Ĩsaya 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Rezĩnĩ na Peka bakayalwa nʼeYerũsalema

¹ Neryo oko biro bya Ahazĩ mugala wa Yotamũ, mugala wa Ũzĩa, omwami wʼeYũda, Rezĩnĩ omwami wʼeSũrĩa, na Peka mugala wa Remalĩa, omwami wʼeĨsraelĩ, mobahetuka eriyalwa nʼeYerũsalema, nĩkwa mobatatoka erĩkĩndago.

² Kandi omugulu babwira ekĩtũnga kya Dawĩdĩ, bati, eSũrĩa yabirilagana na Efũraĩmũ. Neryo omutima wa Ahazĩ mwatitimana, nʼomutima wʼabandu buwe ngʼemiti yʼomũsĩtũ kwʼikatitimana omwʼihunga.

³ Neryo Omwami Mukulu mwabwira Ĩsaya ati, Uhongoke lino ũkayahĩndana na Ahazĩ, uwe, nʼomugala wawe Searĩ-yasũbĩ, oko ndũlĩ yʼomugende wʼekitsinga kyʼendata, omo nzira nene yʼeririma lyʼoyũkeraya esyongimba.

⁴ Umubwire uti, Ũtegaye, Ubye bũkũtũ; subahe, kutse omutima wawe sialembere, busana nʼemikira ĩbĩrĩ yʼebĩsĩnganĩkya ebĩkatũmba, busana nʼerihitana lĩkalĩre lya Rezĩnĩ nʼeSũrĩa, nʼomugala wa Remalĩa.

⁵ Kusangwa eSũrĩa, Efũraĩmũ, nʼomugala wa Remalĩa, babiriya embĩta nyibi busana nawe, bati,

⁶ Tuhetuke, eriyalwa na Yũda, nʼerĩũbahyago tuyire busana netu ekyũna omo syombĩmbo syako, tũhanganayemo omwami, ye mugala wa Tabeelĩ.

⁷ Omukama Omwami Mukulu ati, Ekyo sikyendisyahangana, kutse sikyendisyabya.

⁸ Kusangwa omutwe wʼeSũrĩa ni Damaseke, nʼomutwe wʼeDamaseke nĩ Rezĩnĩ. Nʼomo myaka makũmĩ ndatu nʼeyĩtanu (65) Efũraĩmũ asyabũnangwa mo bitswe-bitswe, isiendisyaswabya kihanda.

⁹ NʼeSamarĩa ni mutwe wa Efũraĩmũ, kandi mugala wa Remalĩa ni mutwe wʼeSamarĩa. Mwamatendĩkĩrĩrya, kwenene sĩmwendĩsyahanganĩbwa.

Erilaga lya Emanũelĩ

¹⁰ Kandi Omwami Mukulu mwaswabũga na Ahazĩ ati,

¹¹ Ũyĩbũlĩraye ekiminyikalo oko Mwami Mukulu, Nyamuhanga wawe. Ũbũlĩrayekyo eyĩkwa ngʼeKũlĩmũ kutse ahigulu ngʼolubula.

¹² Nĩkwa Ahazĩ mwabũga ati, Sĩnangabũlyakyo, kutse erirenga oko Mwami Mukulu.

¹³ Neryo mwabũga ati, Lino muhulikirire, ĩnywe kĩtũnga kya Dawĩdĩ! Ni mwatsi muke busana nenyũ erirenga eriyibombeka lyʼabandu, muti mukasonda erirenga eriyibombeka lya Nyamuhanga wage nibya kwehĩ?

¹⁴ Busana nʼekyo Omukama ĩyowene asyabaha ekiminyikalo: lebaya, omumbesa asyaheka obukule, naye asyabuta omugala, neryo asyahula erĩna liwe mo Emanũelĩ.

¹⁵ Asyalya amahondo nʼobuki, omugulu asyaminya erigana ebibi nʼeriyisoga ebibuya.

¹⁶ Kusangwa omũlwana oyo ate aminya erigana ebibi nʼeriyisoga ebibuya, ekihugo kyʼabami babiri abo ukubaha kyasyasĩganĩbwa.

¹⁷ Omwami Mukulu asyakuletako, nʼoko bandu bawe, nʼoko kĩtũnga kya tata wawe omwami wʼeAsũrĩa, ebiro bingaha ebite byahĩka erĩtsũka ekiro Efũraĩmũ ayigaba oko Yũda.

Erihera lya Yũda

¹⁸ Neryo oko kiro ekyo, Omwami Mukulu asyasyolya busana nʼeyĩsũkĩ eyiri oko ndũlĩ-ndũlĩ yʼesyonyũsĩ syʼeMĩsĩrĩ, na busana nʼenzuki eyiri omo kihugo kyʼeAsũrĩa.

¹⁹ Nasyo syasyasa ĩsĩkĩra omo misya ĩkalĩre, nʼomo matule wʼOlukuka lwʼamabwe nʼoko biti byosĩ byʼamahwa, nʼoko bitsinga byosĩ byʼamagetsi.

²⁰ Nʼoko kiro ekyo Omukama asyasĩsa omo lugembe olũgũlĩre omo bihugo eyisirya oko Lũsĩ Efũratĩ, yo mwami wʼeAsũrĩa, naye asyasĩsa omutwe, nʼobweya bwʼebisando, kandi asyasĩsa esyonderũ.

²¹ Neryo oko kiro ekyo, omundu asyalĩsya enyana, nʼesyombũlĩ ĩbĩrĩ.

²² Neryo, busana nʼobungi bwʼamasabũ syasyalũsya asyalya amahondo, kusangwa obuli muguma oyũkasĩgalira omo kihugo, asyalya amahondo nʼobuki.

²³ Neryo oko kiro ekyo, ehosĩ ahabya emĩrĩkĩ yʼebĩnyũ elfu nguma, eyabana obũgũlĩ bwʼebĩtsĩpa elfu nguma, hasyabya amahwa nʼemisakisaki.

²⁴ Omundu oyo wasyayayo asyaheka emisoha nʼobuta, kusangwa ekihugo kyosĩ kyasyabya mwʼamahwa nʼemisakisaki.

²⁵ Ebitwa byosĩ ebyalimawa omwʼĩsũka, sĩwendĩsyahĩkaho busana nʼeriubaha amahwa nʼemisakisaki. Nĩkwa byasyabya mwanya wʼerĩrĩsya esyonde, nʼahʼeriryatangwa nʼesyombũlĩ.