Ĩsaya 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera busana nʼeDamaseke

¹ Eriminyerera busana nʼeDamaseke. Lebaya, Damaseke akalũsĩbawa okwʼibya mũyĩ, kandi asyabya kilundo kyʼekĩma.

² Emĩyĩ yʼeAroerĩ yamasĩganĩbwa; yasyabya busana nʼebihangulo erisyabundamamo, kandi sihali oyo wasyũbahyasyo.

³ Ahakangatĩre hʼeEfũraĩmũ hasyũmbya, nʼobwami bwʼeDamaseke bwasyũmbya, nʼabasĩgalira bʼeSũrĩa, basyabya ngʼolukengerwa lwʼabana ba Ĩsraelĩ, Omwami Mukulu wʼemilondo akabũga atya.

⁴ Neryo oko kiro ekyo, olukengerwa lwa Yakobo lwasyakeha, nʼerineneha lyʼomubiri wuwe lyasyabonda.

⁵ Neryo kyasyabya ngʼomugulu omũgesĩ akakumakuma emiganda yʼengano, nʼebyala biwe bikagesa amakũndĩ; kutse kyasyabya ngʼomundu akahũmba amakũndĩ wʼengano omo musya wʼeRefaĩmũ.

⁶ Nĩkwa mwasyasĩgalira amahũmbĩra, ngʼerĩsũkana lyʼomuti wʼemĩzeĩtũnĩ, ebĩgũma bibiri kutse bisatu oko mutahi owali endata, ebini kutse bitanu oko mitahi yʼomuti akaheta ndeke, Omwami Mukulu Nyamuhanga wa Ĩsraelĩ akabũga atya.

⁷ Oko kiro ekyo omundu asyasamalira Omũhangĩkĩ wuwe, nʼameso wuwe asyasamalira Oyũbũyĩrĩre wa Ĩsraelĩ.

⁸ Kandi siendisyatungerera ebiherero, omũbĩrĩ wʼebyala biwe, kutse siendisyatungerera ebyo eminwe yiwe yabirikola, kutse esyosanamu sya Asera, kutse ebiherero byʼobukwa.

⁹ Oko kiro ekyo emĩyĩ yabo eyĩkangatĩre yasyabya ngʼebĩma omo mũsĩtũ, kutse ngʼemitahi eyo basĩganaya embere syʼabana ba Ĩsraelĩ. Ekihugo kyasyabya mulala.

¹⁰ Kusangwa wabiribirirwa Nyamuhanga wʼomulamo wawe, kandi sulitibuka erĩbwe lyʼobusayiro bwawe. Busana nʼekyo ukahera emyaka eyĩkatsemesaya, kandi ukaherayo haguma nʼemĩrĩkĩ ya nyamuhanga wʼehandi.

¹¹ Oko kiro ekyo ukaherayo Ũkahĩra kuyo kwʼekĩyĩte, nʼomo ngyakya ukaha embuto erisohola. Nĩkwa erigesa lyasyabya ekilundo oko kiro kyʼerilwala nʼobwagalĩ obutelama.

¹² Ĩyo-o, olukanda lwʼebihanda bingi! Bakahuha ngʼerihuha lyʼesyongetsi, Nʼeriruruma lyʼebihanda, ebikasenda, ngʼeriruruma lyʼamagetsi akalĩre!

¹³ Ebihanda bikaruruma ngʼeriruruma lyʼamagetsi mangi, Nĩkwa asyakungabyo, nabyo byasyatibwa hali, Byasyahigwa ngʼomusunga omo bitwa omo buhuhuliro bwʼerihunga, Kutse ngʼerĩtĩmba-tĩmba lyʼolũtũtũ embere syʼakanyabungu.

¹⁴ Omugulu wʼerĩgolo-golo, lebaya, hali erĩũbahya! Embere wʼengyakya sibikiri. Erĩ nĩ ʼgabo lyʼabandu abakatũhũnga, Nʼerĩgabo lyʼabandu abakatũpũra kwʼebindu.