Ĩsaya 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera busana nʼeTĩro

¹ Eriminyerera busana nʼeTĩro. Mũmokũle, ĩnywe mato wʼeTarsisi, kusangwa eTĩro yabiriyirwa mo mulala, isihali nyũmba mugo, sihali obwingiro omo ngetsi babiribwirwa omwatsi erĩlũa oko kihugo kyʼeKĩtĩmũ.

² Mubye bũkũtũ, ĩnywe ndũlanĩ syʼoko mũsĩke wʼengetsi, ĩnywe batũndya bʼeSĩdonĩ. Abakwenda bawe mobasoka engetsi.

³ Mobabya oko magetsi mangi embuto yʼeNĩlĩ, erigesa lo Lũsĩ, lwabya ngemu yiwe, naye abya katale kʼebihanda.

⁴ Ũkwe esĩsonĩ uwe Sĩdonĩ, kusangwa engetsi ĩkabũga, ahakangatĩre hʼengetsi, hati, Sinditakunda, kutse eributa, sĩndĩtakũlya abalwana, kutse erĩkũlya abana-bato.

⁵ Omugulu engulu ĩkahĩka eMĩsĩrĩ, basyagalwa busana nʼengulu yʼeTĩro.

⁶ Musokere eTarsisi, mũmokũle, ĩnywe ndũlanĩ syʼoko mũsĩke wʼengetsi.

⁷ Oyũ nĩ mũyĩ wenyũ wʼobutseme, erĩtsũka lyako ni ryʼebiro bya kera, ebisando byako byagenda bikahekago ehali eriyabungirayo kwehĩ?

⁸ Nindi oyo wakandayirira ekĩ busana nʼeTĩro kwehĩ, oyũkahĩtaya otũkĩra kwehĩ, abatũndĩ bago ni banya-mwami nʼabatũndĩ bago nĩ bʼerĩsĩkĩbwa bʼekihugo kwehĩ?

⁹ Omwami Mukulu wʼemilondo yo wakandayirirakyo, erĩtsandya eriyiheka lyʼolukengerwa losĩ, erireka ibapona abasĩkĩbwe bosĩ bʼekihugo.

¹⁰ Utwangane omo kihugo kyawe ngʼeNĩlĩ, uwe mwali wʼeTarsisi, sihakiri erĩkakĩrya.

¹¹ Abirisumbira ebyala biwe oko ngetsi, abĩrĩsũkanĩa amami. Omwami Mukulu abirihana busana nʼeKanana erĩherya ahakongotere hayo.

¹² Neryo abĩrĩbũga ati, Siwendisyaswatsema, uwe mumbesa wanũbĩbawa, mwali wʼeSĩdonĩ. Uhangane, usokere eKĩtĩmũ; nʼeyo siwendisyabana eriluhuka.

¹³ Lebaya, ekihugo kyʼAbakaldea. Aba ba bandu batabyaho. Asũrĩa mwahamulakyo busana nʼebyo, bakĩkala omo mbwarara; mobĩmanĩa emisunguliko yabo yʼeribambiraho, mobahũnga amanyũmba wako wʼabami; mobayirago mo mulala.

¹⁴ Mũmokũle, ĩnywe mato wʼeTarsisi, kusangwa ahakongotere henyũ habĩrĩherĩbwa.

¹⁵ Neryo oko kiro ekyo, eTĩro yasyibiriranwa emyaka makũmĩ alinda, ngʼebiro byʼOmwami muguma. Oko ndũlĩ yʼemyaka makũmĩ alinda kyasyahĩka oko Tĩro ngʼolwimbo lwʼomũmalaya:

¹⁶ Wĩmaye ekinanga, ulendere omo mũyĩ, Uwe mũmalaya wibiriranawa; Uwatekyo ndeke, wimbe esyonyimbo nyingi, Iwatoka eryibukwa.

¹⁷ Neryo oko ndũlĩ yʼemyaka makũmĩ alinda, Omwami Mukulu asyayalũngũlĩra eTĩro. Neryo asyasubira obukumbi buwe bwʼomũmalaya, kandi asyaragana nʼamami gosĩ oko kihugo kyosĩ.

¹⁸ Endũndĩ yiwe nʼobukumbi buwe bwʼomũmalaya byasyahigulwa oko Mwami Mukulu. Sĩbyendĩsyahĩrwa omo kigona kutse eribikwa; nĩkwa endũndĩ yiwe yasyabya kalyo kangaho nʼesyongimba syowenenga busana nʼabandu abakĩkala embere syʼOmwami Mukulu.