Ĩsaya 42 - AMASAKO ABOYTRTRE WA NYAMUHANGA AWAKAHULAWA MO BIBLIA

Endagano yʼOmwami Mukulu busana na Yesu

¹ Mũlebaye, Omugombe wage, oyo ngahambirira, omusombolwa wage, oyo mutima wage akatsemera. Nabĩrĩhĩra Omũlĩmũ wage ukwʼiye. Asyahũlũkya erĩbanza litunganene oko bihanda.

² Siendisyalaka, kutse siendisyatanda omulenge wuwe, erĩowĩsyago omo nzira nene.

³ Sĩendĩsyabũna ekibingu ekĩkokomĩre, kandi sĩendĩsyalĩmya embũmba eyĩkatũmba. Asyahũlũkya erĩbanza lĩhĩkene nʼeritendiregula.

⁴ Siendisyatalukana kutse eribula omutima, erĩhĩka aho asyahĩra erĩbanza lĩhĩkene omo kihugo. Emĩsĩke yʼengetsi yasyalinda emigambo yiwe nʼamaha.

⁵ Nyamuhanga Omwami Mukulu akabũga atya, oyo wahangika olubula, nʼerĩlandĩkanĩalo, oyo wasanza ekihugo nʼebiti byakyo, oyukaha omuka oko bandu abali kukyo, nʼekĩrĩmũ oko bandu abakalendera mukyo ati.

⁶ Ingye indi Mwami Mukulu, nabirikubirikira omo litunganene, kandi nasyakuwata oko byala, kandi nasyakũteya, nʼerikuha eribya ndagano oko bandu, nʼekyakakala oko bihanda,

⁷ erĩrĩbũla ameso wʼesyondĩma-tĩme, erĩhũlũkya ababohwa omo buhya bʼomũlĩkĩ, nʼerĩlũsya abĩkere omo mwĩrĩmya balũe omo nyũmba yʼomũlĩkĩ.

⁸ Ĩngye indi Mwami Mukulu, eryo lyo lĩna lyage. Olukengerwa lwage sindiendihalo oko gundi, kutse eripipa lyage oko sanamu sĩbatsĩre.

⁹ Lebaya, emyatsi yʼerĩmbere yabiribererera, lino ngabatũlĩra emyatsi mihya-mihya. Ngabatũlĩrayo ite yahuluka.

Omwami Mukulu apipawe omo lwimbo

¹⁰ Mwimbire Omwami Mukulu Olwimbo luhya-luhya, Mwimbe eripipa liwe oko ndũlĩ yʼekihugo! Ĩnywe mũkakĩmĩra oko ngetsi, nʼebyosĩ birimo, Ĩnywe bitsira nʼesyondũlanĩ syabyo.

¹¹ Embwarara nʼemĩyĩ yayo bisumbe emirenge yabyo, Ehĩyĩ eyo eKedarĩ yĩkeremo. Esyondũlanĩ syʼeSela bimbe nʼomulenge, Mũte obogo bʼobutseme oko singi syʼebitwa.

¹² Bahe olukengerwa oko Mwami Mukulu, Nʼerĩtũla eripipa liwe omo mĩsĩke yʼengetsi.

¹³ Omwami Mukulu asyahuluka ngʼembangĩ. Asyahũhanĩa omũhwa wuwe ngʼomundu wʼamalwa. Asyabirikira, ega, nʼerĩũta obogo. Asyakĩnda esyonzĩgũ siwe.

¹⁴ Nabirihuna biro bingi. Nabiribya bũkũtũ, nʼeriyibombeka. Lino ngandĩsĩmba ngʼomũkalĩ oyukakunda, ngandibakira nʼerihumayira nibya.

¹⁵ Nasyayira ebitwa nʼehitwa mo mulala, nʼerĩũmya ebiti byabyo byosĩ. Kandi nasyayira esyonyũsĩ mo mĩsĩke yʼengetsi, kandi nasyũmĩrĩrya ebitsinga.

¹⁶ Kandi nasyasondola esyondĩmatĩme omo nzira esyo batasĩ. Nʼomo syonzira batasĩ nasyasondolabo. Nasyayira omwĩrĩmya mo kyakakala embere syabo, nʼahatakomĩre mo bwerere. Nasyakola emyatsi eyĩ. Sĩndĩendĩsyasĩgayo ĩtakolĩre.

¹⁷ Basyasũbĩbwa enyũma, kandi basyahemulwa kutsibu abakayiketera esyosanamu esĩbatsĩre, abakabwira esyosanamu syʼerĩnũnĩa, bati, Muli esyonyamuhanga syetu.

Obũtowa bwa Ĩsraelĩ

¹⁸ Muhulikirire, ĩnywe batsiha! Mulangire ĩnywe ndĩmatĩme, imwatoka erilangira.

¹⁹ Nindi yo ndĩmatĩme, si yo mugombe wage kwehĩ? Kutse si yo mutsiha mukwenda wage oyo ngatuma kwehĩ? Nindi yo ndĩmatĩme ngʼoyuli nʼobuholo haguma nage kutse endĩmatĩme nindi yute ngʼomugombe wʼOmwami Mukulu kwehĩ?

²⁰ Wabirilangira emyatsi mingi, nĩkwa sũlĩyĩtegererayayo. Amatwĩ wawe ahundukere, nĩkwa sĩalĩhũlĩkĩrĩraya.

²¹ Mokyatsemesya Omwami Mukulu busana nʼeritunganene riwe, erĩhamya emigambo yiwe, nʼeriyirayo mo yʼolukengerwa.

²² Nĩkwa aba ni bandu banyegawa nʼerĩhũngwa. Abosĩ babirihambwa omo myangalũ, kandi babĩrĩbĩswa omo manyũmba wʼemĩrĩkĩ. Babere bakahũngwa, sihali oyũkalamayabo. Babere minyego, sihali oyũkabũga ati, Sũbũlayabo!

²³ Nindi omo katĩkatĩ kenyũ oyo Wasyatega okũtũ Ũkwʼekĩ kwehĩ? Nindi oyo wasyahulikirira nʼerĩowa enyũma kwehĩ?

²⁴ Nindi oyo waha Yakobo mo munyego, nʼerĩhĩra Ĩsraelĩ oko bahũngĩ kwehĩ? Si yo Mwami Mukulu kwehĩ? Iye yo twahalayako, nʼerigana erigendera omo nzira siwe, nʼemigambo yiwe mobatakengayo.

²⁵ Busana nʼekyo mũta kubo obukali bwʼerihitana liwe, nʼobutsibu bwʼamalwa. Nabyo mobyamwakya kʼomuliro erĩmũtĩmbako, nĩkwa mwataminyakyo. Nago mwamũhĩsya, nĩkwa mwatahĩrabyo oko mutima.