĩkwa ĩtwe twasyahĩra emĩerezĩ omo mwanya wayo.

¹¹ Busana nʼekyo, Omwami Mukulu asyahanganĩa esyonzĩgũ sĩkalũa ewa Rezĩnĩ erilwa naye, kandi asyalwĩsĩsanĩa esyonzĩgũ syabo,

¹² Abasũrĩa oko luhande lwʼendata, nʼAbafĩlĩstĩnĩ oko luhande lwʼeyĩkwa, nabo basyalya Ĩsraelĩ nʼobuno bũtandĩre. Busana nʼebĩ byosĩ erihitana liwe sĩryetalũaho, nĩkwa ebyala biwe bĩkĩnayĩsũmbĩre.

¹³ Nĩkwa abandu sibebũnũkalira oyo wĩtabo, kandi sibesonda-sonda Omwami Mukulu wʼemilondo.

¹⁴ Kikaleka Omwami Mukulu iniatwa omutwe wa Ĩsraelĩ nʼomukira, Omutahi wʼobubondo nʼerĩsesa, omo kiro kiguma.

¹⁵ Omutwe yo mundu mukulu nʼomundu oyũsĩkĩbwe, nʼomũmĩnyererĩ oyũkakangĩrĩraya amabehĩ, go mukira.

¹⁶ Kusangwa abakasondola abandu aba bakaleka ibatala. Nʼabakasondolawa nabo babĩrĩlĩbanĩbwa.

¹⁷ Neryo Omukama sialitsemera abalwana babo, kandi sialiganyira esyongũbĩ syabo nʼabakwakalĩ. Kusangwa obuli mundu nĩ mũtsandĩrya nʼomukola-nabi, nʼobuli buno bũkabũga ebyʼobũkĩrũ. Kusangwa busana nʼebĩ byosĩ erihitana liwe sĩryetalũaho, nĩkwa ebyala biwe bĩkĩnayĩsũmbĩre.

¹⁸ Kusangwa ebibi bĩkahĩsaya ngʼomuliro, owakahĩsaya amahwa nʼemisakisaki. Ega, akakaya ebisaka byʼomolĩ, bĩkayĩtĩmbako endata ngʼendũyĩ yʼomũkĩ.

¹⁹ Busana nʼerihitana lyʼOmwami Mukulu wʼemilondo ekihugo kikahya. Abandu bali ngʼesyongwĩ syʼomuliro. Sihali mundu oyũkabalaya mugala wabo.

²⁰ Omuguma akatwa ebiri oko luhande lwʼamali, nĩkwa ĩnĩakĩnawĩrĩre, kandi bakalya ebiri oko luhande lwʼamalembe, kandi sibendĩsyũgũta. Obuli mundu akalya omũnyokũ wʼokuboko kuwe ĩyowene-wene.

²¹ Manase akalya Efũraĩmũ na Efũraĩmũ akalya Manase. Nabo ababiri haguma nĩ nzĩgũ sya Yũda. Busana nʼebĩ byosĩ erihitana liwe sĩryetalũaho, nĩkwa ebyala biwe bĩkĩnayĩsũmbĩre.