Ĩsaya 33 - AMASAKO ABOYTRTRE WA NYAMUHANGA AWAKAHULAWA MO BIBLIA

Obũlĩge ũkwʼoyũkaheraya

¹ Obũlĩge kuwe, uwe ũkaheraya, nawe ĩsũlĩwaherĩbwa. Kandi oyũkateba, omugulu abandi batamuteba! Omugulu wamabibuga erĩherya, nawe wasyaherĩbwa. Nʼomugulu wamabibugirira eriteba, abandi basyakukolera amatebo.

² Uwe Mwami Mukulu, ubye nʼolukogo busana netu twabirikulinda. Ubye maka wetu obuli ngyakya, nʼomulamo wetu nibya omugulu wʼobũlĩge.

³ Ebihanda bikasaga emirenge yʼolukanda. Ebihanda bikapanzikana omugulu ukayisumba.

⁴ Eminyego yenyũ yasyatola-tolwa ngoko bũngũkũ bukatola-tola. Abandu basyagulukirayo ngʼesyongĩke ko sikaguluka.

⁵ Omwami Mukulu amahamĩbwa, kusangwa ĩkere endata. Amũsũlya eSĩonĩ mwʼĩbanza lĩhĩkene nʼeritunganene.

⁶ Naye asyabya erĩsĩka lyʼemigulu yenyũ, nʼerilama lĩnene, nʼamenge, nʼeriminya. Eriubaha lyʼOmwami Mukulu ni bindu biwe.

⁷ Lebaya, esyombangĩ syabo sikalakira eyĩhya. Abakwenda bʼobuholo bakalira nʼerĩsirĩkalira.

⁸ Esyonzira nene sikabya bĩhũma, nʼomũgendĩ amũmbya. Abĩrĩtwa endagano, abiripona emĩyĩ, sialitsomana mundu.

⁹ Ekihugo kikalira nʼeriogoka, Lebanonĩ yabirihemuka nʼeriuma. Saronĩ iri nga mbwarara. Basanĩ na Karamelĩ ĩkalagalaya ebiti.

¹⁰ Omwami Mukulu akabũga ati, Lino ngandihangana. Lino ngandĩhamĩbwa. Lino ngandisumbwa endata.

¹¹ Mwabiriheka obukule bʼomusunga, mwasyabuta engesera. Omuka wage asyabahĩsya ngʼomuliro.

¹² Ebihanda byasyabya byasyahĩsĩbwa eribya swakara, ngʼemisakisaki eyikakenzawa, eyĩkahĩsĩbawa omo muliro.

¹³ Ĩnywe muli hali, muhulikirire ebyo nabirikola kandi, ĩnywe muli hakũhĩ muminye amaka wage.

¹⁴ Abakola-nabi eSĩonĩ bakubaha. Nʼerititimana lyabirihamba abatekenga Nyamuhanga. Nindi ũkwʼĩtwe angatoka erĩĩkala omo muliro owakahĩsaya kwehĩ? Nindi ũkwʼĩtwe angatoka erĩĩkala haguma nʼerĩhĩsĩrĩrya lya kera na kera kwehĩ?

¹⁵ Yo nʼoyukangendera omo litunganene, nʼoyũkabũga ebyʼekwenene, oyukagana endũndĩ yʼeribanika omo mabehĩ, nʼerĩhehya ebyala biwe sibihambe esigulo, nʼoyũkalĩba amatwĩ wuwe okwʼowa omwatsi wʼomusasi, nʼoyũkalĩba ameso wuwe sialangire ebibi.

¹⁶ Yo yo Wasyĩkala endata. Ahakongotere hʼamabwe hasyabya busayiro buwe. Asyahabwa ebyalya biwe, nʼamagetsi wuwe siendisyabula.

¹⁷ Ameso wenyũ asyalangira Omwami omo bubuya buwe. Asyalangira ekihugo ekyʼehali-hali.

¹⁸ Omutima wawe asyaganĩrya ebyʼerĩũbahya. Ali hahi oyukaganza? Alihi oyukalenga? Ali hahi oyukaganza amanyũmba wʼemisunguliko kwehĩ?

¹⁹ Siwendisyaswalangira ekihanda kĩkalĩre, abandu bʼomũbũge atasĩbwe, owatetoka eriminywa nʼomundu, abʼolulimi lwʼomũtetũ olutetoka eriminywa.

²⁰ Musamalire eSĩonĩ, omũyĩ wʼebiro bikulu byetu ebyabirihamulwa. Ameso wawe asyalangira eYerũsalema ahʼerĩĩkala ahayĩbombekĩre, erĩhema eritendisyasengwa, nʼesyongyingyi syalyo sisyendisyakulwa na kera, kutse emĩrĩkĩ yalyo sĩyendĩsyatwĩbwako nʼomuguma.

²¹ Nĩkwa eyo oyũkangabasenĩe, Omwami Mukulu, asyabya busana netu ahʼesyonyũsĩ nʼamagetsi agalĩhĩre, ahatelaba bwato nʼesyongahya syabo, kandi sihendisyalaba bwato bunene.

²² Kusangwa Omwami Mukulu nĩ mũtswerĩ wetu, Omwami Mukulu yukatuha emigambo yetu, Omwami Mukulu ni mwami wetu. Asyatũlamya.

²³ Emikoba yetu yamalegukala. Siyetoka erihamba endĩna nʼendũyĩ yabo yʼobwato ndeke, kutse erisanzula olukimba lwʼobwato, neryo basyagaba eminyego minene eyahũngawa. Ebirema byasyĩmya eminyego.

²⁴ Kandi sihali ndũlanĩ eyĩkandĩsyabũga iti, Nyilwere. Abandu abĩkeremo basyabuyirwa ebibi byabo.