Ĩsaya 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼeririma lyʼebĩnyũ

¹ Uleke nyimbire omwanze wage yʼolwimbo lʼomwanze wage busana nʼeririma liwe lyʼebĩnyũ. Omwanze wage abya nʼeririma lyʼebĩnyũ oko kitwa kĩbogĩre.

² Naye mwatakulalyo, mwalũsya amabwe awabya mulyo, mwahera mulyo omũlĩkĩ wʼebĩnyũ owabya owenenga, kandi mwahĩmba enyũmba eyĩsũngũlĩkĩre yo mulyo, kandi mwatakula mulyo mwʼekikamiro; neryo mwabya nʼamaha ati likandisyabuta ebĩnyũ byowene, nĩkwa molyabuta ebĩnyũ bitya-bitya.

³ Neryo lino, ĩnywe ndũlanĩ syʼeYerũsalema nʼabandu bʼeYũda, musohe omo katĩkatĩ kage nʼeririma lyage lyʼebĩnyũ.

⁴ Nangatokĩre erikolakĩ busana nʼeririma lyage lyʼebĩnyũ kwilaba ekyo nakoleralyo kwehĩ? Busana nakĩ, omugulu nabya nʼamaha nyiti likandibuta ebĩgũma byʼebĩnyũ byowene mobabuta ebĩgũma bitya-bitya kwehĩ?

⁵ Na lino uleke nyibabwire ekyo nasyakolera eririma lyage lyʼebĩnyũ. Ngandĩlũsyaho ekikunda kyalyo, lyasyahĩsĩbwa. Kandi ngandĩhĩmbũla olũhĩmbo lwalyo, nalyo lyasyalyatangirirwa oko kitaka.

⁶ Nage nasyaheryalyo, siryendisyakolerwa kutse eririmirwa, nĩkwa hasyalasa emisakisaki nʼamahwa. Nibya nasyahana ebĩtũ nyiti sĩbĩwĩsaye embũla yo kulyo.

⁷ Kusangwa eririma lyʼebĩnyũ lyʼOmwami Mukulu wʼemilondo ni kihanda kyʼeĨsraelĩ, nʼabandu ba Yũda bo mwaka wʼerĩmũtsemesya. Neryo mwabya nʼamaha wʼerĩbanza, nĩkwa lebaya erĩũta omusasi musa, abya nʼamaha erilola okwʼitunganana, nĩkwa lebaya, kwesĩ ni milake yʼobũlĩge.

Amalĩge uku Ĩsraelĩ

⁸ Obũlĩge ukwʼabo abakatomeka enyũmba oko yindi, nʼabakahĩra eririma omo lindi, erĩhĩka aho isihakiri mwanya, nenyũ ĩmwabĩrĩhĩrwa erĩĩkala ĩnywebene omo katĩkatĩ kʼekihugo!

⁹ Omwami Mukulu wʼemilondo ati, akabũgĩra omo matwĩ wage, ati, Kwenene amanyũmba mangi asyabya bĩhũma nomo angabya manene nʼamabuya, isiali mo bandu.

¹⁰ Kusangwa ehectares 40 yʼebĩnyũ yasyahetya esyolĩtere 40, syʼebĩnyũ nʼebitiri ĩkũmĩ byʼembuto byasyabuta ekitiri kiguma kyʼengano.

¹¹ Obũlĩge ukwʼabo abakatsinduka omo ngyakya-ngyakya bati bakwame obũhĩre kutsibu, abakasiba omo kiro, erĩhĩka aho ebĩnyũ bĩkatamĩrĩrayabo!

¹² Nʼenanga nʼenyamulera, nʼamatarĩ, nʼerĩrenga, nʼebĩnyũ, ebiri omwʼirya ĩnene ryabo, nĩkwa sibetungerera emĩbĩrĩ yʼOmwami Mukulu, kutse sĩbelengekanaya emĩbĩrĩ yʼebyala biwe.

¹³ Busana nʼekyo abandu bage babĩrĩhũngwa busana nʼeribula amenge. Kandi abandu babo abasĩkĩbwe bakwĩre enzala, nʼendeko yabo yĩkwĩre enyota.

¹⁴ Neryo eKũlĩmũ yabiritomekera esyongumbu syayo, kandi yabirisanza obuno bwayo butsira lulengo. Obubuya bwʼeYerũsalema, nʼendeko yaho, nʼolukanda lwaho, nʼoyukatsema omo katĩkatĩ kaho, bikandagaliramo.

