Ĩsaya 8 - AMASAKO ABOYTRTRE WA NYAMUHANGA AWAKAHULAWA MO BIBLIA

EDamaseke nʼeSamarĩa

¹ NʼOmwami Mukulu mwambwira ati, Ũyĩmĩraye ekisayi kinene, Usake kukyo omo masako manene-manene uti, Maherĩ-salalĩ-hasĩ-bazĩ, kiti, Erĩhũnga nʼerinyega bĩkahĩka lũba.

² Nawe ũyĩmĩraye abalangĩrĩ abateregula bʼerĩtũlago, ye Ũrĩa omũhererĩ na Zakarĩa mugala wa Yeberekĩa.

³ Nage monaya eyiri omũmĩnyererĩ wʼobũkalĩ naye mwaheka obukule, mwabuta mugala. Neryo Omwami Mukulu mwambwira ati, Uluke erĩna liwe mo Maherĩ-salalĩ-hasĩ-bazĩ.

⁴ Kusangwa omwana oyo asyabya ate aminya erĩbũga ati, Tata wage, na Koyo wage, ebindu byʼeDamasekĩ nʼeminyego yʼeSamarĩa byasyahekerwa embere syʼOmwami wʼeAsũrĩa.

⁵ Kandi Omwami Mukulu mwaswabũga nage ati,

⁶ Kusangwa abandu aba babirigana amagetsi wʼeSĩloa awakasenda bolo-bolo, ibakatsemera Rezĩnĩ, nʼomugala wa Remalĩa.

⁷ Neryo lino, lebaya, Omukama akahetũkĩrayabo amagetsi wʼolũsĩ Efũratĩ, awakalĩre nʼamangi, oyo ni mwami wʼeAsũrĩa nʼolukengerwa luwe losĩ. Nalo lwasyasa nʼerilaba omo syonzira syalo syosĩ, nʼeritswaga oko mikyingyi yalo yosĩ.

⁸ Kandi lwasyalaba erĩlolya eYũda. Lwasyatswaga nʼeritwangana. Lwasyahĩka oko bĩkya nʼeriyisanza lyʼebĩpũpa byalo lyasyũsũlya ekihugo kyawe, uwe Emanũelĩ.

⁹ Ĩnywe bandu mũbũnĩke, emitima ĩlũe omo nda; mutege amatwĩ, ĩnywe bosĩ bʼebihugo byʼehali. Mũyĩkũndĩke, nĩkwa emitima ĩlũe omo nda; mũyĩkũndĩke, nĩkwa emitima ĩlũe omo nda.

¹⁰ Mũyĩsũnze omwatsi nĩkwa akandĩsyakũba; mũbũge ekĩnywa, isikyendisyahangana; kusangwa Nyamuhanga ali haguma netu.

¹¹ Kusangwa litya, Omwami Mukulu mwabũga nage atya omo bũtokĩ bwʼamaka, mwanyĩkangĩrĩrya ati, Sinyigende omo nzira yʼabandu aba ati,

¹² Sũbũge uti, Nĩ mbĩta! Omo byosĩ ebyo abandu aba bakahula mo mbĩta. Kutse simubahe ebyo bakubaha, kutse eribya nʼobuba bwakyo.

¹³ Ni Mwami Mukulu wʼemilondo, iye yo mukandiahula mo mũbũyĩrĩre naye asyabya eriubaha lyenyũ, naye asyabya olubahwa lwenyũ.

¹⁴ Naye asyabya ahabũyĩrĩre, nĩkwa busana nʼebĩtũnga bibiri bya Ĩsraelĩ asyabya erĩbwe ryʼerĩtoya abandu, nʼerĩbwe ryʼerĩtwĩkalya abandu, nʼobuhya nʼekitego oko ndũlanĩ syʼeYerũsalema.

¹⁵ Nʼabangi basyatwĩkala, neryo basyawa nʼerĩbũnangika, neryo basyawa omo kitego nʼerihambwa.

Basondaye Nyamuhanga butsira abakũmũ

¹⁶ Ubohe erĩtũlago, ũhĩre ekĩbohĩ oko migambo omo katĩkatĩ kʼabiga bage.

¹⁷ Nage ngandirinda Omwami Mukulu, Oyũkabĩsa obũsũ buwe oko kihanda kya Yakobo, nage ngandimusonda-sonda nʼomũhwa.

¹⁸ Lebaya, ĩngye haguma nʼabana abo Mwami Mukulu abirimba, tuli busana nʼebiminyikalo nʼebyʼeriswekera omo Ĩsraelĩ bĩkalũa oko Mwami Mukulu wʼemilondo, oyo wĩkere oko Kitwa kyʼeSĩonĩ.

¹⁹ Omugulu basyakubwira bati, Mũkanaye nʼabandu abali kwʼesyombĩnga nʼabalagũlĩ, abakatsyora nʼabakabũgabũga, kwʼabandu sĩbangakanĩa na Nyamuhanga wabo kwehĩ? Bangakanĩa nʼabaholĩ busana nʼabaliho kwehĩ?

²⁰ Okwʼĩkangĩrĩrya nʼokwʼĩtũlago! Bamatĩndabũga ngʼekĩnywa ekĩ, ni kusangwa sibawite eryibuka.

²¹ Basyatwangana omo kihugo ibakagalawa nʼerĩkwa enzala, neryo omugulu basyakwa enzala, basyahitana nʼeritsuma omwami wabo na Nyamuhanga wabo, ĩbamalolya endata.

²² Neryo basyasamalira ekihugo, neryo lebaya, obũlĩge nʼomwĩrĩmya, obũlĩma-lĩma bwʼeriagalwa. Kandi basyahigirwa omo mũhĩndanĩa wʼenyahĩnda.