Ĩsaya 29 - AMASAKO ABOYTRTRE WA NYAMUHANGA AWAKAHULAWA MO BIBLIA

Arĩelĩ nʼesyonzĩgũ syago

¹ Obũlĩge oko Arĩelĩ, Arĩelĩ omũyĩ ogo Dawĩdĩ alalirirako! Mutomeke Omwaka oko mwaka, mukwame ebiro bikulu byenyũ oko migulu yabyo.

² Nasyaleta obũlĩge oko Arĩelĩ, kandi asyabya mũyĩ wʼeririra nʼerĩsũsũmana. Nago asyabya kwĩngye ngʼeArĩelĩ.

³ Nage nasyayira enganda yʼamalwa ukʼuwe erĩkũtĩmbako, nasyasingika emĩbĩrĩ yʼerikubambira emisunguliko yʼenyũmba erilwa nawe.

⁴ Nawe wasyasũbĩbwa ahisi, wasyabũgĩra omo kitaka, nʼebĩnywa byawe byasyalũa omo lũtũtũ eyo ugotsere. Omulenge wawe asyabya ngʼomulenge wʼekĩrimũ, akalũa omo kitaka, nʼebĩnywa byawe ngʼebihwehwe bĩkalũa omo lũtũtũ.

⁵ Nĩkwa endeko yʼesyonzĩgũ syawe yasyabya ngʼolũtũtũ lũnoyĩre, nʼendeko yʼabandu bʼomwaga yasyabya ngʼomusunga owakaguluka; ega kyasyabya omo katambĩ kake, neryo-neryo.

⁶ Omwami Mukulu, wʼemilondo asyakusuyira omo mũlũmo, nʼomo mũsĩkĩ, nʼolukanda lunene, nʼomo kanyabungu, nʼekihunga, nʼekirimi kyʼomuliro ekĩkahĩsaya.

⁷ Endeko yʼebihanda byosĩ ebikalwa nʼeArĩelĩ, nʼabosĩ bakalwa naye nʼahakangatĩre huwe, nʼabakamwagalĩranaya, basyabya ngʼerilota nʼobũlĩme bwʼekiro.

⁸ Neryo kyasyabya ngʼomugulu omundu oyũkwĩre enzala akalota, neryo lebaya, akalya, nĩkwa omugulu akabuka, ĩnĩakĩnakwĩre enzala, kutse ngʼomundu oyũkwĩre enyota akalota, neryo lebaya, akapũlaya, nĩkwa omugulu akabuka, neryo lebaya, akalembera, nʼenyota yiwe ikineho. Litya endeko yʼebihanda byosĩ ko yasyabya itya, eyikalwa nʼeKitwa kyʼeSĩonĩ.

⁹ Muamale, mulinde, muyiyire mo ndĩma-tĩme, mubye ndĩma-tĩme, abakakũnda, nĩkwa butsira omo bĩnyũ; bakakũta-kũta, butsira omo bũhĩre.

¹⁰ Kusangwa Omwami Mukulu abĩrĩbũtũlĩrako ekĩrĩmũ kyʼotũgotserĩ tunene, kandi abĩrĩrĩba ameso wenyũ, bo bamĩnyererĩ; kandi abiriswika emitwe yenyũ, bo bahanĩ.

¹¹ Nʼerilota lyosĩ lyamabibya kwĩnywe ngʼebĩnywa byʼekitabu ekĩbohĩre, ekyo abandu bakaha omundu oyo wasĩ erisoma ati, Kĩsĩ-kĩsĩ, usome ekĩ; naye asyasũbĩrya ati, Sinangatoka, kusangwa kĩbohĩre.

¹² Neryo ekitabu ekyo kyasyahabwa oyũtasĩ erisoma, bati, Kĩsĩ-kĩsĩ tuti, soma ekĩ. Naye asyabũga ati, Sĩnyasĩ erisoma.

¹³ Neryo Omukama mwabũga ati, Kusangwa abandu aba bakanyisimbirira, omo bĩnywa byabo kandi bakanyĩsĩkaya nʼemĩnywa yabo, nĩkwa babĩrĩsegerya emitima yabo yo hali kwĩngye, nʼerikenga lyabo busana nage ni mitsye yʼabandu eyo biga ngendo nyingi,

¹⁴ neryo, lebaya, ngandisyaswakola omũbĩrĩ wʼeriswekera omo katĩkatĩ kʼabandu aba, omũbĩrĩ wʼeriswekera ndeke. Amenge wʼabʼamenge ba banyima asyahera, nʼeriminya lyʼabanyima-nyima abakalangira lyasyabĩswa.

¹⁵ Obũlĩge kwʼabo abakabĩsa ndeke oko Mwami Mukulu embĩta yabo, nʼemĩbĩrĩ yabo ikakolawa omo mwĩrĩmya, kandi bakabũga bati, Nindi yukatulolako kwehĩ? Kutse nandi yũtwasĩ kwehĩ?

¹⁶ Ĩnywe mukabindula emyatsi! Omũbũmbĩ asyalĩngĩrĩranĩbwa nʼeribumba kwehĩ? Muti ekyabumbawa ikikabwira oyo wabumbakyo, kiti, Mwatanyibumba. Kutse ekindu ekikabumbawa ikyahula oyo wabumbakyo kiti, Siawite menge kwehĩ?

¹⁷ Sĩhakĩsĩya akatambĩ kake kwehĩ? NʼeLebanonĩ yasyabindulwa eribya eririma lĩbogĩre, nʼeririma lĩbogĩre siryendisyaganzwa ngʼomũsĩtũ kwehĩ?

¹⁸ Oko kiro ekyo abatsiha basyowa ebĩnywa byʼekitabu, nʼomo mwĩrĩmya munene nʼomo mũhĩndanĩa, ameso wʼesyondĩma-tĩme asyalangira.

¹⁹ Nʼabandu bʼobũlĩge basyakanyĩrĩrya obutseme bwabo omo Mwami Mukulu, nʼabandu bʼobwaga basyatsema ũmwʼOyũbũyĩrĩre wa Ĩsraelĩ.

²⁰ Kusangwa omundu wʼomwaga asyatogota, nʼomũtelemĩ asyahwa, ega, nʼabosĩ abanzĩre erikola ebibi basyatĩndwa.

²¹ Abandu bosĩ abakaleka omundu iniatswerwa omo mwatsi wuwe, nʼeritegera omundu oyukasoha erĩbanza omo lũkyo lwʼomũyĩ nʼeritima omundu omo buhaka bwa busa.

²² Neryo Omwami Mukulu oyo watongolaya Abrahamũ, akabũga, busana nʼekĩtũnga kya Yakobo ati, Yakobo siendisyahemulwa, kutse obũsũ buwe sĩbwendĩsyatsĩgũka.

²³ Nĩkwa omugulu akalangira abana buwe, emĩbĩrĩ yʼebyala byage, omo katĩkatĩ kuwe, basyahigula erĩna lyage. Ega, basyakenga Oyũbũyĩrĩre wa Yakobo, kandi basyahangana nʼeriswekera Nyamuhanga wa Ĩsraelĩ.

²⁴ Kandi abakatala omo bũlengekanĩa, basyahĩka okwʼiminya omwatsi wʼekwenene nʼabakayitonga basyangirira erĩkangĩrĩrĩbwa.