¹⁵ Omundu molo asyahemuka, nʼomundu mukulu asyakehĩbwa, nʼameso wʼoyukayiheka asyakehĩbwa.

¹⁶ Nĩkwa Omwami Mukulu wʼemilondo asyahamĩbwa omwʼitswera, na Nyamuhanga oyũbũyĩrĩre asyayĩkangya mo mũbũyĩrĩre omo litunganene.

¹⁷ Oko mugulu oyo ebyana byʼembũlĩ byasyalya ebiti ngʼomo lũlĩsĩryo lwasyo, nʼabʼehandi basyalira omo bĩma byʼabandu bʼebindu.

¹⁸ Obũlĩge ukwʼabo abakakurubana ebibi omo bikoba byʼamabehĩ, nʼerĩlolo omo lukoba ngʼolwʼegalĩ!

¹⁹ Abakabũga bati, Anguhe, angũhaye omũbĩrĩ wuwe, tulole kugo. Kandi erĩyĩtsũtsa lyʼOyũbũyĩrĩre wa Ĩsraelĩ lisegere hakũhĩ, libererere itwatoka eriminyalyo!

²⁰ Obũlĩge ukwʼabo abakahula ebibi mo bibuya, nʼebibuya, mo bibi; abakayira omwĩrĩmya mo kyakakala, nʼekyakakala mo mwĩrĩmya; abakahĩra ekĩkalĩhĩre mo kĩsĩhĩre, nʼekĩsĩhĩre mo kĩkalĩhĩre!

²¹ Obũlĩge ukwʼabo abali nʼamenge oko meso wabo, bati ni bagenge omo meso wabo!

²² Obũlĩge ukwʼabo abali nʼobulume-lume erĩnywa ebĩnyũ, nʼabandu bʼamaka erĩtũlũnganĩa obututsi;

²³ abakayira omundu mubi mo mutunganene busana nʼesigulo, nʼerinyega eritunganene oko yutunganene!

²⁴ Neryo ngʼekirimi kyʼomuliro ko kikalya esyombuba, kandi ngʼobunyatsi bũmĩre bukawa omo kirimi kyʼomuliro, ko mũlĩhĩ wabo asyabya ngʼerihonda, nʼomusanga wabo asyaguluka ngʼolũtũtũ. Kusangwa babirigana emigambo yʼOmwami Mukulu wʼemilondo, kandi babiripona ekĩnywa kyʼOyũbũyĩrĩre wa Ĩsraelĩ.

²⁵ Busana nʼekyo erihitana lyʼOmwami Mukulu likaka oko bandu buwe, kandi abirisumba ebyala biwe erilwa nabo nʼerĩswĩryabo ahisi. Ebitwa mobyatitimana, nʼebĩnda byabo byabiribya ngʼekyabũ omo katĩkatĩ kʼenzira. Busana nʼemyatsi eyĩ yosĩ erihitana liwe sĩryetalũaho, nĩkwa ebyala biwe bĩkĩnasũmbĩre.

²⁶ Naye asyasumbira ebihanda ebĩkalũa ahali ebendera, kandi asyasyolya busana nabyo oko ndũlĩ yʼekihugo. Neryo lebaya, basyanguha eriasa lũba.

²⁷ Sihali omo katĩkatĩ kabo oyo wasyaluha kutse erĩtwĩkala. Sihali oyo wasyayitsingirako kutse eriyato. Kutse emikoba yʼomo mbindi syabo siyendisyalega-lega, kutse omũlĩkĩ wʼesyongendero syabo sĩendĩsyatwĩka.

²⁸ Emisoha yabo ĩtwĩre, nʼamata wabo gosĩ akũnyĩrwe, nʼebigere byʼesyosabayĩrĩ syabo bikasosa ngʼamabwe wʼemitero, nʼebĩrĩngo byabo byʼegalĩ bikasosa akanyabungu.

²⁹ Eriruruma lyabo lyasyabya ngʼendale yʼobũkalĩ, basyaruruma ngʼebyana byʼendale, ega, basyaruruma omugulu ikahamba enyama, nʼeritwalayo, isihali oyo wanganyegũlyayo.

³⁰ Nabo basyarurumirayo oko kiro ekyo, ngʼeriruruma lyʼengetsi. Omundu amasamalira ekitaka, lebaya, nĩ mwĩrĩmya nʼerikukubala, nʼekyakakala ekyo kikabya mwĩrĩmya omo bĩtũ byayo.