Ĩsaya 35 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akatsumula eSĩonĩ

¹ Embwarara nʼolukurutsu byasyatsema, nʼembwarara yasyatsanga nʼerĩhũlũkya omusanga ngʼerikanga.

² Yasyalasya omusanga munene, nʼeritsanga nʼobutseme nʼerĩũta obogo bwʼobutseme. Yasyahabwa obubuya bwʼeLebanonĩ, yasyahabwa obubuya bwʼeKaramelĩ nʼeSaronĩ. Basyalangira olukengerwa lwʼOmwami Mukulu, erĩkangabasanĩa lya Nyamuhanga wetu.

³ Mũsĩkaye ebyala bite nʼamaka, musingike amarwĩ awalegetsene.

⁴ Mubwire abandu bʼomutima owakasata muti, Mũsĩke, simubahe. Lebaya, Nyamuhanga wenyũ asyasa nʼerĩkĩsya, eririha lya Nyamuhanga lyasyahĩka, nĩkwa asyabalamya.

⁵ Nʼoko mugulu oyo ameso wʼesyondĩma-tĩme asyalĩbũlwa, nʼamatwĩ wʼabatsiha asyahundukala.

⁶ Oko mugulu oyo olugata lwasyatũa ebika ngʼengabi, nʼolulimi lwʼerĩkĩrũ lwasyũta obogo bwʼobutseme, kusangwa omo lukurutsu mwasyabutuka amagetsi, nʼesyonyũsĩ omo mbwarara.

⁷ Nʼekitaka kyũmĩre kyasyabya kitsinga kyʼamagetsi, nʼekitaka kĩkwĩre enyota kyasyabya mwʼesĩsoko syʼamagetsi. Kandi aho esyoboha sikasiba aho sikabundama, ebiti bikabya erisesa nʼebibingu.

⁸ Enzira nene yasyabyayo, nʼembalu, nayo yasyahulwa mo mbalu yʼerĩbũyĩrĩre; abatsandĩre sibendisyalaba muyo. Nĩkwa yasyabya busana nʼabandu abakalabaho. Abandu bakĩrũ sibendisyagalaganda muyo.

⁹ Eyo sihendisyabya endale kutse enyama ĩkalĩre sĩyendĩsyahĩkamo. Sisyendisyabanikayo. Nĩkwa abatongolĩbwa basyalenderamo.

¹⁰ Abatongolĩbawa bʼOmwami Mukulu basyasubula, nʼerihĩka eSĩonĩ ĩbakũta obogo bʼobutseme, nʼobutseme bwa kera na kera bwasyabya oko mitwe yabo. Basyabana eritsangamuka nʼeritsema, nʼobũlĩge nʼerihumulikana byasyatibita.