Ĩsaya 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritabala lyʼOmwami Mukulu

¹ Ekĩnywa ekyo Ĩsaya mugala wa Amosĩ alangira busana na Yũda nʼeYerũsalema.

² Neryo kyasyabya oko biro byʼenyũma, ekitwa kyʼenyũmba yʼOmwami Mukulu kyasyahanganĩbwa ngʼekikulu kyʼebitwa, kyasyahamĩbwa endata oko bitwa. Ebihanda byosĩ byasyahĩkaho.

³ Ebihanda bingi byasyayabũga biti, Mwase, tuhetukire oko kitwa kyʼOmwami Mukulu, oko nyũmba ya Nyamuhanga wa Yakobo, naye atoke erĩtũkangĩrĩrya esyonzira siwe, netu itwatoka erirendera omo syombalu siwe. Kusangwa omo Sĩonĩ mwasyalũa emigambo, nʼekĩnywa kyʼOmwami Mukulu kyasyahulukira eYerũsalema.

⁴ Naye asyatswera omo katĩkatĩ kʼebihanda, nʼeritswera emyatsi busana nʼabandu bangi. Nabo basyahesa emĩyalĩ yabo mwʼĩsũka, nʼamatũmo wabo mo bisara. Ekihanda sikyendisyasumbira ekindi kihanda kyʼomũyalĩ, kutse sibendĩsyaswayĩgĩsya amalwa.

Omwami Mukulu akahayira Ĩsraelĩ

⁵ Ĩnywe kĩtũnga kya Yakobo mwase, tulendere omo kyakakala kyʼOmwami Mukulu.

⁶ Kusangwa wabĩrĩsĩganĩa abandu bawe kye kĩtũnga kya Yakobo, kusangwa boswĩre mwʼemitsye eyĩkalũa eyo eryuba likasira, kandi nĩ balagũlĩ filĩstĩnĩ, kandi bakahambana omo byala byʼabana bʼabandu bʼehandi.

⁷ Ekihugo kyabo kyoswĩre mwʼebĩtsĩpa nʼesyamagetsi, kandi sihali ndũlĩ yʼobuteke bwabo. Ekihugo kyabo kyoswĩre mwʼesyosabayĩrĩ, nʼesyogalĩ syabo sisiwite ndũlĩ.

⁸ Kandi ekihugo kyabo kyoswĩre mwʼesyosanamu, bakaramaya omũbĩrĩ wʼebyala byabo ĩbobene, ebyo eminwe yabo yakokotaya.

⁹ Omundu molo abirihemulwa, nʼomundu mukulu abĩrĩkehĩbwa. Nĩkwa subuyirebo.

¹⁰ Wingire omwʼĩbwe, ũyĩbĩse omo lũtũtũ, erĩlũa oko buba bwʼomwami Mukulu, nʼoko lukengerwa lwʼobukulu buwe.

¹¹ Emiyitendero yʼameso wʼabandu yasyakehĩbwa, nʼeriyikebera lyʼabandu lyasyahemulirwa ahisi, nʼOmwami Mukulu asyahamĩbwa ĩyowene ekiro ekyo.

¹² Kusangwa Omwami Mukulu wʼemilondo asyayira ekiro kyʼolubanza busana nʼabosĩ abakayikebera nʼeriyiheka, na busana nʼabandu bosĩ abakayĩhamaya, ibatoka erĩkehĩbwa.

¹³ Lwasyabya lubanza oko miti yosĩ yʼemĩerezĩ miri-miri nʼeriyimoleka lyʼeLebanonĩ, nʼoko miti yosĩ yʼemĩalonĩ yʼeBasanĩ,

¹⁴ olubanza oko bitwa byosĩ biri-biri, nʼoko hitwa hyosĩ ehĩyĩsũmbĩre,

¹⁵ olubanza oko buli musunguliko wʼenyũmba, nʼoko buli lũhĩmbo olũkangatĩre,

¹⁶ olubanza oko mato gosĩ wʼeTarasisi, nʼoko bĩsosekanĩo byosĩ ebĩkangĩre.

¹⁷ Eriyiheka lyʼabandu lyasyahemulwa, nʼeriyikebera lyʼabandu lyasyakehĩbwa. Omwami Mukulu ĩyowene asyahamĩbwa oko kiro ekyo.

¹⁸ Nĩkwa esyosanamu syasyahwaho kũndũ.

¹⁹ Nʼabandu basyingira omo myangalũ yʼamabwe, nʼomo byũna byʼomo kitaka erĩlũa embere syʼolubahwa lwʼOmwami Mukulu nʼembere wʼolukengerwa lwʼobukulu buwe, omugulu akahangana erĩsũka-sũkanĩa ekihugo.

²⁰ Oko kiro ekyo abandu basyagusa esyosanamu syabo syʼebĩtsĩpa nʼesyosanamu syabo syʼesyamagetsi, oko bĩngĩrĩ nʼoko birima-lima esyo bayĩkokoteraya busana nabo erĩramyasyo;

²¹ ibatoka, eriingira omo myangalũ yʼamabwe, nʼomo migenyo yʼolukuka lwʼamabwe, erĩlũa embere syʼolubahwa lwʼOmwami Mukulu, nʼerĩlũa embere syʼolukengerwa lʼobukulu buwe, omugulu akahangana erĩsũkanĩa ekihugo kyo kutsibu.

²² Muleke erisamalira abandu, omuka wabo ali omo nĩndo syabo, kusangwa omundu angasĩmwa busana nakĩ kwehĩ?