Ĩsaya 28 - AMASAKO ABOYTRTRE WA NYAMUHANGA AWAKAHULAWA MO BIBLIA

Efũraĩmũ na Yũda bakatswerawa busana nʼerĩkũnda

¹ Obũlĩge oko kakĩra kʼeriyiheka lyʼabakũndĩrya ba Efũraĩmũ, nʼoko musanga owakuma wʼobubuya buwe bʼolukengerwa, ebiri oko mutwe wʼomusya owabogĩre wʼabandu abakakĩndawa nʼebĩnyũ!

² Lebaya, Omukama awite mundu muguma wʼobũtokĩ nʼowʼamaka. Ngʼembũla yʼamatwa, ekihunga kyʼerĩherya, ngʼomuyaga wʼamagetsi mangi awakabwaga, kwʼasyamugusayo atya ahisi omo byala biwe erĩhĩka oko kitaka.

³ Akakĩra kʼeriyiheka kʼabakũndĩrya ba Efũraĩmũ bakalyatangirirawa omo bisando.

⁴ Omusanga owakuma owakagatsuka obubuya buwe bʼolukengerwa ebiri oko mutwe wʼomusya owabogĩre, byasyabya ngʼebĩgũma ebĩkatsũka eriera, ebyʼomũtĩnĩ embere syʼomugulu wʼomwisi. Ekyo omugulu akalangirakyo, omugulu kikine omo byala biwe, akamerakyo.

⁵ Oko kiro ekyo, Omwami Mukulu wʼemilondo yo Wasyabya kakĩra kʼolukengerwa, nʼakakĩra kʼobubuya, oko bandu buwe abasĩgalira,

⁶ ekĩrĩmũ kyʼerĩbanza busana nʼoyo wĩkere akatswera, kandi akagala ukwʼabo abakakakĩrĩraya amalwa oko lũkyo.

⁷ Aba nabo bakayiwako nʼebĩnyũ, bakakũta-kũta omo bwabũ bũhĩre. Omũhererĩ nʼomũmĩnyererĩ bakayiwako busana nʼobwabũ bũkalĩre, babirimerwa nʼebĩnyũ, bakakũta-kũta nʼobwabũ bũkalĩre. Bakayiwako omo nzolĩ, bakatitimbira omwʼitswera.

⁸ Kusangwa esyomesa syoswĩre mwʼebisalo bĩtowene, isihakiri omwanya owene.

⁹ Asyakangĩrĩryandi yʼamenge kwehĩ? Kandi asyakũmbũlĩrandi yʼomwatsi kwehĩ? Ba nʼabo abatsĩrĩsĩbawa amabere, nʼabalũsĩbawa omo mabere kwehĩ?

¹⁰ Kusangwa akabũga ati, Ekihano oko kihano, ekihano oko kihano. Omulondo oko mulondo, nʼomulondo oko mulondo; hano hake, na halya hake.

¹¹ Ega, asyabũga nʼabandu aba omo mĩnywa yʼabandu abakalũa ehali nʼomo mũbũge wʼehali.

¹² Oyo wabwirabo ati, Hano ho hali eriluhuka, muhe eriluhuka ũkwʼoyũlũhĩre, kandi, hano ho hali erihumula; nĩkwa mobatanza erihulikirira.

¹³ Busana nʼekyo, ekĩnywa kyʼOmwami Mukulu kyasyabya ekihano oko kihano, ekihano oko kihano. Omulondo oko mulondo, omulondo oko mulondo, hano kake na halya kake. Ibatoka erigenda nʼerĩtwĩkala enyũma, nʼerĩbũnĩka, ibahambwa omo kitego, ibahambwa mo banyegwa.

¹⁴ Neryo mowe ekĩnywa kyʼOmwami Mukulu ĩnywe batelemĩ, abakatabalira abandu aba eYerũsalema.

