Ĩsaya 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Eribambirwa lyʼeYerũsalema

¹ Eriminyerera lyʼomusya wʼerilota. Lino mũkwĩrekĩ, muti mukasamba endata oko nyitwe syʼamanyũmba kwehĩ?

² Ĩnywe ababya nʼolukanda, Uwe mũyĩ wʼolukanda, uwe mũyĩ wʼobutseme; Abĩtawa bawe mobatĩtwa nʼomũyalĩ, Kutse sibaholere omo malwa.

³ Abatabalĩ benyũ bosĩ basagire haguma, Babirihambwa isihali obuta, Abosĩ ababanika mobahambwa haguma, Nomo banabya ibabirisagira hali.

⁴ Kyaleka ĩnabũga nyiti, Sunyikebere, uleke nyirire ekĩkalĩhĩre, suhatikane erĩnyĩkĩranĩa busana nʼerĩherĩbwa lyʼomwali wʼabandu bage.

⁵ Kusangwa Omukama Omwami Mukulu wʼemilondo awite ekiro kyʼobuba, erĩkĩndwa, nʼeriremwa, omo musya wʼerilota, erisambula esyombĩmbo, nʼerilakira ebitwa.

⁶ Na Elamũ mwaheka ekikeba kyʼemisoha haguma nʼesyogalĩ nʼabandu, nʼabandu abali oko syosabayĩrĩ; na Kĩrĩ mwaswikula engabo.

⁷ Neryo emisya yawe eyowene kutsibu moyũsũla mwʼesyogalĩ syʼamalwa, nʼabali oko syosabayĩrĩ mobayitondeka oko lũkyo.

⁸ Neryo mwalũsya eriyilwira lya Yũda. Nawe oko kiro ekyo mowayiketera ebindu byʼamalwa byʼenyũmba omo mũsĩtũ.

⁹ Nenyũ momwalangira ebitobongokera omo lũhĩmbo lwʼomũyĩ wa Dawĩdĩ ko biri bingi. Kandi momwahĩndanĩa amagetsi wʼekitsinga kyʼeyĩkwa.

¹⁰ Kandi momwaganza amanyũmba wʼeYerũsalema, kandi momwasambula amanyũmba busana nʼerĩwatya olũhĩmbo.

¹¹ Kandi momwakokotya ekitsinga omo katĩkatĩ kʼesyombĩmbo ĩbĩrĩ busana nʼamagetsi wʼekitsinga kya kera. Nĩkwa momutayiketera oyo wakolakyo, kutse momutakenga oyo wayĩsũnzakyo kera-kera.

¹² Neryo oko kiro ekyo Omukama, Omwami Mukulu wʼemilondo, mwababirikira eririra, nʼerĩsũsũmana, nʼerĩsĩsa omutwe, nʼeriambala emisarandwe.

¹³ Nĩkwa hali obutseme nʼeritsanga, nʼerikera esyonde nʼerikera esyombũlĩ, nʼerirya esĩswĩ nʼerĩpũlya ebĩnyũ. Tulye, tũpũlaye, kusangwa omo ngyakya twasyahola.

¹⁴ Nĩkwa Omwami Mukulu wʼemilondo mwayĩbĩsũla ũkwʼĩngye ati, Kwenene simwendisyabuyirwa ebibi ebĩ, erĩhĩka aho mwasyaholera, Omukama Omwami Mukulu wʼemilondo atya.

Elĩakĩmũ akasingula Shebũna

¹⁵ Omukama, Omwami Mukulu wʼemilondo ati, Wase, ugende oko mũbĩkĩ oyũ, ye Shebũna, oyuli mukulu omo nyũmba uti,

¹⁶ Uli nʼehamũlĩ yahi hano kwehĩ? Kandi uli nandi hano uti ukayibatsira hano eyisinda kwehĩ? Uwe ukabatsa eyisinda endata, uwe ukayibatsira ahʼeriluhukira omwʼĩbwe?

¹⁷ Lebaya, uwe mundu, Omwami Mukulu akĩsĩya erikugusa ahisi kinya-maka, kandi akĩsĩya erikuhamba kutsibu.

¹⁸ Kwenene nʼerĩkũlĩngalĩnga ngʼomupira, nʼerikugusa omo kihugo kinganabi. Nʼeyo wasyaholera, nʼeyo hasyabya esyogalĩ syawe nyibuya syasyabya, uwe ĩsonĩ syʼenyũmba yʼomukama wawe.

¹⁹ Kandi nasyakũhehya erĩkũlũsya oko bukulu bwawe. Nasyakukura ahisi erĩkũlũsya oko bukama bwawe.

²⁰ Neryo oko kiro ekyo, nasyabirikira omugombe wage Elĩakĩmũ mugala wa Hĩlkĩa.

²¹ Nage nasyamwambalya ekanzu yawe, kandi asyamubohera kwʼomukoba wawe, kandi nasyamuha ehamũlĩ yawe. Naye asyabya tata wʼesyondũlanĩ syʼeYerũsalema, nʼoko kĩtũnga kya Yũda.

²² Neryo ekĩboholĩ kyʼekĩtũnga kya Dawĩdĩ nasyahĩrakyo oko kitigo kiwe, omugulu akakingula, isihali oyo wasyakingaho, kandi omugulu akakingaho isihali oyo wasyakigulaho.

²³ Kandi nasyamũwatyaho ngʼomũsũmalĩ owali ahasĩkĩre. Naye asyabya kĩtũmbĩ kyʼobwami kyʼolukengerwa busana nʼekĩtũnga kya tata wuwe.

²⁴ Litya basyamũlerembyako olukengerwa losĩ lwʼekĩtũnga kya tata wuwe, olubuto nʼabana, esyonyungu syosĩ nge-ngenge erĩtsũka oko bibindi nʼerĩhĩka oko tulega.

²⁵ Oko kiro ekyo, Omwami Mukulu wʼemilondo ati, Omũsũmalĩ owakongomererawa ahasĩkĩre asyalũsĩbwaho. Nago asyatwĩka iniawa. Omuheke owabya kugo asyatũbwa, kusangwa Omwami Mukulu abĩrĩbũgakyo.