Ĩsaya 30 - AMASAKO ABOYTRTRE WA NYAMUHANGA AWAKAHULAWA MO BIBLIA

Abakayiketera eMĩsĩrĩ basyahemulwa

¹ Omwami Mukulu ati, Obũlĩge oko bana bʼerihona, abakakola omwatsi owate wage. Nʼabakayira erisakana erite ryʼEkĩrĩmũ kyage, bati bakatomekera ebibi oko bibi.

² Abakandagalira eMĩsĩrĩ, ĩsĩbetanyĩbũlya, erisayira omo buholo bwa Farao, nʼerĩsonda-sondya obulemberero omo kyũtsũtsũ kyʼeMĩsĩrĩ!

³ Neryo Obuholo bwa Farao bwasyabya erihemuka lyenyũ, nʼobulemberero omo kyũtsũtsũ kyʼeMĩsĩrĩ bwasyabya bugangagange bwenyũ.

⁴ Kusangwa abanya-mwami babo bali eZoanĩ, nʼabakwenda babo babĩrĩhĩka eHanesĩ.

⁵ Abosĩ basyahemuka busana nʼabandu abatetoka erihabo endũndĩ, abatewatĩkaya kutse erĩtũndĩsyabo, nĩkwa busana nʼerihemula, nʼeritsumabo.

⁶ Eriminyerera busana nʼesyonyama syʼeLutambi lwʼeyĩkwa. Omo kihugo kyʼobũlĩge nʼeriagalwa, Endale yʼobũkalĩ nʼendale yʼobulume sĩkalũayo, Eyo ĩkalũa enzoka, enzoka yʼomuliro eyikaguluka, Bikaheka ebindu byabo oko bitigo byʼesyopunda ndere, Ebindu byabo oko bĩkũkũ byʼesyongamia, Oko bandu abatetoka erihabo endũndĩ.

⁷ Erĩwatĩkya lya Mĩsĩrĩ ni busa Siriri nʼendũndĩ, Kikaleka inamwahula mo Rahabũ, oyo wabĩrĩkwa.

⁸ Na lino ugende, usakekyo oko kisayi embere syabo, kandi usakekyo omo kitabu, ikyabya busana nʼomugulu owakasa busana nʼerĩtũlago kera na kera.

⁹ Kusangwa aba ni bandu bʼerihona, ni bana bʼamabehĩ, ni bana batanzĩre erĩowa erĩkangĩrĩrya lyʼOmwami Mukulu.

¹⁰ Abakabwira abahanĩ bati, Simulangire; nʼoko bamĩnyererĩ bati, Simuminyerere busana netu emyatsi eyitunganene, mutubwire ebĩnywa bitendere, muminyerere ebyʼeriteba.

¹¹ Mũlũe omo nzira, mukitire emũsĩke wʼenzira, sĩtowe kandi emyatsi yʼOyũbũyĩrĩre wa Ĩsraelĩ.

¹² Busana nʼekyo Oyũbũyĩrĩre wa Ĩsraelĩ ati, Kusangwa mwabirigana ekĩnywa ekĩ, imwabiriyiketera erinuba nʼepono, nʼeriyiketerabyo.

¹³ Busana nʼekĩ obubi obũ bwasyababyako ngʼebitobo ebikasonda eriwa, erĩbĩmba omo lũhĩmbo luli, nʼerĩtwĩka lyalo lĩkahĩka neryo-neryo omo katambĩ kaguma.

¹⁴ Nʼerĩtwĩka lyalo liri ngʼerĩkwa lyʼenyungu yʼomũbũmbĩ ĩkakwa kutsibu, nʼoluyo sialibanika omo bitswe-bitswe olwangaheka omuliro omo lĩko, kutse eriteha amagetsi omo kitsinga.

¹⁵ Kusangwa Omukama Omwami Mukulu, Oyũbũyĩrĩre wa Ĩsraelĩ abĩrĩbũga ati, Omwʼibinduka nʼerireka ebibi, nʼeriluhuka mwasyalamĩbwa. Omwʼiyibombeka nʼeriyiketera ni maka wenyũ. Nĩkwa momũtalĩga.

¹⁶ Nĩkwa momwabũga muti, Iyehe, nĩkwa twasyatibita endata oko syosabayĩrĩ. Neryo ko mwasyatibita mutya! Kandi muti, Netu twasyagendera oko syosabayĩrĩ esyo. Sikanguha, neryo abakabakwama nabo basyanguha.

¹⁷ Elfu nguma yasyasaga oko muhayo wʼomundu muguma. Nʼoko mihayo yʼabatanu mwasyatibita, erĩhĩka aho mwasyasĩgwa ngʼomuti owahangene oko singi yʼekitwa, kandi ngʼebendera eyiri endata oko kitwa.

