Ĩsaya 26 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwʼeripipa busana nʼeriganyira lyʼOmwami Mukulu

¹ Oko kiro ekyo, Olwimbo olũ lwasyimbirwa omo kihugo kya Yũda: Ĩtwe tuwite omũyĩ wʼamaka; Akasingika esyombĩmbo nʼahakongotere busana nʼerĩsikyaho.

² Mukingule esyongyo, Ekihanda ekitunganene kitoke eriingira, ekihanda ekitalegula.

³ Wasyateya omo buholo bũhĩkene ekihanda kyʼerĩyĩsũnza lĩsĩkĩre, Kusangwa kikayiketera we.

⁴ Mwĩkĩrĩraye Omwami Mukulu erĩhĩka kera na kera, Kusangwa omwisi wa Nyamuhanga iye Omwami Mukulu tuwite erĩbwe rya kera na kera.

⁵ Kusangwa abĩrĩkĩmĩrya ahisi abĩkere endata, Omũyĩ owʼendata akakĩmayago, Akakĩmayago erĩhĩka oko kitaka; Akagusago erĩhĩka omo lũtũtũ.

⁶ Ekisando kyasyalyatangirirago ahisi Bye bisando byʼabandu bʼobũlĩge, Nʼeribasula lyʼabandu batawite omũwatĩkya.

⁷ Enzira yʼabatunganene itendere, Uwe utunganene, uyire enzira yʼabatunganene mo yilambatikene.

⁸ Ega, erikwama enzira yʼesyonzwere syawe, uwe Mwami Mukulu Ĩtwe twabirikulinda nʼomũhwa. Erĩna lyawe, nʼerikwibuka, ni ʼsonda lyʼemitima yetu.

⁹ Nabĩrĩkũkwa olukando omo mutima wage omo kiro. Ega, ngakusonda-sonda kutsibu omo kĩrĩmũ kyage ekiri omwisi wage. Kusangwa omugulu esyonzwere syawe siri omo kihugo, Esyondũlanĩ syʼekihugo sikiga eritunganene.

¹⁰ Omubi nomo angaganyirwa, Sĩalĩrĩga ekitunganene; Omo kihugo kyʼeritunganene akakola, ekite kyʼekwenene. Kandi sialilangira obukulu bwʼomwami Mukulu.

¹¹ Uwe Mwami Mukulu ebyala byawe bĩyĩsũmbĩre, nĩkwa sibelangirabyo. Nĩkwa bakalangira omũhwa wawe busana nʼabandu, bakahemuka. Ega, omuliro asyabuga esyonzĩgũ syawe.

¹² Omwami Mukulu wasyatũhanganĩrya Obuholo; kusangwa wabiritukolera emĩbĩrĩ yetu yosĩ nibya.

¹³ Uwe Mwami Mukulu Nyamuhanga wetu, abandi bakama, butsira we, babiritutabalako. Nĩkwa ukʼuwe ĩgowene twasyahula erĩna lyawe.

¹⁴ Abaholĩre sibendisyabyaho. Emĩrĩmũ eyabirigenda siyendisyalũbũka. Busana nʼekyo wabirisuyirayo nʼerĩheryayo, kandi wabirisangula eriibukwa lyayo lyosĩ.

¹⁵ Uwe Mwami Mukulu wabĩrĩkanyĩrĩrya ekihanda, wabĩrĩkanyĩrĩrya ekihanda, wabiripipwa. Wabiritanika erĩgalĩhya emitano yosĩ yʼekihugo.

¹⁶ Uwe Mwami Mukulu, mobakusondasonda omo bũlĩge. Mobasaba omo bihwehwe omugulu erikunga lyawe lyabya kubo.

¹⁷ Ngʼomukule oyũkahĩka hakũhĩ nʼomugulu wuwe wʼeributa, akagalawa inialaka busana nʼobwagalĩ buwe, netu twabya tutya embere syawe uwe Mwami Mukulu.

¹⁸ Twabya nʼobukule, twayinyola nʼobwagalĩ, motwabuta ngʼerihunga buyira. Motwataluka oko mulamo busana nʼekihugo. Kandi esyondũlanĩ syʼekihugo mositetabutwa.

¹⁹ Abaholĩ benyũ basyabyaho. Ebĩnda byabo byasyalũbũka. Mubuke, mugoromoke ĩnywe mugotsere omo lũtũtũ, kusangwa ekimi kyawe kiri ngʼekimi kyʼomwĩtsange, nʼekitaka kyasyahũlũkya emĩrĩmũ eyabirigenda.

²⁰ Mwase, abandu bage, mwingire omo manyũmba wenyũ, mukinge esyonyũyĩ syenyũ enyũma wenyũ. Mũyĩbĩse oko katambĩ kake, erĩhĩka aho erihitana lyamabilabira.

²¹ Kusangwa, lebaya, Omwami Mukulu akĩsĩya iniahuluka akalũa aho wuwe erisuyira esyondũlanĩ syʼekihugo busana nʼebibi byabo. Ekihugo kyasyabĩsũla omusasi wakyo, sikyendisyaswaswika abĩtawa bakyo.