Ĩsaya 47 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akatswera eBabelĩ

¹ Uwe mumbesa mwali wʼeBabelĩ, ũkĩmĩre ahisi, Wĩkale omo lũtũtũ. Wĩkale ahisi oko kitaka ahate kĩtũmbĩ kyʼobwami, Uwe mwali wʼAbakaldea. Kusangwa siwendisyaswahulwa mo molo-molo nʼoyuloberere.

² Wĩmaye esyonyuso uswe esĩsyano, Uswikule olukimba lwawe lʼomo bũsũ, ũlũsaye obũsekũ, Uswikule omuhimbi, usoke esyonyũsĩ.

³ Endũmbũ yawe yasyaswikulwa, Esĩsonĩ syawe syasyabikulwa; Nasyakĩsya sĩndĩendĩsyabalya mundu.

⁴ Omũtongolya wetu, Omwami Mukulu wʼemilondo, Eryo lyo lĩna liwe, Oyũbũyĩrĩre wa Ĩsraelĩ.

⁵ Wĩkale bũkũtũ, ugende omo mwĩrĩmya, Uwe mwali wʼAbanya Kaldea; Kusangwa siwendisyaswahulwa mo mwami-kalĩ wʼamami.

⁶ Nabya inabirihitana oko bandu bage, nʼerĩtsandya omwandu wage, kandi monahĩrabo omo byala byawe. Nawe mutaganyirabo, mowahĩra engomo yawe yʼobũlĩto oko bakulu.

⁷ Nĩkwa mowabũga uti, Nasyabya mugole ebiro byosĩ. Mũtahĩra emyatsi eyĩ yʼoko mutima wawe, kutse mutibuka endũlĩ yayo.

⁸ Neryo lino uhulikirire ekĩ, uwe ũkayĩtsemesaya, oyo wĩkere ndeke, uwe ũkabũga omo mutima wawe uti, Ĩngye nyine, kandi sihali gundi nĩna ngye. Sĩndĩendĩsyĩkala ngʼomũkwakalĩ, kutse sĩndĩendĩsyakwĩrwa abana.

⁹ Nĩkwa emyatsi ĩbĩrĩ eyĩ yasyakũhĩkĩra iguma omo kiro kiguma, erĩkwĩrwa bana, nʼobũkwakalĩ. Byasyakuhamba omo lulengo loswĩre, omo malagu wawe mangi kũndũ, nʼomo maka manene wʼamarogo wawe.

¹⁰ Kandi wabiriyiketera Obuholo omo bubi bwawe uti, Sihali oyũndolĩre, amenge wawe nʼeriminya lyawe byabirikuteba, kusangwa mowabũga omo mutima wawe uti, Ĩngye nyine, sihali gundi nĩna ngye.

¹¹ Nĩkwa ebibi byasyakũhĩkako isiwendisyaminya amenge wʼerihigabyo. Nʼerĩkwa lyasyakuwako, siwendisyatoka eririhalyo, nʼerihera eryo ũtasĩ lyasyakũhĩkako neryo-neryo.

¹² Watahangana lino omo malyolyo wawe, nʼomo malagu wawe mangi, ago wabirikolera erĩtsũka omo bũlwana bwawe. Mbino wamabya wasyatoka eribana ndũndĩ, mbino wasyaleta erititimana.

¹³ Wabiriluha omo mbĩta syawe nyingi. Lino uleke abakagereka ebyʼekyanya, nʼabakaminyerera omo syongũnũnũ, nʼabakalagula busana nʼemikera mihya-mihya, bahangane, bakũlamaye oko myatsi eyĩkandĩsyakũhĩkako.

¹⁴ Lebaya, babiribya ngʼesyombuba syũmĩre. Omuliro asyahĩsĩrĩryasyo. Sibetoka erĩyĩlamya oko maka wʼekirimi kyʼomuliro. Sihendisyabya erĩkala lyʼeriota, kutse omuliro wʼerĩĩkalako!

¹⁵ Neryo litya abandu abo babiribya busana nawe, ababiritunda haguma nabo, ababirikola haguma nawe okwʼĩtsũka lyʼobũlwana bwawe. Obuli mundu abirigalaganda omo nzira yiwe. Sihali mundu wʼerĩkũlamya.