Ĩsaya 58 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akakunga abʼomutima akalĩre

¹ Mulake kutsibu, sĩmũkakĩrayego. Musumbe omulenge wenyũ ngʼengubĩ, mubwire abandu bage amalolo wabo, mubwire ekĩtũnga kya Yakobo ebibi byakyo.

² Nĩkwa bakanyisonda-sonda ebiro byosĩ, bakatsema eriminya enzira yage, ngʼekihanda ekyakola eritunganene, nʼerĩtĩndasĩganĩa ebilayiro bya Nyamuhanga wabo. Bakanyĩbũlaya erĩtwa omwatsi omo lĩbanza litunganene, bakatsema kusangwa Nyamuhanga ali hakũhĩ.

³ Busana nakĩ twabiritsira akalyo, nawe sulitalangiralyo kwehĩ? Busana nakĩ twabĩrĩyĩkehya, nawe suliminya kwehĩ? Lebaya, oko kiro kyʼeritsira akalyo lyenyũ mukabana ebĩkabatsemesaya, nʼerĩnũbya abakakola emĩbĩrĩ yʼĩnywe bosi.

⁴ Lebaya, mukatsira akalyo busana nʼamalwa nʼerinegena, nʼerĩswĩrya omo ngũmbe nyibi. Simwetsira kalyo ngoko mukakola mũnabwĩre erĩowĩsya emirenge yenyũ yʼendata.

⁵ Ko ni ʼtsira akalyo ngʼeritsira eryo nabiriyisoga kwehĩ? Ekiro busana nʼomundu erĩyĩkehya kwehĩ? Nĩ ũnamya omutwe wuwe ngʼerĩsesa, kutse erisanza emisarandwe nʼerĩbũ ngʼengyingo kwehĩ? Mwasyahula erĩ mwʼitsira akalyo, nʼekiro kyʼerĩsĩmwa nʼOmwami Mukulu kwehĩ?

⁶ Eritsira akalyo eryo nabiriyisoga, sĩ ryerĩ; eribohola emĩrĩkĩ yʼebibi, nʼerĩkũndũla emĩrĩkĩ yʼengomo nʼerireka abakanũbĩbawa babane obwĩranda, nʼerĩtwa obuli ngomo kwehĩ?

⁷ Si rye rigabira akalyo kawe abakwĩre enzala, kandi eritwala abera abatawite nyũmba eriretabo omo nyũmba kwehĩ? Kandi omugulu ukalola oko yuli ndũmbũ, iwamuswika, kutse si rye ritindayĩbĩsa oko yuli nʼomubiri muguma nawe kwehĩ?

⁸ Neryo ekyakakala kyawe kyasyahuluka ngʼomusakala, nʼerisuba lyawe lyasyabuluka lũba-lũba nʼeritunganene ryawe lyasyagenda embere syawe, nʼolukengerwa lwʼOmwami Mukulu lwasyabya mũteya wawe enyũma syawe.

⁹ Neryo wasyabirikira, nʼOmwami Mukulu asyakwitaba. Wasyalaka naye asyabũga ati, Nandi hano. Wamalũsya engomo omo katĩkatĩ kawe, nʼerĩkanganĩa omunwe, nʼerĩbũga nabi,

¹⁰ wamasanzulira omutima wawe oko bakwĩre enzala, nʼerĩũgũtya emitima yʼabandu abakagalawa, neryo ekyakakala kyawe kyasyakangamuka omo mwĩrĩmya, nʼobũlĩma-lĩma bwawe bwasyabya ngʼeritungi.

¹¹ Kandi Omwami Mukulu asyakusondola emigulu yosĩ, nʼerĩũgũtĩrya omutima wawe omo myanya yũmĩre, nʼerĩkala-kalya amakũha wawe. Kandi Wasyabya ngʼeririma lyahĩrawa mwʼamagetsi, kandi ngʼengũnũnũko yʼamagetsi, amagetsi wayo sialiuma.

¹² Nʼabandu bakalũa omo katĩkatĩ kenyũ basyahĩmba omo bĩma bya kera. Wasyahanganĩa ebibanza bya kera, kandi wasyahulwa mo mundu oyũkasũbaya ahasambukere, omũsũbya wʼesyonzira syʼerĩĩkalamo.

¹³ Wamakĩtya ekisando kyawe busana nʼeSabato, eritindakola ebĩkakũtsemesaya oko kiro kyage kĩbũyĩrĩre, igukahula eSabato mo butseme, nʼekĩbũyĩrĩre kyʼOmwami Mukulu mo kyʼerikengwa. Inũkasĩkayakyo, butsira erikola emitsye yawe, kutse erisonda-sonda ebĩkakũtsemesaya, kutse erĩbũga ebĩnywa byawe bisa.

¹⁴ Neryo wasyayĩtsemesya omo Mwami Mukulu, nage nasyakũlabya ngʼomukulu omo kihugo. Kandi nasyakũlĩsya omwandu wa tata wawe Yakobo, kusangwa obuno bwʼomwami Mukulu bwabĩrĩbũgakyo.