Ĩsaya 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera busana nʼeMĩsĩrĩ

¹ Eriminyerera busana nʼeMĩsĩrĩ. Lebaya, Omwami Mukulu akahekawa nʼekĩtũ kikagenda lũba, akĩsĩya ĩnĩahĩka eMĩsĩrĩ. Esyosanamu syʼeMĩsĩrĩ syasyatitimanira embere siwe, nʼomutima wʼAbanya Mĩsĩrĩ asyasendekerera omwisi wabo.

² Kandi nasyalwĩsĩsanĩa emitima yʼAbanya Mĩsĩrĩ erilwa nʼAbanya Mĩsĩrĩ. Nabo basyayĩrwanĩa obuli mundu na mugala wabo, nʼobuli mundu na mũlĩkyabo, nʼomũyĩ nʼogundi mũyĩ, nʼobwami nʼobundi bwami.

³ Neryo ekĩrĩmũ kyʼAbanya Mĩsĩrĩ kyasyũtũkala omwisi wabo. Kandi nasyalĩba-lĩbanĩa amenge wabo. Kyasyaleka ibasyasonda-sonda esyosanamu, nʼemĩrĩmũ yʼabaholĩ, nʼabakũmũ, nʼabalagũlĩ.

⁴ Kandi nasyahĩra Abanya Mĩsĩrĩ omo byala byʼomukama oyũtsatsũhĩre. Omwami Ũkalĩre asyatabala kubo, Omukama Omwami Mukulu wʼemilondo, akabũga.

⁵ Nʼamagetsi wʼengetsi asyuma, nʼolũsĩ lwasyahwerekerera, iluma.

⁶ Esyonyũsĩ syasyakumba. Esyonyũsĩ syʼeMĩsĩrĩ syasyakeha nʼeriuma. Esĩseke nʼebihembo-hembo, byasyahonda.

⁷ Amalĩsiryo oko mũsĩke wʼeNĩlĩ, hakũhĩ oko na mũsĩke wʼeNĩlĩ, nʼobuli myaka eyĩherĩre oko Nĩlĩ yasyuma, nʼerĩlũsĩbwaho nʼeritindaswabyaho.

⁸ Abasohĩ basyalira, nʼabosĩ abakasoha omo burobo omo Nĩlĩ basyalira, nʼabakagusa obutahataha oko magetsi basyagonongoka.

⁹ Kandi abakahunga ekĩtanĩ, nʼabakaluka esyongimba nyeru-nyeru, basyahemulwa.

¹⁰ Esyondũyĩ syʼeMĩsĩrĩ syasyabũnangwa mo bitswe-bitswe, kandi abosĩ abakakola busana noʼbũhĩngĩ basyagalirwa omo mutima.

¹¹ Abanya-mwami bʼeZoanĩ babiribya bakĩrũ kutsibu, nʼamahano wʼabahanĩ bʼamenge ba Farao abiribya wʼesyonyama. Mũkabũga na Farao muti, Ingye indi mugala wʼomunyima-nyima, omugala wʼabami ba kera muti kwehĩ?

¹² Abandu bʼamenge balihi kwehĩ? Kĩsĩ-kĩsĩ, bakubwire kandi baminye ebyo Mwami Mukulu wʼemilondo abirikandayirira busana nʼeMĩsĩrĩ.

¹³ Abanya-mwami bʼeZoanĩ babirikola obũkĩrũ, abanya-mwami bʼeNofũ babĩrĩtebĩbwa. Abo abakulu bʼebihanda byabo babĩrĩtalya eMĩsĩrĩ.

¹⁴ Omwami Mukulu abĩrĩtũlũnganĩa omwisi wuwe ekĩrĩmũ kyʼepono omo katĩkatĩ kabo. Kandi babĩrĩtalya eMĩsĩrĩ omo mĩbĩrĩ yosĩ yayo, ngoko mũtamĩrĩ akatwĩkangala omo bisalo biwe.

¹⁵ Kutse sihendisyabya omũbĩrĩ busana nʼeMĩsĩrĩ owangatoka erikolwa nʼomutwe kutse omukira, Omutahi wʼobubondo kutse erisesa.

¹⁶ Oko kiro ekyo Abanya Mĩsĩrĩ basyabya ngʼabakalĩ, basyatitimana nʼeriubaha busana nʼerĩsũka-sũkya lyʼebyala byʼOmwami Mukulu wʼemilondo, ebyo asyasũka-sũkya endata kubo.

¹⁷ Ekihugo kyʼeYũda kyasyabya erĩũbahya busana nʼeMĩsĩrĩ. Obuli mundu oyo wasyabwirwa busana nakyo asyubaha, busana nʼerĩsũnzĩkanĩa lyʼOmwami Mukulu wʼemilondo, eryo akasũnzĩkanaya busana nakyo, erilwa nabo.

¹⁸ Oko kiro ekyo hasyabya emĩyĩ ĩtanu omo kihugo kyʼeMĩsĩrĩ eyĩkabũga omũbũge wʼeKanana, nʼerĩlahĩrya erikenga Omwami Mukulu wʼemilondo. Omuguma asyahulwa mo Mũyĩ Wʼerihera.

¹⁹ Oko kiro ekyo hasyabya ekiherero omo katĩkatĩ kʼekihugo kyʼeMĩsĩrĩ, busana nʼOmwami Mukulu, nʼendũyĩ oko mutano wakyo oko Mwami Mukulu.

²⁰ Nakyo kyasyabya kiminyikalo nʼerĩtũlago oko Mwami Mukulu wʼemilondo omo kihugo kyʼeMĩsĩrĩ. Kusangwa basyalakira Omwami Mukulu busana nʼabanũbya, kandi asyatumirabo Omũlamya, nʼEmbangĩ, naye asyalamyabo.

²¹ Litya Omwami Mukulu asyayĩmĩnyĩsya oko Mĩsĩrĩ, nʼAbanya Mĩsĩrĩ basyaminya Omwami Mukulu oko kiro ekyo. Ega, basyaramya omo buhere nʼerihongera, kandi basyalahĩrya ekĩlahĩryo oko Mwami Mukulu nʼerikolakyo.

²² Kandi Omwami Mukulu asyaswĩrya eMĩsĩrĩ, erĩswĩrya nĩkwa erĩlamya. Nabo basyasuba eyiri Omwami Mukulu naye asyasũbĩryabo nʼerĩlamyabo.

²³ Oko kiro ekyo hasyabya enzira nene ĩkalũa eMĩsĩrĩ erĩhĩka eAsũrĩa nʼAbaasũrĩa basyahĩka eMĩsĩrĩ, nʼAbanya Mĩsĩrĩ basyahĩka eAsũrĩa. Abanya Mĩsĩrĩ basyaramya haguma nʼAbaasũrĩa.

²⁴ Oko kiro ekyo Ĩsraelĩ asyabya wʼakasatu haguma nʼeMĩsĩrĩ nʼeAsũrĩa, eribya mũyĩsa omo kihugo.

²⁵ Abo Mwami Mukulu abiritsumula ati, Omũyĩsa abye oko Mĩsĩrĩ abandu bage, nʼoko Asũrĩa omũbĩrĩ wʼebyala byage, nʼoko Ĩsraelĩ omwandu wage.