¹⁵ Kusangwa mwabĩrĩbũga muti, Twabiriyira endagano nʼoluholo, twabirisakana nʼeKũlĩmũ. Omugulu ekĩhũnzo kyʼeribwaga kyasyalaba, sikyendĩsyatũhĩkako; kusangwa twabiriyira amabehĩ eribya busayiro bwetu, kandi twabĩrĩyĩbĩsa omwʼĩtebya.

¹⁶ Busana nʼekyo Omukama Omwami Mukulu ati, Lebaya, ngahĩmba eSĩonĩ erĩbwe, erĩbwe eryabirirengwako, erĩbwe ryʼenũnga lyʼobũgũlĩ bunene busana nʼekibanza, eryabirihandwa ndeke. Nʼoyũkĩkĩrĩraya siendisyahemuka.

¹⁷ Nage nasyayira eritswera omo lukoba lwʼerirengako, nʼeritunganene omo lulengo. Neryo amatwa asyakumulira hali obusayiro bwʼamabehĩ, nʼamagetsi asyabwagira ahʼerĩbĩsama.

¹⁸ Endagano yenyũ nʼoluholo byasyalĩmĩbwa, nʼerisakana lyenyũ nʼeKũlĩmũ siryendisyahangana. Omugulu ekĩhũnzo ekĩbwagĩre kyasyalaba, nenyũ mwasyabya eriryatangirira ahisi lyakyo.

¹⁹ Emigulu yosĩ eyo kyasyalaba kyasyabahamba. Kusangwa kyasyalaba engyakya nʼengyakya, omo musibo nʼomo kiro. Kandi kyasyabya erĩũbahya lisa eriminya enzumwa yakyo.

²⁰ Engyingo nĩ ngũhĩ erigotsera kuyo, nʼobũlangĩtĩ ni buke eriyiswikabo.

²¹ Kusangwa Omwami Mukulu asyahangana ngʼali oko kitwa kyʼePerazĩmũ, asyatsũmbũkĩbwa ngʼomo musya wʼeGĩbeonĩ; akole omũbĩrĩ wuwe, omũbĩrĩ wuwe owakalĩre, erikola omũbĩrĩ wuwe, omũbĩrĩ wuwe gʼomũsĩndo.

²² Neryo lino Simubye ngʼabatelemĩ, ebikono byenyũ bĩkasyawatĩbwa nʼamaka, kusangwa nabĩrĩowa erihana lyʼerĩherya oko kihugo kyosĩ lĩkalũa oko Mukama, Omwami Mukulu wʼemilondo.

Omũsyo wʼamalima

²³ Mutege okũtũ mowe omulenge wage, muhulikirire nʼerĩowa ebĩnywa byage.

²⁴ Omũlĩmĩ Oyukalima busana nʼeribiba embuto akalima endambĩ yosĩ kwehĩ? Akakungulalyo nʼeribandanga ekitaka emigulu yosĩ kwehĩ?

²⁵ Sĩalĩtũngananaya ekitaka kyaho nʼeribiba ekũnde nʼeripanza ejira, nʼerihera engano omo milondo, nʼekisusu aho wakyo, nʼenafaka omo mutano wabyo kwehĩ?

²⁶ Kusangwa Nyamuhanga wuwe akamũkangĩrĩraya ndeke nʼerĩmwĩgĩsya ndeke.

²⁷ Kusangwa ekũnde sĩrĩhũmbawa omo byuma bĩtwĩre, kutse ekĩrĩngo kyʼegalĩ sikiribindulawa endata oko jira. Nĩkwa ekũnde ĩkahũmbawa omo mũtso, nʼejira omo mũhũmbo.

²⁸ Ebyalya byʼobuhule bikaswebawa; kusangwa sĩendĩsyahũmbabyo emigulu yosĩ. Kusangwa ekĩrĩngo kyʼegalĩ yiwe nʼesyosabayĩrĩ siwe bĩkatsandayabyo, sĩakĩhũmbabyo.

²⁹ Ekĩ nakyo kĩkalũa oko Mwami Mukulu wʼemilondo, oyo wayira amahano wʼeriswekera, nʼamenge wuwe mo manene.