Ĩsaya 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lyʼOmwami oyutunganene

¹ Lebaya, omwami asyatabala omo litunganene, nʼabanya-mwami basyatabala omwʼĩbanza lyʼekwenene.

² Obuli mundu asyabya ngʼahʼerĩbĩsama erihunga, ngʼobũgamo bwʼembũla nene, ngʼesyonyũsĩ syʼamagetsi omo kihugo kyũmĩre, ngʼekyũtsũtsũ kyʼerĩbwe rĩnene omo kihugo ekikungukere.

³ Nʼameso wabo abakalangira sĩendĩsyalĩma-lĩma, nʼamatwĩ wʼabakowa asyahulikirira.

⁴ Omutima wʼomundu wʼelũba-lũba asyaminya amenge, nʼolulimi lwʼabʼomũtetũ lwasyanguha erĩbũga ndeke-ndeke.

⁵ Omũkĩrũ Siendisyaswahulwa mo mukulu, kutse omuhemu siendisyaswahulwa mo mwenge.

⁶ Kusangwa omũkĩrũ asyabũga ebyʼobũkĩrũ, nʼomutima wuwe asyakola ebibi, erikola ebite bya Nyamuhanga, nʼerĩbũga ebite byʼekwenene busana nʼOmwami Mukulu, erĩtendĩũgũtya omundu wʼenzala, nʼerikaga amagetsi busana nʼoyũkwĩre enyota.

⁷ Omundu mutya-mutya akakola ebitya-bitya. Akaganĩraya emyatsi mibi, erĩherya abandu bʼobũlĩge omo bĩnywa byʼamabehĩ, omugulu abʼobwaga bakabũga ekitunganene.

⁸ Nĩkwa omugenge akaganĩraya emyatsi yʼobugenge, kandi akahangana omo myatsi yʼobugenge.

Erihana abakalĩ ebikandisyasa

⁹ Muhangane, ĩnywe bakalĩ mũtayĩtsũlĩre kindu, mowe omulenge wage. Ĩnywe bana-bato abatalengekenĩe, mutege amatwĩ oko kĩnywa kyage.

¹⁰ Oko mwaka owakasa nʼebindi biro bike mwasyasĩsĩra ĩnywe bana-bato mutatsomene. Kusangwa erikamula likahwa, nʼerigesa sĩryendĩsyahĩka.

¹¹ Ĩnywe bakalĩ mũtayĩtsũlĩre, mutitimane, musweke ĩnywe bana-bato mutatsomene kindu. Muambule, mubye ndũmbũ, muyibohe emiremba omo mbindi syenyũ.

¹² Muyihumange oko bĩkũba byenyũ busana nʼamalima owene, busana nʼemĩrĩkĩ yʼebĩnyũ eyĩbogĩre.

¹³ Busana nʼemisakisaki nʼamahwa eyikalasa omo kihugo kyʼabandu bage. Ega, busana nʼamanyũmba gosĩ wʼobutseme, na busana nʼomũyĩ wʼeritsema.

¹⁴ Kusangwa ekikali kyʼOmwami kyabĩrĩsĩganĩbwa. Omũyĩ wʼabandu bangi abiribya bute mundu; ekitwa nʼomusunguliko wʼenyũmba yʼerĩterya yabiribya myangalũ ebiro byosĩ iniabiribya obutseme bwʼesyopunda syʼomolĩ, olũlĩsĩryo lwʼebihangulo.

¹⁵ Erĩhĩka aho Omũlĩmũ amabyũtũlĩrwa ũkwʼĩtwe erĩlũa endata. Nʼembwarara iyasyabya eririma lĩbogĩre kũndũ, nʼeririma lĩbogĩre eriheta kutsibu.

¹⁶ Neryo erĩbanza litunganene lyasyĩkala omo mbwarara. Nʼeritunganene lyasyĩkala omwʼirima erĩbogĩre.

¹⁷ Omũbĩrĩ wʼeritunganene asyabya buholo, nʼomũbĩrĩ wʼeritunganene asyabya eriyibombeka nʼeriyiketera ebiro byosĩ.

¹⁸ Neryo abandu bage basyĩkala omo mwanya wʼobuholo, nʼomo hʼerĩĩkala ahawatĩre, nʼahʼeriluhukira ahatũlere,

¹⁹ Kandi amatwa asyawa omugulu omũsĩtũ akatera. Omũyĩ asyahĩrwa ahisi.

²⁰ Mwasyabya nʼomũyĩsa ĩnywe mukabiba oko mũsĩke wʼamagetsi gosĩ, ĩnywe mukabohola esyonume syʼesyonde nʼesyopunda.