Ĩsaya 51 - AMASAKO ABOYTRTRE WA NYAMUHANGA AWAKAHULAWA MO BIBLIA

Munyihulikirire ĩnywe bandu bage

¹ Munyihulikirire, ĩnywe mukakwama ebitunganene, ĩnywe mũkasondaya Omwami Mukulu. Mũyĩtegereraye erĩbwe eryo mwabatsawamo, nʼoko kyũna kyʼobuhya ekyo mwatakulawamo.

² Musamalire Abrahamũ tata wenyũ, na Sara oyo wababuta omo bũlĩge, kusangwa namubirikira omugulu abya muguma, kandi monamutsumula, nʼerimuyira mo bangi.

³ Kwenene Omwami Mukulu asyakĩranĩa eSĩonĩ. Abĩrĩsĩbĩkya emilala yiwe yosĩ. Kandi nasyayira embwarara yiwe nga Edenĩ, nʼolukurutsu luwe ngʼeririma lyʼOmwami Mukulu. Obutseme nʼeritsanga byasyabanika mugo, eriha ewasĩngya, nʼomulenge wʼolwimbo.

⁴ Munyihulikirire ĩnywe bandu bage, munyitegere amatwĩ, uwe kihanda kyage. Kusangwa nasyahũlũkya omugambo, kandi nasyahanganĩa erĩbanza lyage litunganene eribya kyakakala busana nʼebihanda.

⁵ Eritunganene ryage liri hakũhĩ, nʼomulamo wage abirihongoka, nʼamaboko wage asyatswera ebihanda. Emĩsĩke yʼengetsi yasyanyirinda, kandi basyalinda nʼamaha okuboko kwage.

⁶ Musumbire ameso wenyũ wʼelubula, neryo musamalire ekihugo kyʼeyĩkwa, kusangwa olubula lwasyabulirayo ngʼomũkĩ, nʼekihugo kyasyakula ngʼolukimba, nʼabĩkere mukyo basyahola batya. Nĩkwa omulamo wage asyabyaho kera na kera, nʼeritunganene ryage siryendisyakeha.

⁷ Munyihulikirire, ĩnywe mwasĩ ekitunganene, abandu abʼomutima ali omo bihano byage. Simubahe ebĩtsũmĩ byʼabandu, kutse simusweke busana nʼemihayo yabo.

⁸ Kusangwa ekinyurugunzu kyasyalyabo ngʼolukimba, nʼenzokombĩ yasyalyabo ngʼobweya bwʼembũlĩ, nĩkwa eritunganene ryage lyasyabyaho kera na kera, nʼomulamo wage oko ndengo syosĩ.

Omwami Mukulu akaleta obutseme oko Sĩonĩ

⁹ Ubuke, ubuke, wambale amaka, Uwe kuboko kwʼOmwami Mukulu, Ubuke ngʼebiro bya kera Ngʼesyondengo syʼemigulu ya kera. Si we watsũtsanga Rahabũ mo bitswebitswe kwehĩ? Si we watsimita enzoka nene eyo kwehĩ?

¹⁰ Si we wũmaya engetsi, amagetsi wʼemirindi; Oyo wayira emirindi yʼengetsi mo nzira, Busana nʼabatongolĩbawa balabemo kwehĩ?

¹¹ Litya abatongolĩbawa bʼOmwami Mukulu basyasubula, Nʼerĩhĩka eSĩonĩ ĩbakũta obogo nʼobutseme. Obũlĩge nʼerihumulikana byasyatibita.

¹² Ĩngye nĩna ngye, oyo yũkakũkĩranaya. Uwendi, uti ukubaha omundu oyukasyatũla, nʼomugala wʼomundu oyukayirawa ngʼebiti,

¹³ iwabiribirirwa Omwami Mukulu Omũhangĩkĩ wawe, oyo wabamba olubula, nʼoyo wahĩra ebibanza byʼekihugo; uti ukubaha omo musibo gosĩ busana nʼerihitana lĩkalĩre lyʼomũnũbya omugulu akasĩka erĩherya kwehĩ? Nĩkwa erihitana lĩkalĩre lyʼomũnũbya liri hahi kwehĩ?

¹⁴ Omundu wʼomũlĩkĩ oyo, asyaboholwa lũba-lũba. Siendisyahola omo buhya, kutse akalyo kuwe sikendisyakeha.

¹⁵ Kusangwa ĩngye indi Mwami Mukulu, Nyamuhanga wawe, oyũkagũngaya engetsi, nʼebisunda byayo ibyahuha. Omwami Mukulu wʼemilondo lyo lĩna liwe.

¹⁶ Kandi nabĩrĩhĩra ebĩnywa byage omo buno bwawe, nabirikuswika omo kyũtsũtsũ kyʼebyala byage, inatoka erihanda olubula, nʼerĩhĩra ebibanza byʼekihugo, nʼeribwira eSĩonĩ nyiti, Muli bandu bage.

¹⁷ Ũyĩbũkaye! Ũyĩbũkaye! Uhangane, uwe Yerũsalema, Uwe wapũlĩraya oko byala byʼOmwami Mukulu Olũtehĩ lwʼerihitana liwe. Wabĩrĩpũlya ekibindi kyʼolũtehĩ lwʼerĩtwĩkangalya Wabiribugalo.

¹⁸ Sihali owʼerimusondola, Omo katĩkatĩ kʼabagala bosĩ abo abuta, Kutse sihali oyo wangamuwata oko byala, Omo katĩkatĩ kʼabagala bosĩ akũlaya.

¹⁹ Emyatsi ĩbĩrĩ eyĩ yabirikubyako; Nindi wasyakulirirako kwehĩ? Erĩtsandya nʼerĩtogotya, nʼenzala nʼomũyalĩ; Nasyakũkĩranĩa nyiti kwehĩ?

²⁰ Abagala bawe babirirembera, Bagotsere oko ndũlĩ yʼesyonzira syosĩ, Ngʼengabi omo butaha-taha. Boswĩre kwʼerihitana lyʼOmwami Mukulu, Erikunga lya Nyamuhanga wawe.

²¹ Busana nʼekyo, kĩsĩ-kĩsĩ uhulikirire ekĩ, uwe wendererĩbawa, oyukatamira, nĩkwa butsira omo bĩnyũ.

²² Omukama wawe atya, Omwami Mukulu, na Nyamuhanga wawe, oyukimanira omwatsi wʼabandu buwe ati, Lebaya, nabĩrĩlũsya omo byala byawe olũtehĩ lwʼerĩtwĩkangalya, ekyo kye kibindi kyʼolũtehĩ lwʼerihitana lyage, sĩwendĩsyaswapũlyalo kandi.

²³ Kandi nasyahĩralo omo byala byabo abakakwagalaya, ababirikubwira bati, ugotsere ahisi, tubane erikulyatirirako. Nawe mowahĩra omugongo wawe ngʼekitaka, kandi ngʼenzira busana nʼabandu erilaba kugo.