Ĩsaya 56 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũyĩsa wʼabandu abakakwama Omwami Mukulu

¹ Omwami Mukulu akabũga ati, Mũtegaye erĩbanza litunganene, kandi mukole eritunganene, kusangwa omulamo wage ali hakũhĩ nʼerĩhĩka, nʼeritunganene lyage lyasyabĩsũlwa.

² Omũyĩsa ali oko mundu oyukakola ebĩ, nʼomugala wʼomundu oyukahambabyo kutsibu, oyũkategaya eSabato siaketeyo, nʼerĩteya ebyala biwe sibikole kibi nʼekiguma.

³ Owʼehandi oyukamatana nʼOmwami Mukulu, sĩabũge ati, Omwami Mukulu asyanyisolola kwenene omo bandu buwe; kutse oyũkonĩre sĩabũge ati, Lebaya, indi muti ũmĩre.

⁴ Kusangwa Omwami Mukulu akabũga busana nʼabakonĩre abakategaya esyo Sabato syage, nʼeriyisoga emyatsi eyĩkanyĩtsemesaya, nʼerĩteya ndeke endagano yage, ati,

⁵ Nasyahabo omo nyũmba yage nʼomwisi wʼesyombĩmbo syage ekĩbũkyo, nʼerĩna libuya erĩlabĩre eryʼabagala nʼeryʼabali. Nasyahabo erĩna lyʼerikota erĩtendĩsyalũsĩbwaho.

⁶ Nibya abʼehandi abakamatana nʼOmwami Mukulu, abakamukolera, nʼerianza erĩna lyʼOmwami Mukulu, eribya bagombe buwe, obuli mundu oyũkategaya eSabato, ateketayo, ĩnĩakatagaya kutsibu endagano yage.

⁷ Nasyaletabo oko kitwa kyage kĩbũyĩrĩre nʼerĩtsemesyabo omo nyũmba yage yʼerisaba. Amahere wabo wʼerĩokererya nʼesyohongo syabo syasyalĩgwa oko kiherero kyage, kusangwa enyũmba yage yasyahulwa mo nyũmba yʼerisabiramo busana nʼebihanda byosĩ.

⁸ Omukama Omwami Mukulu, oyũkahĩndanaya abapanzawa ba Ĩsraelĩ, akabũga ati, Nasyahindanĩrya kubo abandi, ukwʼabo babĩrĩhĩndanĩbwa.

Obũkĩrũ bwʼabandu

⁹ Ĩnywe nyama syosĩ syʼomolĩ, ĩnywe nyama syosĩ syʼomo mũsĩtũ, mwase mulye.

¹⁰ Abateya ba Ĩsraelĩ nĩ ndĩma-tĩme, abosĩ sĩbasĩ kindu. Abosĩ ni mbwa-mũmũ, sisyetoka erisemba, sikalota sikabundama ahisi, esikanza eriyato.

¹¹ Ega, esyombwa esyo ni syʼomururu, sĩsyũgũta. Kandi nĩ balĩsya batawite eriminya. Abosĩ babirikitira omo nzira syabo, obuli mundu oko ndũndĩ yiwe eyite kwenene, erĩhĩka oko wʼenyũma-nyũma.

¹² Bakabũga bati, Mwase, twĩmaye ebĩnyũ, kandi tũkũnde omo bũhĩre. Nʼomo ngyakya yasyabya nga mũnabwĩre, na kwilaba aho.