Ĩsaya 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswerwa lyʼebihanda

¹ Lebaya, Omwami Mukulu akayira ekihugo mo kĩma, kandi kyo mo mulala, kandi amatulangakyo, nʼeripanza-panza esyondũlanĩ sya mukyo.

² Neryo abandu ko basyabya ngʼomũhererĩ; omugombe asyabya ngʼomukama wuwe, omutsana asyabya ngʼomũkalĩ oyo akakolera; oyukagula asyabya ngʼoyũkagũlaya; oyukabweka asyabya ngʼoyukayibweka; oyukabweka busana nʼendũndĩ asyabya ngʼoyuli nʼomwĩnda.

³ Ekihugo kyasyakungumulwa kutsibu, kyasyayirwa mo mulala kutsibu; kusangwa Omwami Mukulu abĩrĩbũga ekĩnywa ekĩ.

⁴ Ekihugo kikalira, kikuma, ekihugo kikogoka kikuma, abandu bakulu bʼekihugo bakogoka.

⁵ Esyondũlanĩ syʼekihugo syabĩrĩta kyo nye, kusangwa babiriketa ebihano, babiripona emigambo babĩrĩtwa endagano ya kera na kera.

⁶ Busana nʼekyo, eritakira lyabirirya ekihugo, nʼabĩkere mukyo babiribanika kʼomusango. Busana nʼekyo, esyondũlanĩ syʼekihugo syabirĩsũnzũkalira, nʼabandu bake basĩgere.

⁷ Ebĩnyũ bihya-bihya byamalira, nʼomũlĩkĩ wʼebĩnyũ akogokala, nʼabosĩ ababya nʼobutseme omo mutima bakahumulikana.

⁸ Obutseme bwʼenzenze bũkũmbaya, nʼolukanda lwʼabakatsanga lukakwa, obutseme bwʼekinanga bũkũmbaya.

⁹ Sĩbepũlaya ebĩnyũ haguma nʼolwimbo. Etamiro yasyakaliha oko bakapũlayayo.

¹⁰ Omũyĩ wʼomulala abirisambulirwa ahisi. Obuli nyũmba yabirikingwa, omundu siabane eriingiramo.

¹¹ Hali emilake omo syonzira busana nʼebĩnyũ. Obutseme bosĩ bwabiribya mwĩrĩmya, eritsanga lyʼekihugo lyabirihwaho.

¹² Omũyĩ abĩrĩsĩgala mo kĩma, nʼolũkyo lwabĩrĩkwa omwʼihera.

¹³ Kusangwa ko kyasyabya kitya omo kihugo omo katĩkatĩ kʼebihanda, ngʼerĩsũkanĩa lyʼomuti wʼemĩzeĩtũnĩ, ngʼerioha lyʼebĩnyũ ebĩsĩgere omugulu erioha lyamabihwa.

¹⁴ Bakasumba emirenge yabo, bakũta obogo busana nʼobutseme. Bakabirikira ebwanga bwʼeyĩkwa busana nʼobusinge bwʼomwami Mukulu.

¹⁵ Neryo ĩnywe mũsĩkaye Omwami Mukulu eyo eryuba likasira, nʼerĩna lyʼOmwami Mukulu, Nyamuhanga wa Ĩsraelĩ, omo katĩkatĩ kʼebitsira byʼengetsi.

¹⁶ Twabĩrĩowa esyonyimbo sĩkalũa oko ndũlĩ-ndũlĩ yʼekihugo siti, Olukengerwa oko Yutunganene. Nĩkwa ngabũga nyiti, Obũlĩge kwĩngye! Obũlĩge kwĩngye! Ĩyo-o! Abatebya bakakola ebyʼamatebo; ega, abatebya bakakola ebyʼamatebo kutsibu.

¹⁷ Obuba, nʼobuhya, nʼekitego bikuliko, uwe ndũlanĩ yʼekihugo.

¹⁸ Neryo kyasyabya, oyukasaga omulenge wʼerĩkwa asyawa omo buhya nʼoyũkalũa omo buhya asyanĩgwa omo kitego, kusangwa ebĩtũ byʼekyanya bĩkawĩsaya embũla, nʼebibanza byʼekihugo bĩkasũkana.

¹⁹ Ekihugo kĩbũnĩkĩre kutsibu, ekihugo kĩtũlamĩre, ekihugo kĩsũkene kutsibu.

²⁰ Ekihugo kikahenenguka ngʼomũtamĩrĩ, kikatenganira eyĩ nʼeyĩ ngʼakatalikirire. Kusangwa erĩlolo lyakyo lyasyalĩtoherakyo kandi kyasyatoga, sikyendisyahangana kandi.

²¹ Neryo oko kiro ekyo, Omwami Mukulu asyasuyira omulondo wʼolubula endata, nʼabami bʼekihugo oko kihugo.

²² Kandi basyahĩndanĩbwa haguma, ngʼabandu bʼomũlĩkĩ ko bakahĩndanĩbawa omo buhya, kandi basyakingirwa omo mũlĩkĩ, nʼenyũma wʼebiro bingi basyasuyirwa.

²³ Oko mugulu oyo, omukera asyahemuka, nʼeryuba lyasyakwa esĩsonĩ, kusangwa Omwami Mukulu wʼemilondo asyatabala oko Kitwa kyʼeSĩonĩ, nʼeYerũsalema, nʼolukengerwa luwe lwasyabya embere syʼabakulu buwe.