Ĩsaya 52 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akalamaya abandu buwe

¹ Ubuke, ubuke, wambale amaka wawe, uwe Sĩonĩ; Wambale esyongimba syawe nyibuya, Uwe Yerũsalema, omũyĩ abũyĩrĩre. Kusangwa abatabwene nʼabatsandĩrya Sibendisyaswingira umʼuwe.

² Uvikungute kʼolũtũtũ; uhangane, Uwe Yerũsalema, omũhũngwa. Uyibohole kwʼamahulula oko bĩkya byawe, Uwe mwali wʼeSĩonĩ oyo wahũngawa.

³ Kusangwa Omwami Mukulu ati, Mwagũlĩbawa mo busa, kandi mwasyatongolĩbwa butsira franka.

⁴ Kusangwa Omukama Omwami Mukulu ati, Abandu bage mobandagalira eMĩsĩrĩ erĩmbere eribungirayo. Neryo Abasũrĩa mobanũbyabo busa.

⁵ Neryo lino, Omwami Mukulu ati, Ngwite hano hokĩ kwehĩ? Kusangwa abandu bage bakatwalawa busa. Kandi abakatabalirabo bakabũgaya olukanda, Omwami Mukulu atya, kandi nʼerĩna lyage likatsumawa luguma-guma omo musibo gosĩ.

⁶ Busana nʼekyo, abandu bage basyaminya erĩna lyage. Busana nʼekyo oko kiro ekyo nĩ ngye oyũkabũga ati, Ĩngye yono hano.

Mutsemere erilama lyʼeYerũsalema

⁷ Ni kibuya erĩowa erĩhĩka lyʼoyukaleta engulu yowene oko bitwa, Oyũkatũla engulu yʼobuholo, Oyukaleta engulu yowene yʼeritsema, Oyũkatũla omwatsi wʼomulamo, Oyukabwira Sĩonĩ, ati, Nyamuhanga wawe yukatabala!

⁸ Muhulikirire! abateya bawe bakasumba emirenge Bakũta obogo nʼobutseme haguma. Kusangwa basyalangirana erĩso nʼerĩso, Omugulu Omwami Mukulu asyasũbya eSĩonĩ.

⁹ Mũtũlego mũte obogo nʼobutseme haguma, Ĩnywe myanya yʼemilala yʼeYerũsalema; Kusangwa Omwami Mukulu abĩrĩkĩranĩa abandu buwe, Abĩrĩtongolya eYerũsalema.

¹⁰ Omwami Mukulu abiriswikula okuboko kuwe kũbũyĩrĩre, Omo meso wʼebihanda byosĩ. Esyondũlĩ syosĩ syʼekihugo sitoke erilangira Omulamo wa Nyamuhanga wetu.

¹¹ Mũlũeho, mũlũeho, mugende mũlũeho, sĩmũtũle oko kindu kĩtĩsĩrĩre. Mũlũe omo katĩkatĩ kago, mũyeraye, ĩnywe mukaheka ebindu byʼOmwami Mukulu.

¹² Kusangwa sĩmwendĩsyalũamo lũbalũba, kutse simwendisyagenda mukatswa, kusangwa Omwami Mukulu asyababera embere, na Nyamuhanga wa Ĩsraelĩ asyabya mũteya enyũma syenyũ.

¹³ Lebaya, omugombe wage asyagasa, asyabya endata nʼerisumbirwa endata, asyahamĩbwa kutsibu.

¹⁴ Ngoko abandu bangi babaswekera, ĩnywe bandu bage litya erisosa liwe molyahũtalĩbwa kwilaba ogundi mundu, nʼekisosano kiwe mokyatsandĩbwa kwilaba bagala bʼabandu,

¹⁵ neryo asyasĩsĩrya ebihanda bingi. Abami basyamũkũmbĩra amuno wabo. Kusangwa ebyo bate babwirwa basyalangirabyo, nʼebyo bate bowa basyaminyabyo.