Ĩsaya 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihitana lya Nyamuhanga oko bihanda

¹ Ĩnywe bihanda mwase hakũhĩ, mubane erĩowa, muhulikirire, ĩnywe bandu! Ekitaka kihulikirire, nʼebyoswĩre mukyo byowe, ekihugo nʼebindu byosĩ ebikahuluka mukyo.

² Kusangwa Omwami Mukulu akahitana busana nʼebihanda byosĩ, akahitana busana nʼemilondo yabo yosĩ yʼabasĩrĩkanĩ. Abĩrĩheryabo kutsibu, abirihabo erĩĩtwa.

³ Abĩtawa babo basyaguswa eyĩhya, nʼekikumbo kyʼebĩnda byabo kyasyahetukira endata, nʼebitwa byasyatsapa omo musasi wabo.

⁴ Emilondo yosĩ yʼelubula yasyahwerekerera, nʼolubula lwasyalĩngwa ngʼakaratasi. Omulondo walo gosĩ asyahwerekerera, ngʼekikoma kyʼomũlĩkĩ wʼebĩnyũ ko kikuma, ngʼekikoma kyʼomuti wʼomũtĩnĩ ko kikuma.

⁵ Kusangwa omũyalĩ wage abĩrĩũgũtĩra omo lubula. Lebaya asyakĩmĩra eEdomũ busana nʼeritswera, nʼoko bandu bʼeritakira lyage, erĩheryabo.

⁶ Omũyalĩ wʼOmwami Mukulu amũgũta omo musasi, amanyenyeta omo bĩsabũ, omo musasi wʼebyana byʼesyombũlĩ nʼesyombene-hene, omo bĩsabũ byʼesyombĩko syʼesyombangale, kusangwa Omwami Mukulu awite ehongo eBosra, nʼerĩkwa lĩnene omo kihugo kyʼeEdomũ.

⁷ Esyonganda syasyakwa haguma nabo, esyonume ndere syʼesyonde haguma nʼesyonume syʼesyonde esĩkalĩre. Litya ekihugo kyabo kyasyalĩbĩka omo musasi, nʼolũtũtũ lwabo lwasyabya nʼamagũta wʼebĩsabũ.

⁸ Kusangwa Omwami Mukulu awite ekiro kyʼerĩkĩsya, Omwaka wʼeririha busana nʼobuhaka bwʼeSĩonĩ.

⁹ Esyonyũsĩ syako syasyabindulwa mo kasuku, nʼolũtũtũ lwako mo bũsĩngo, nʼekitaka kyayo kyasyabya ngʼakasuku akakagulumira.

¹⁰ Sĩkyendĩsyalĩmĩbwa omo kiro kutse omugulu wʼomusibo. Omũkĩ wakyo asyahetukira endata kera na kera. Erĩtsũka oko ndengo nʼoko ndengo kyasyabya mulala. Sihali oyo wasyalaba mukyo kera na kera.

¹¹ Nĩkwa etuhe nʼendĩko syasyasĩgalyakyo, nʼekĩbũkũlũ nʼekikororo byasyĩkalamo. Naye asyasumba kukyo olukoba lwʼerĩtĩnda nʼolukoba lwʼerirengako lwa busa.

¹² Abakulu bayo, sihali oyo bangahĩra mo mwami, nʼabanya-mwami bakyo bosĩ basyabya buyira.

¹³ Nʼemisakisaki yasyalasa omo manyũmba wʼomusunguliko awakangatĩre, ekyatsinge nʼamatolũ byasyalasa ahakangatĩre hakyo. Hasyabya aho esyoboha sikasiba nʼekibuga kyʼembũnĩ.

¹⁴ Esyonyama syʼomo mbwarara syasyahĩndana nʼesyombwa syʼomolĩ, nʼesyombene syʼobweya syʼomolĩ sikamira esindi syasyo. Ega, nʼenyama nyibi yʼekiro yasĩkalayo, nʼeriyibanira ahʼeriluhukira.

¹⁵ Eyo enzoka yasyahĩra obusamba bwayo, nʼerirekera amayi eyo, kandi yasyatũago, nʼerĩhĩndanĩa ehyana hyayo omo kyũtũtũ kyayo. Ega, nʼebihungu byasyahĩndanaho, ekyʼobulume nʼekyʼobũkalĩ.

¹⁶ Mũsonda-sondaye omo kitabu kyʼOmwami Mukulu, musomekyo: Sihali nʼekiguma kyasyabulaho, sihali ekyasyabula mũlĩkyabo. Kusangwa obuno buwe bwabirihamulakyo, nʼOmũlĩmũ wuwe abĩrĩhĩndanĩabyo.

¹⁷ Kandi abirigerekerabyo, nʼebyala biwe byabirigabirabyo omo lukoba. Byasyasĩgalyakyo erĩhĩka na kera, erĩtsũka oko ndengo nʼoko ndengo byasyĩkalamo.