Ĩsaya 62 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũyĩsa wʼeSĩonĩ

¹ Busana nʼeSĩonĩ sindiendisyahuna, na busana nʼeYerũsalema Sindiendisyabya bũkũtũ, erĩhĩkĩra aho eritunganene lyago lyasyahuluka ngʼerĩkangabasanĩa, nʼerilama lyago ngʼoluseke olukaka.

² Ebihanda byasyalangira eritunganene lyawe, nʼabami bosĩ basyalangira olukengerwa lwawe. Nawe wasyahulwa omo lĩna lihya-lihya eryo buno bwʼomwami Mukulu bwasyahula.

³ Nawe Wasyabya nibya nʼembĩta yʼamalya-bindu yʼerikanga omo byala byʼOmwami Mukulu, nʼakakĩra kʼobwami omo byala bya Nyamuhanga wawe.

⁴ Siwendisyaswahulwa mo Mũsĩgwa, kutse ekihugo kyawe sikyendisyaswahulwa mo Mulala. Nĩkwa wasyahulwa mo Mutsemerwa wage, nʼekihugo kyawe mo Beũla ahikĩbwe, kusangwa Omwami Mukulu akakutsemera, nʼekihugo kyawe kyasyamuherukirako.

⁵ Kusangwa ngoko omũlwana akaherũkaya omumbesa, litya abagala bawe ko basyakũhĩkya batya. Kandi ngoko ĩba wʼomũherũkĩ akatsemera Omũherũkĩ, Nyamuhanga kwʼasyakutsemera atya.

⁶ Nabĩrĩkũhĩrĩra omũteya oko mbĩmbo syawe, Uwe Yerũsalema, sibendisyabya bũkũtũ omo musibo gosĩ nʼomo kiro kyosĩ. Ĩnywe mũkĩbũkaya Omwami Mukulu, Simubye bũkũtũ,

⁷ kandi simuleke akaluhuka erĩhĩka aho asyahangania nʼeriyira eYerũsalema eribya eripipwa omo kihugo.

⁸ Omwami Mukulu abĩrĩlahĩrya omo byala biwe byʼamali nʼomo kuboko kwʼamaka wuwe, ati, Kwenene sindiendisyaswaha engano yawe, eribya kalyo busana nʼesyonzĩgũ syawe, kandi abʼehandi sĩbendĩsyaswapũlya ebĩnyũ byawe bihya-bihya, ebyo wabirikumbira.

⁹ Nĩkwa abakagesayo basyalyayo, nʼeripipa Omwami Mukulu, nʼabakohabyo basyapũlyabyo omo bibuga byʼahabũyĩrĩre hage.

¹⁰ Mulabe, mulabe omo syongyo. Muhigulire enzira busana nʼabandu. Mũhĩmbe, mũhĩmbe embalu nene; Mũlũsaye amabwe go muyo. Musumbe ebendera busana nʼebihanda.

¹¹ Lebaya, Omwami Mukulu abĩrĩtũlago. Erĩhĩka oko ndũlĩ yʼekihugo, Mubwire mwali wʼeSĩonĩ muti, Lebaya omulamo wawe akasa. Lebaya, oluhembo luwe luli haguma naye, Nʼeririha liwe liri embere siwe.

¹² Nabo basyahulabo mo kihanda kĩbũyĩrĩre, Abatongolĩbawa bʼOmwami Mukulu. Nawe wasyahulwa mo, Oyo Wasonda-sondĩbawa, Omũyĩ owatesĩganĩbawa.