¹⁸ Na busana nʼekyo, Omwami Mukulu akasonda eribaganyira. Kandi busana nʼekyo akalinda endata ĩnĩabakwĩra olukogo. Kusangwa Omwami Mukulu ni Nyamuhanga wʼerĩbanza litunganene. Omũyĩsa ali oko bosĩ abakamũkwa olukando.

¹⁹ Ĩnywe bandu bʼeSĩonĩ, esyondũlanĩ syʼeYerũsalema, simwendisyaswalira. Kwenene asyabakwa olukogo busana nʼomulenge wʼerilaka lyawe. Omugulu asyowalyo asyabasũbĩrya.

²⁰ Nomo Mukama abiribaha akalyo kʼamalĩge, nʼamagetsi wʼerĩnũbya, nĩkwa iye, Omũkangĩrĩrya wenyũ, sĩendĩsyaswayĩbĩsa, nĩkwa ameso wenyũ asyalangira Omũkangĩrĩrya wenyũ.

²¹ Nʼamatwĩ wenyũ asyowa ekĩnywa enyũma wenyũ kiti, Enzira yeyĩ, mugendere muyo. Omugulu mukakitira oko luhande lwʼamali, nʼomugulu mukakitira oko luhande lwʼamalembe.

²² Kandi mwasyatsandya esyosanamu syenyũ esĩbatsĩre esĩswĩkĩrwe nʼebĩtsĩpa, nʼesyosanamu syenyũ esyanũnĩbawa nʼeriswikwa omo syamagetsi. Mwasyapanzapanzasyo hali ngʼekindu kyʼesyonye. Mwasyabwirasyo muti, Mũlũeho!

²³ Neryo asyawĩsya embũla busana nʼembuto, eyo mwasyahera omo kitaka. Nʼakalyo kʼerikanyirira lyʼekitaka, nako kasyaboga nʼerĩerya bingi. Oko kiro ekyo ebihangulo byenyũ byasyalira omo lũlĩsĩryo lunene.

²⁴ Esyonume syʼesyonde nibya nʼesyopunda esikalima ekitaka syasyalya ebiti ebĩsĩhĩre omo mũnyũ ebĩsenzegetĩre omo lupao nʼomo kihasa-murobo.

²⁵ Nʼoko buli kitwa kiri nʼoko buli katwa kali, hasyabya esyonyũsĩ syʼamagetsi akasenda, oko kiro kyʼerĩkwa lĩnene, omugulu esyonyũmba sĩsũngũlĩkĩre sikatera.

²⁶ Kandi ekyakakala kyʼomukera kyasyabya ngʼekyakakala kyʼeryuba, nʼekyakakala kyʼeryuba kyasyakanya ngendo sirinda, ngʼekyakakala kyʼebiro birinda, oko kiro ekyo Omwami Mukulu asyasenga ebĩhũnze byʼabandu buwe, nʼerĩlamya ebihutale ebyo abirikolabo.

²⁷ Lebaya erĩna lyʼOmwami Mukulu likasira hali; erihitana liwe likaka, nʼomũkĩ wuwe ni mungi. Emĩnywa yiwe yoswĩre nʼerihitana, nʼolulimi luwe luli ngʼomuliro owakabugirira.

²⁸ Omuka wuwe ali ngʼolũsĩ olukabwaga, olũkahĩka oko bĩkya, erisenzegeta ebihanda omo kayingiro, nʼerĩhĩra omugatsulo owakaheraya omo mikese yʼebihanda.

²⁹ Mwasyabya nʼolwimbo ngʼomo kiro oko mugulu ũkategaya ekiro kikulu. Kandi mwasyabya nʼobutseme bʼomutima, ngʼomundu oyukagenda omo mulenge wʼenyamulera, eriya oko kitwa kyʼOmwami Mukulu, oko Lĩbwe lya Ĩsraelĩ.

³⁰ Omwami Mukulu asyowĩsya omulenge wuwe wʼehamũlĩ, kandi asyaleka erĩkĩma lyʼokuboko kuwe iryalolwako, omo kirimi kyʼomuliro owakabugirira, omo mbũla nene, nʼeriwa lyʼembũla nʼamatwa.

³¹ Kusangwa omo mulenge wʼOmwami Mukulu, Asũrĩa asyubaha, omugulu akaswĩraya omo mwĩgo.

³² Obuli kĩhũnze kyʼomũtso wʼerisuyira, ekyo Mwami Mukulu asyamũhĩrako, kyasyabya haguma nʼomulenge wʼesyonzenze nʼesyonanga; kandi asyalwa nabo nʼerĩhũngyabo omo byala biwe byʼamaka.

³³ Kusangwa Erĩokeryo lyʼeTofetĩ lyabĩrĩkokotĩbwa kera. Ega, lyabĩrĩkokotĩbwa busana nʼomwami. Abiritakulaho hali nʼahanene omwisi, ekitabiro kyaho ni muliro nʼesyongwĩ nene. Omuka wʼOmwami Mukulu, ngʼolũsĩ lwʼomuliro wʼekĩbĩrĩtĩ asyakyalyo.