Ĩsaya 36 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Sanĩharĩbũ akayabambira Yũda

¹ Neryo oko mwaka wʼerĩkũmĩ nʼeyĩnĩ yʼOmwami Hezekĩa, Sanĩharĩbũ omwami wʼeAsũrĩa mwayabambira emĩyĩ yosĩ ya Yũda eyikongotere, mwahũngayo.

² Omwami wʼeAsũrĩa mwatuma Rabasake erĩlũa eLakĩsĩ erĩhĩka eYerũsalema oko mwami Hezekĩa haguma nʼomulondo munene wʼabasĩrĩkanĩ. Neryo mwahangana oko mugende wʼekitsinga kyʼendata omo nzira nene yʼekitaka kyʼoyũkeraya esyongimba.

³ Neryo Elĩakĩmũ mugala wa Hĩlkĩa, oyo wabya mwĩmanĩrĩ wʼenyũmba, na Sebũna omũhandĩkĩ, na Yoa mugala wa Asafũ, omũhandĩkĩ wʼemyatsi mobamuhulukira.

⁴ Na Rabasake mwabwirabo ati, Lino mubwire Hezekĩa, muti, omwami mukulu wʼeAsũrĩa ati, Ni maha wahi ago ukayiketera kwehĩ?

⁵ Nyiti, erihana lyawe nʼamaka busana nʼamalwa nĩ bĩnywa buyira. Lino ukayiketerandi, uti ukahona ũkwʼĩngye kwehĩ?

⁶ Lebaya, ukayiketera omũtso wʼoluseke olũbũnĩkĩre, ye Mĩsĩrĩ, omundu amayegemerya kugo, akandiya omo byala biwe nʼeritsimitabyo. Farao omwami wʼeMĩsĩrĩ kwʼali atya oko bosĩ abakayiketera ye.

⁷ Nĩkwa wamambwira uti, Tukayiketera Omwami Mukulu, Nyamuhanga wetu; si nina ye oyo Hezekĩa alũsaya ahʼendata nʼebiherero biwe, iniakabwira Yũda nʼeYerũsalema, ati, Mwasyaramya embere wʼekiherero ekĩ kwehĩ?

⁸ Neryo lino, usakane nʼomukama wage omwami wʼeAsũrĩa, nage ngandikuha esyosabayĩrĩ elfu ĩbĩrĩ, wamabya wanganatoka nawe erĩhĩra abandu kusyo.

⁹ Neryo wangatoka uti erĩkĩnda omũsondolĩ muguma muke owʼabagombe bʼomukama wage, nʼeriyiketera eMĩsĩrĩ busana nʼesyogalĩ na busana nʼabandu abakagenda oko syosabayĩrĩ kwehĩ?

¹⁰ Na lino namasa isingwite erĩrĩga lyʼOmwami Mukulu eribambira ekihugo ekĩ nʼerĩheryakyo kwehĩ? Omwami Mukulu mwambwira ati, Hetuka ulwe nʼekihugo ekĩ, nʼerĩheryakyo.

¹¹ Neryo Elĩakĩmũ na Sebũna na Yoa mobabwira Rabasake, bati, Lino ũbũge nʼabagombe bawe omo mũbũge wʼAbasũrĩa, kusangwa tũkowago. Sũbũge netu omo mũbũge wʼAbayũda omo matwĩ wʼabandu abali oko lũhĩmbo.

¹² Nĩkwa Rabasake mwabũga ati, omukama wage mwanyituma oko mukama wawe nʼũkwʼĩnywe erĩbũga ebĩnywa ebĩ kwehĩ? Mwatanyituma oko bandu abĩkere oko lũhĩmbo, balye amabĩ wabo nʼerĩpũlya amasu wabo haguma nenyũ kwehĩ?

¹³ Neryo Rabasake mwahangana mwabirikira nʼomulenge munene omo mũbũge wʼAbayũda ati, Mowe ebĩnywa byʼOmwami munene, yo mwami wʼeAsũrĩa.

¹⁴ Omwami ati, Simuleke Hezekĩa eribateba, kusangwa siangatoka erĩbalamya.

¹⁵ Kutse simuleke Hezekĩa akaleka imwayiketera Omwami Mukulu ati, Omwami Mukulu kwenene asyatũlamya, omũyĩ oyo siendisyahabwa omo byala byʼOmwami wʼeAsũrĩa.

¹⁶ Simuhulikirire Hezekĩa, kusangwa omwami wʼeAsũrĩa ati, Musangane nage omo buholo, munyihulukire. Neryo obuli mundu alye oko mũlĩkĩ wʼebĩnyũ biwe, nʼobuli mundu alye oko muti wuwe wʼomũtĩnĩ, kandi mũpũlaye obuli mundu amagetsi wʼekitehero kiwe,

¹⁷ erĩhĩka aho nasyasira eribatwala omo kihugo kiri ngʼekihugo kyenyũ, ekihugo kyʼengano nʼebĩnyũ bihya-bihya, ekihugo kyʼobundu nʼamalima wʼebĩnyũ.

¹⁸ Mũyĩtegaye, Hezekĩa akasyabatalya ati, Omwami Mukulu asyatũlamya. Hali nyamuhanga muguma wʼebihanda oyo walamaya ekihugo kiwe omo byala byʼOmwami wʼeAsũrĩa kwehĩ?

¹⁹ Esyonyamuhanga syʼeHamatĩ nʼeArũpadĩ siri hahi kwehĩ? Esyonyamuhanga syʼeSefaraĩmũ siri hahi kwehĩ? Kandi Syabĩrĩlamya eSamarĩa omo byala byage omugulu wahi kwehĩ?

²⁰ Nindi omo syonyamuhanga syosĩ syʼebihugo ebĩ oyo Wabĩrĩlamya ekihugo kyabo omo byala byage, uti Omwami Mukulu asyalamya eYerũsalema erĩlũa omo byala byage kwehĩ?

²¹ Nĩkwa mobamuhuna, mobatamũsũbĩrya nʼekĩnywa nʼekiguma, kusangwa lyabya erihana lyʼOmwami ati, Ĩsĩmwamũsũbĩraya.

²² Neryo Elĩakĩmũ mugala wa Hĩlkĩa oyo wabya mwĩmanĩrĩ wʼenyũmba, na Sebũna mũhandĩkĩ, na Yoa mugala wa Asafũ, omũhandĩkĩ wʼemyatsi, mobahĩka uku Hezekĩa, esyongimba syabo isyabiritulangwa, mobamubwira ebĩnywa bya Rabasake.