Ĩsaya 61 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akaleta omũyĩsa uku Sĩonĩ

¹ Omũlĩmũ wʼomukama Omwami Mukulu anyiriko, kusangwa Omwami Mukulu abĩrĩnyĩhakabya amagũta, nyirete engulu yowene oko bandu abakagalawa. Abirinyituma erilunga ababũnĩkĩre omo mutima, erĩtũlĩra ababohĩre obwĩranda nʼerikingulira abandu bʼomũlĩkĩ,

² erĩtũlago oko mwaka wʼolukogo lwʼOmwami Mukulu, nʼekiro kyʼerĩkĩsya kya Nyamuhanga wetu, erĩkĩranĩa abosĩ abakalira,

³ eriha abandu abakalirira eSĩonĩ, erihabo omusanga wʼeriambala omo mwanya wʼerĩbũ, nʼamagũta wʼobutseme omo mwanya wʼeririra, nʼolukimba lwʼeripipa omo mwanya wʼekĩrimũ kikalembera. Ibabana eriahulwa mo miti yʼeterebĩntĩ yʼeritunganene, eyaherawa nʼOmwami Mukulu, atoke erikengwa.

⁴ Nabo basyaswahĩmba ebĩma bya kera, basyahanganĩa ebyatĩndawa erĩmbere, kandi basyasũbya emĩyĩ eyatogotĩbawa, ebĩma byʼesyondengo nyingi.

⁵ Abʼehandi basyahangana nʼerĩrĩsya ebihangulo byenyũ, nʼabʼehandi basyabya abalimi benyũ nʼabalĩmĩrĩ bʼemĩrĩkĩ yʼebĩnyũ yenyũ.

⁶ Nĩkwa ĩnywe mwasyahulwa mo bahererĩ bʼOmwami Mukulu. Basvabahula mo bagombe ba Nyamuhanga wetu. Mwasyalya obukamahe bwʼebihanda, kandi omo bindu byabo mwasyayihalamba.

⁷ Omo mwanya wʼesĩsonĩ syenyũ mwasyabya nʼamagabo abiri, nʼomo mwanya wʼerihemulwa basyũta obogo bwʼeritsemera erĩgabo lyabo. Busana nʼekyo basyasĩgalya amagabo abiri omo kihugo kyabo. Obutseme bwʼerikota bwasyabya bwabo.

⁸ Kusangwa ĩngye, Mwami Mukulu nyanzĩre erĩbanza litunganene, ngagalirawa oko bũrahĩ omo buhere bwʼerĩokererya. Ngandisyahabo eririha lyabo omo kwenene, kandi nasyalagana nabo endagano ya kera na kera.

⁹ Neryo abana babo basyaminyikala omo bihanda, nʼabana babo basyaminyikala omo katĩkatĩ kʼabandu. Abosĩ abakalola kubo basyaminyabo, kusangwa ni bana abo Mwami Mukulu abiritsumula.

¹⁰ Nasyatsemera Omwami Mukulu kutsibu, omutima wage asyatsema uku Nyamuhanga wage, kusangwa abĩrĩnyambalya esyongimba syʼomulamo, abirinyiswika ekanzu yʼeritunganene, ngʼĩba wʼomũherũkĩ akayisitika omo kikoba kyʼomusanga, kandi ngʼomũherũkĩ oyukayisitika omo mabwe wuwe awakangĩre gʼobũgũlĩ.

¹¹ Kusangwa ngoko ekitaka kĩkalasaya emigera yakyo, kandi ngʼeririma lĩkalasaya ebyaherawa mulyo: litya Omukama Omwami Mukulu asyahanganĩa eritunganene nʼeripipa embere syʼebihanda byosĩ.