Ĩsaya 40 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akakĩranaya abandu buwe

¹ Nyamuhanga wenyũ ati, Mũkĩranaye, mũkĩranaye abandu bage.

² Mũbũge lyolo-lyolo nʼeYerũsalema. Mumuguse kʼomulenge muti, amalwa wuwe abirihwa, nʼebibi biwe byamalũsĩbwaho, kusangwa abirikibagalira kabiri omo byala byʼOmwami Mukulu busana nʼebibi biwe byosĩ.

³ Omulenge akabirikira ati, Mũtegekanaye enzira busana nʼOmwami Mukulu omo mbwarara. Mũtũngananaye omo mbwarara embalu nene busana na Nyamuhanga wetu.

⁴ Obuli musya asumbawe endata, Nʼobuli kitwa nʼakatwa bĩhĩrawe eyĩkwa; Nʼekitaka kitalingirirene kiyirawe mo bwerere, Nʼahakwangũkĩre habye omusya munene.

⁵ Neryo olukengerwa lwʼOmwami Mukulu lwasyabĩsũlwa, Nʼemibiri yosĩ yasyalangiralo haguma; Kusangwa obuno bwʼomwami Mukulu bwabĩrĩbũga.

⁶ Omulenge akabũga ati, Birikira. Neryo mwasũbĩrya ati, Ngandibirikirakĩ? Abandu bosĩ bali ngʼebiti, Nʼobubuya bosĩ bwabo buli ngʼomusanga gʼomolĩ.

⁷ Ebiti bikuma, omusanga akasasuka, Omugulu omuka wʼOmwami Mukulu akabuhirira kubyo. Kwenene abandu ni bunyatsi.

⁸ Ebiti bikuma, nʼomusanga akasasuka, Nĩkwa ekĩnywa kya Nyamuhanga wetu Kikahangana kera na kera.

⁹ Uwe Sĩonĩ ũkatũla engulu yowene, Usambe oko kitwa kiri-kiri. Usumbe omulenge wawe go kutsibu, Nawe Yerũsalema ũkatũla engulu yowene Usumbe omulenge Sigubahe. Ubwire emĩyĩ ya Yũda uti, Nyamuhanga wenyũ yoyũ hano!

¹⁰ Lebaya, Omukama Omwami Mukulu asyasa nʼamaka, Nʼokuboko kuwe kwasyamutabalira. Lebaya, oluhembo luwe luli haguma naye Nʼeririha liwe embere siwe.

¹¹ Asyalĩsya ekihangulo kiwe ngʼomũlĩsya, Asyabagalira ebyana byʼesyombũlĩ omo byala biwe, Nʼerihekabyo oko kĩkũba kiwe, Nʼerisondola esyosũhene nʼesĩkongaya syo bolo-bolo.

Obukulu bwa Nyamuhanga

¹² Nindi walenga amagetsi omo kiganza kyʼebyala biwe, kandi nindi walenga olubula omo lulengo, kandi oyo wabiriganza olũtũtũ lwʼekihugo omo kalengĩ, nʼerirenga ebitwa omo lulengo lwʼekĩlo, nʼehitwa omo lulengo lwʼekĩlo kwehĩ?

¹³ Nindi oyo wasondola Omũlĩmũ wʼOmwami Mukulu, kutse eribya mũhanĩ wuwe abĩrĩmũmĩnyĩsya kwehĩ?

¹⁴ Abũlayandi ekihano, kandi nindi wamwĩgĩsaya amenge kwehĩ? Nindi wamũkangĩrĩraya enzira yʼerĩbanza litunganene nʼerĩmũkangĩrĩrya amenge, kandi nindi wamũkangaya enzira yʼeriminya kwehĩ?

¹⁵ Lebaya ebihanda biri ngʼerĩtondĩ omo kalega, bakaganzawa ngʼakasũsũ kʼolũtũtũ oko lulengo lwʼekĩlo. Lebaya, akasumba ebitsira ngʼolũtũtũ luke kutsibu.

