Ĩsaya 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuyira enzoka ĩhengemĩre

¹ Oko kiro ekyo, Omwami Mukulu omo mũyalĩ wuwe owatwĩre, omunene nʼowʼamaka, asyasuyira Lewĩatanĩ enzoka eyikatibita, yo Lewĩatanĩ enzoka eyo eyĩnyola-nyolĩre. Kandi asyĩta enzoka nene eyiri omo ngetsi.

² Oko kiro ekyo, eririma lyʼebĩnyũ, mwimbireryo!

³ Ĩngye Mwami Mukulu indi mũteya walyo. Ngandĩheheryalyo obuli katambĩ. Sihabye oyũkagalayalyo, ngandĩteyalyo omo kiro nʼomo musibo.

⁴ Singwite erihitana Omundu amamba amahwa nʼemisakisaki omo malwa. Nangalyatirirabyo, Nangahĩsĩrĩryabyo haguma.

⁵ Kutse ahambe amaka wage, uleke ayiketere, Uleke ayire Obuholo nage; Uleke ayire Obuholo nage.

⁶ Oko biro bikasa Yakobo asyahanda emĩrĩhĩ, Ĩsraelĩ asyahũlũkya omusanga nʼerĩtũherya. Kandi basyũsũlya ekihugo kyosĩ mwʼebĩgũma.

Erisuyirwa lya Ĩsraelĩ

⁷ Ngʼerĩswĩrya lyʼoyo waswĩrayabo abĩrĩswĩryabo kwehĩ? Kutse ngʼerĩĩta lyʼabandu buwe bĩtawa babĩrĩkwa kwehĩ?

⁸ Mowalwa nabo igukahigabo nʼeritibita kubo. Abĩrĩlũsyabo omwʼihunga liwe lĩkalĩre oko kiro kyʼerihunga lyʼendata.

⁹ Neryo busana nʼekĩ ebibi bya Yakobo byasyabuyirwa. Ebĩ byo byasyabya enzwere yʼerĩlũsya ebibi biwe omugulu akayira amabwe gosĩ wʼekiherero ngʼamabwe wʼembemba awatũndwĩre. Omugulu oyo, esyosanamu sya Asera nʼebiherero byʼobukwa sibyendisyaswahangana.

¹⁰ Kusangwa omũyĩ owakongotere ali ĩgowene, ahʼerĩĩkala ahalekawa nʼerĩsĩganĩbwa, ngʼembwarara. Eyo ekyana kyʼende kyasyalira, nʼeyo kyasyabundama, nʼerirya emitahi yago.

¹¹ Omugulu emitahi yago yamabiuma, yasyabũnangwa. Abakalĩ basyasa nʼerĩhĩsyayo omo muliro. Kusangwa si bandu bawite eriminya. Busana nʼekyo omũbũmbĩ wabo siendisyaganyirabo. NʼOmũhangĩkĩ wabo siendĩsyakwĩrabo olukogo.

¹² Neryo oko kiro ekyo, Omwami Mukulu asyatsũka erĩhũmba liwe erĩtsũka oko Lũsĩ Efurata olukasenda erĩhĩka oko Kũsĩ kʼeMĩsĩrĩ. Nenyũ mwasyahĩndanĩbwa haguma muguma muguma, ĩnywe bana bʼeĨsraelĩ.

¹³ Neryo oko kiro ekyo engubi nene yasyabuhwa. Abandu ababya bakahera omo kihugo kyʼeAsũrĩa, abapanza-panzawa omo kihugo kyʼeMĩsĩrĩ. Basyasa, basyaramya Omwami Mukulu oko kitwa kĩbũyĩrĩre eYerũsalema.