¹⁶ NʼeLebanonĩ ni kake okwʼĩhĩsĩbwa, kutse esyonyama syayo sĩsĩhĩkĩre eribya buhere bwʼerĩokererya.

¹⁷ Embere siwe ebihanda byosĩ bikabya nga busa. Akaganzabyo mo hike-hike nga busa, ngʼomute kindu.

¹⁸ Mwasyalĩngĩrĩranĩa Nyamuhanga nandi kwehĩ? Kutse mwasyamũlĩngĩrĩranĩa nʼekĩsosekanĩo kyahi kwehĩ?

¹⁹ Siali ngʼesanamu, eyo munyima akanyenyetaya, nʼomũhesĩ wʼesyamagetsi akahakabayayo omo syamagetsi, nʼomunyima wʼebĩtsĩpa akakokotaya amahulula wʼebĩtsĩpa.

²⁰ Obuli mwera Okwʼibana ehongo akayisoga omuti owatehonda. Iniayisondera omunyima wʼomũbĩrĩ erĩkokotya esanamu eyitetengana.

²¹ Simwetaminya kwehĩ? Sĩmwetowa kwehĩ? Simwetabwirwa okwʼĩtsũka erĩmbere kwehĩ? Simwetaminya okwʼĩtsũka lyʼebibanza byʼekihugo kwehĩ?

²² Nina ye oyo wĩkere endata oko kĩrĩngo kyʼekihugo, nʼesyondũlanĩ syakyo siri ngʼesyongĩke. Oyukabamba ekyanya ngʼolukimba olukaleremba nʼerisanzakyo ngʼerĩhema lyʼerĩĩkalamo.

²³ Yo yũkabũlĩranaya abatabalĩ eribya busa. Oyukayira abatswerĩ bʼekihugo eribya buyira.

²⁴ Ega, sibetahera ebiro, ega, sibetabibwa ebiro, ega, endĩna yabo sĩrĩtogaya emĩrĩhĩ omo kitaka ebiro, nĩkwa akabuhirira kubyo, ibyuma, nʼakanyabungu kakahekabyo ngʼesyombuba.

²⁵ Oyũbũyĩrĩre ati, Mwasyanyĩsosekanĩa nandi, muti inalingirirana naye kwehĩ?

²⁶ Musumbe ameso wenyũ endata, mulangire oyo wahangika esyongũnũnũ esĩ, Oyukasondola emilondo yasyo omo miganzo. Akabirikira esyosĩ omo mena wasyo. Busana nʼobukulu bwʼobũtokĩ buwe, na busana nʼakagala kʼamaka wuwe, sihali kiguma ekikabula.

²⁷ Uwe Yakobo, busana nakĩ ũkabũga, nawe Ĩsraelĩ busana nakĩ ũkatũlago uti, Enzira yage ĩbĩsamĩre oko Mwami Mukulu, nʼerĩbanza lyage siririlolawako na Nyamuhanga wage kwehĩ?

²⁸ Sulitaminya kwehĩ? Sũlĩtowa kwehĩ? Nyamuhanga wa kera na kera, Omwami Mukulu Omũhangĩkĩ wʼesyondũlĩ syʼekihugo sĩalĩkwa bũlũndũ, kutse eriluha. Amenge wuwe sĩalĩrengekanĩbawa.

²⁹ Akaha amaka oko mundu oyukaluha nʼoko yutawite amaka akamutomekera Obũtokĩ.

³⁰ Nomo abalwana bakakwa obũlũndũ nʼeriluha, nʼabalwana bʼamaka bakatwĩkala nabi,

³¹ nĩkwa abakalindirira Omwami Mukulu basyabana amaka mahya-mahya. Basyaguluka endata nʼebĩpũpa ngʼamasamba; basyatibita, isibendiluha, basyagenda Sĩbendĩsyakwa bũlũndũ.